Opservando Mundu

Ta Skapa Orkidia Úniko di Eksterminashon

Durante 50 aña e úniko orkidia lady’s-slipper (Cypripedium calceolus) ku tabata krese den mondi na Gran Bretania tabata bou di vigilansia 24 ora pa dia pa evitá su eksterminashon. Hende ku a biba durante e reinado di Reina Viktoria, i generashonnan despues, tabata gusta e bunita orkidia maron ku hel asina tantu, ku ya pa dékada di 1950 nan a piki tur te kasi kaba kuné. Ta un solo mata a keda. Spesialistanan di mata a purba produsí yu for di e mata aki na North Yorkshire, pero komo ku e no tabata floria ku masha frekuensia tabata imposibel pa fertilis’é na un manera natural. Sin embargo, na prinsipio di dékada di 1990, sientífikonan na Kew Gardens, Lònden, a deskubrí un método ku yama mikro fertilisashon. Via di e método aki nan a logra kultivá matanan nobo for di e simianan ku nan a haña dor di fertilisá e flornan na man. Despues nan a transferí e matanan aki na nan habitat natural di tereno di kalki, ku e resultado ku awor tin entre 200 pa 300 orkidia lady’s-slipper ta krese den nort di Inglatera. Tin un sitio ku ta habrí pa públiko, pero e otro lugánan ta keda sekreto pa sigurá nan protekshon, miéntras ku “sientífikonan ta sigui traha pa hasi nan sufisiente fuerte pa resistí pèst i beskein,” segun e korant The Independent di Lònden.

 Alérgiko pa Hende

“Hopi bestia ta alérgiko pa hende,” segun e korant aleman Leipziger Volkszeitung. E korant ta informá ku e Asosiashon Aleman di Alergia i Asma (DAAB) resientemente a anunsiá ku “kontakto ku hende ta kousa síntomanan típiko di alergia, manera kueru rebultá òf nistermentu konstante, den 1 di kada 20 bestia di kas.” Nan ta bisa ku den mayoria kaso e kousa ta hende su kaska di kueru morto ku ta kita i sushi di insekto di stòf ku ta kome kueru morto di hende. Si un bestia di kas ta blo grawatá òf lembe su mes òf ta ranka su lana miéntras ku e no tin pruga, esei ta un indikashon pa su doño ku e bestia ta alérgiko pa hende. I si e bestia su síntomanan ta kita ora e kambia di ambiente òf ora su doño no t’ei, esei lo ta un prueba mas. Nan a bisa ku kuminda i pollen di mata tambe por pone bestia haña alergia. Por ehèmpel, DAAB a ripará ku último añanan tin un oumento den e kantidat di kabai ku ta sufri di hooikoorts.

Kiko Ta Hasi Bo un “Berdadero Hòmber”?

“Mucha hòmbernan . . . ainda ta kere ku ora bo ta bon den deporte, ta bisti paña di sierto marka i ta evitá di sera amistat, bo ta mustra ku bo ta un ‘berdadero hòmber,’ miéntras ku si bo ta traha duru bo no ta ‘maskulino,’ ” segun e korant The Independent di Lònden. “Mucha hòmbernan ta respetá kompañeronan di skol ku ta dominante i ku ta papia hopi palabra malu. Tinernan ku no ta kumpli ku e patronchi ei ta kore e riesgo ku nan ta hasi ko’i abusu ku nan òf ta yama nan homoseksual.” Birkbeck College, ku ta parti di Universidat di Lònden, a hasi e enkuesta bou di mucha hòmbernan di 11 pa 14 aña na 12 skol di Lònden, i a sali na kla ku e mucha hòmbernan “a atmití ku nan ‘komportashon machista’ hopi bes a laga nan sinti nan mes isolá i ku miedu di ekspresá nan mes,” segun e korant. Profèser Stephen Frosh, kende a dirigí e investigashon, a bisa: “Mucha hòmbernan mester di mensahenan konvinsente ku ta bisa nan ku ser un hòmber no ta nifiká ser sin heful ni skonde bo sintimentunan.”

Krítika Kontra Krus Kòrá

Djis despues di e atakenan di 11 di sèptèmber, Krus Kòrá Merikano a drenta den akshon, pidiendo donashon di plaka i sanger. Hendenan a duna alrededor di 850 mion dòler merikano na plaka kèsh, i nan a kolektá 180.000 liter di sanger. Ounke e kolektanan a tuma lugá rápidamente, e repartishonnan sí nò. The Washington Times a deklará: “Krus Kòrá Merikano a tarda pa repartí e fondonan di ousilio entre e famianan afektá dor di e atakenan. . . . Nan tabata usa fondonan di ousilio pa programanan ku no tin nada di hasi ku 11 di sèptèmber.” Tambe un gran parti di e fondonan a ser destiná pa “nesesidatnan di término largu, manera [un] programa di fris sanger, guia sikológiko i pa atakenan den futuro.” Ya ku kasi no tabatin mester di e sanger kolektá i e echo ku por a ward’é pa 42 dia so, a pone ku e “no ta sirbi i mester kim’é,” segun e korant. Medionan di komunikashon a informá ku e hunta di direktiva di Krus Kòrá, debí na gran kantidat di krítika, a kore ku nan presidente i a anunsiá na fin di yanüari 2002 ku víktimanan di e desaster lo risibí 90 porshento di e fondonan kolektá promé ku 11 di sèptèmber 2002.

Desasternan Natural Mortal

“Desasternan natural a kousa por lo ménos 25.000 morto mundialmente na 2001, mas ku dòbel e kantidat di e aña anterior,” segun un informe di e agensia di notisia Reuters. Segun e kompania di reaseguradó mas grandi na mundu, Munich Re, e pérdidanan ekonómiko tabata un total di 36 mil mion dòler merikano⁠—⁠hopi mas ku e pèrdida ku a surgi dor di e atakenan di 11 di sèptèmber na Merka. Setenta porshento di e 700 desasternan prinsipal tabata tormenta i inundashon. Nan ta kulpa e kambionan kontinuo di e klima mundial pa e kondishonnan ekstremo di mal wer. “Kandela di mondi na Oustralia, inundashon na Brazil i na Turkia, káos di sneu na Europa sentral i sur i un siklon na Singapur, ku segun meteorólogonan tabata imposibel, ta indiká ku tin un konekshon entre e kambionