Hóbennan Sa Puntra . . .

Mi Mester Hasi Operashon Kosmétiko?

“Promé ku mi a operá mi nanishi, mi a sufri hopi na man di hende ku tabata tenta mi. Mi no tabata kier un nanishi úniko, pero gewon unu ku a pas ku mi. Mi ta masha felis ku e resultado di e operashon, i si ta nesesario lo mi bolbe hasié.”​—⁠Eleni. *

“Dikon mi mester someté mi na ideanan standarisá di loke ta bon tipo? Si mi operá pa kambia partinan di mi kurpa, lo mi sinti mi manera plaka falsu. Lo mi no ta mi mes.”​—⁠Mathias.

“Kada hende mester disidí pa su mes. Ta masha difísil pa un otro hende husga esei.”​—⁠Manuela.

“KEN ku ta mas bunita ku mi, mester a usa make-up.” Na Alemania, pa hopi tempu hende ku ta preokupá ku nan aparensia no ta perfekto a usa e dicho humorístiko ei pa defendé nan mes. Pero awendia den algun pais, lo mester kambia e dicho ei pa: “Ken ku ta mas bunita ku mi, mester a hasi operashon.” Sí, operashon kosmétiko a bira algu komun i koriente.

E korant suiso Neue Zürcher Zeitung ta informá: “E tempu ku ta hende riku so tabata hasi operashon kosmétiko a pasa pa historia.” Anto e  korant a agregá: “Tin dos tendensia ku a lanta kabes: Mas i mas hende hòmber ta buska yudansa di siruhanonan kosmétiko . . . , i e klientenan femenino ta mas yòn ku nunka.” Segun un enkuesta na Alemania, kasi 20 porshento di e personanan di entre 14 pa 29 aña di edat ku nan a entrevistá, sea a hasi operashon kosmétiko kaba, tin pensá di hasi esei òf por lo ménos a pensa riba esei. * Podisé algun di bo amigunan, kompañeronan di skol òf miembronan di famia a operá pa drecha nan aparensia.

Ke tal di abo? Bo a yega di pensa pa operá pa drecha bo aparensia? Bo ta sinti ku bo oreanan ta muchu pará, ku bo pechunan ta muchu grandi òf muchu chikí, ku bo barika ta grandi òf bo bèlnan ta muchu diki, òf ku bo nanishi ta mahos? Si ta asina, bo no ta e úniko persona ku ta sinti asina. Un grupo di mucha muhé di skol sekundario a skirbi un artíkulo den un korant aleman bisando: “Kasi no tin un mucha di nos edat ku no a pasa dor di periodonan di ta malkontentu ku su kurpa.” Ta normal ku bo kier pa hende haña bo atraktivo i pa nan gustá bo. Pero ta operá ta e solushon?

Operashon Kosmétiko Ta e Solushon pa Bo Problemanan?

Wak e hóbennan ku bo konosé. Lo strañá bo si bo haña sa ku hopi di nan⁠—⁠podisé asta algun ku abo ta haña nèchi⁠—⁠ta infelis ku nan aparensia? Pero muy probablemente ta asina ta. Awor, e pregunta ta: Bo ta kere ku nan tur mester operá pa drecha nan aparensia? Òf bo ta pensa ku lo ta mihó pa mayoria di nan si nan siña keda kontentu ku e aspektonan deseabel di nan aparensia? E mesun prinsipio lo por ta apliká den bo kaso?

Manera e komentario di Eleni ta mustra, den algun kaso operashon kosmétiko por pone ku hende ta stòp di tenta bo òf molestiá bo. Di otro banda, operashon kosmétiko no ta un kura-lo-todo i sigur e no ta remplasá un estilo di bida saludabel. Un bida sano lo benefisiá un persona su aparensia personal masha hopi. I ounke un siruhano lo por kambia bo aparensia, e no por kambia bo personalidat, ni e no por kita bo preokupashonnan ni tampoko duna bo mas rèspèt propio.

Kòrda tambe ku algun klínika òf dòkter ta primintí kosnan ku nan no por kumpli kuné. Bon mirá, ta parse manera kos ku nan ta primintí bo felisidat. Pero en realidat, kisas nan ta mas interesá den bo plaka ku den bo felisidat. Lamentablemente, tin un par di siruhano sin eskrúpulo ku lo ta kla pa hasi un operashon innesesario, ku tin masha tiki chèns di éksito òf ku ta peligroso, basta tin un hende ku kier paga e kuenta.

Tambe bo mester konsiderá e konsekuensianan riba término largu. Por ehèmpel, loke bo ta haña masha mahos ora bo tin 16 aña lo por parse kompletamente diferente ora bo tin 21 aña. Segun Dr. Urs Bösch, un siruhano estétiko: “Komo regla general, no mester hasi operashon kosmétiko pa tinernan. Ta durante e temporada ei e forma di kurpa di un tiner i su noshon di su mes kurpa ta kambia.” Ademas, tin hopi chèns ku despues hóbennan tin mester di mas operashon pa drecha sierto problemanan. I segun ku bo kurpa ta krese, e sikatrisnan di un operashon kisas tambe ta krese.

Kalkulá e Gastu

Beibel ta konsehá nos pa kalkulá e gastu promé ku nos kuminsá un proyekto importante. (Lukas 14:28) Pa mayoria hóben, operashon kosmétiko no ta posibel mes pasobra e ta kosta muchu plaka. I e preis kisas no ta inkluí konsultanan despues di operashon ni e operashonnan ku lo tin mester pa drecha sierto problemanan.

Tin hopi hende ku a paga pa operashon no solamente ku plaka, sino tambe ku nan salú. Segun e Sosiedat Merikano di Operashon Plástiko Estétiko, e riesgonan di salú ta entre otro hinchamentu temporal, sikatrisnan permanente, pèrdè  heful i e abilidat di duna yu lechi na pechu, i asta pèrdèmentu di hopi sanger. Anna, por ehèmpel, kasi a muri ora el a laga chupa vèt (liposuction). El a keha: “Awor mi tin sikatris horibel i un hòl den mi barika.” Relashoná ku liposuction, un korant aleman a bisa: “Informenan di komplikashon serio, asta morto, ta oumentando.” No lubidá: “Operashon ta keda operashon, huntu ku tur su riesgonan,” segun e boletin Apotheken Umschau. P’esei, evaluá e riesgonan kuidadosamente promé ku bo disidí di hasi kualkier operashon, foral un operashon ku no ta médikamente nesesario.

Tambe lo bo por puntra bo mes: ‘Ki sorto di impreshon lo mi duna hende? Ku aparensia físiko ta mi promé prioridat? Kon mi desishon lo influensiá hóbennan mi pareu òf mi rumannan mas yòn?’ *

Bo Motibunan

Ta bon pa bo analisá seriamente pakiko bo kier operá. Kisas no ta fásil pa saka afó bon kla kiko ta bo motibunan. Por ehèmpel, lo bo por puntra bo mes: ‘Mi kier pa hende stòp di tenta mi konstantemente pa un karakterístika mahos? Òf ta pasobra mi kier ta orguyoso di mi aparensia? Mi deseo pa kambia mi aparensia ta bini dor di preshon di mi pareunan, propagandanan konvinsente òf dor di un artista popular di farándula? Mi ta purba alkansá e ideal ekstremo di beyesa ku medionan di komunikashon ta promové sinfin awendia?’

Tin hende ta kere ku dor di drecha nan aparensia nan por tin mas chèns di haña un kasá òf un bon trabou. Pero sea franko, ta tur hende kasá ku bo konosé ta bunita? Kiko di e aparensia di tur hende ku bo konosé ku tin un trabou? Nò, e kosnan ei no ta dependé kompletamente di un persona su aparensia personal. Ademas, un posibel kasá òf doño di trabou ku ta pone mas énfasis riba bo aparensia ku riba bo kualidatnan interior realmente ta bal e gastu i e riesgo di un operashon?

Segun ku bo ta analisá bo motibunan kuidadosamente, papia ku bo mayornan òf ku un amigu madurá di loke bo ta pensa. Si bo ta pensa ku un parti di bo kurpa realmente ta un problema, puntra nan kiko nan ta opiná onestamente. No djis bai tras di loke bo ta mira den spil. Relashoná ku e manera ku nos ta mira nos propio faltanan físiko, Nana a bisa: “Abo mes ta preokupá mas ku bo faltanan físiko ku otro hende, pasobra simplemente bo ta mira bo mes for di un otro punto di bista.” Investigadónan na Universidat Landau na Alemania a splika ku den hopi kaso hende ta pensa pa hasi operashon kosmétiko, “no pasobra un parti di e kurpa ta realmente desfigurá, sino mas bien pasobra e ta parse desfigurá den bista di e persona konserní.”

No tuma un desishon purá, sino evaluá tur faktor kuidadosamente. Mira tur operashon komo algu ku bo no por kambia bèk despues. Di tur manera, lo bo tin ku biba ku e resultadonan di e operashon pa un tempu.

Bo Beyesa di Mas Importante

Felisidat no ta bini di bo aparensia. Ounke aparensia por sea mehorá òf stroba rèspèt propio, loke realmente ta konta ta bo personalidat i aktitut. Despues ku Anna su bida tabata na peliger dor di e operashon, el a konkluí: “Mi a siña ku ser bunita no tin nada di hasi ku bo aparensia eksterior.”

Ounke Beibel ta papia faborabel di beyesa físiko, e ta mustra ku esei ta di segundo importansia kompará ku bunitesa spiritual: “Ser atraktivo ta engañoso i bunitesa ta banidat, ma un muhé ku ta teme SEÑOR, esei lo wòrdu elogiá.” (Proverbionan 31:30; 1 Samuel 16:⁠7) Si bo kultivá e punto di bista aki, lo bo por haña pas mental maske ku bo tin parti di bo kurpa ku bo no ta gusta.

Sin importá kiko bo disidí, kòrda ku aparensia perfekto i felisidat perfekto simplemente no ta alkansabel awor akí. Tur hende ta imperfekto den un manera òf otro. (Romanonan 3:23) Bo no por kambia esei. Loke sí bo por kambia ta e persona ku bo ta di paden, loke Beibel ta yama “e persona skondí di e kurason.” (1 Pedro 3:​3, 4) Refiná e persona ku bo ta dor di kultivá kualidatnan ku ta bunita den bista di Dios. Esei no tin ningun riesgo ni gastu finansiero, i e rekompensanan ta masha grandi!

[Nota]

[Komentario na página 19]

E “problema” na bo kurpa ta realmente un problema, òf bo tin ku kambia e manera ku bo ta mira bo mes?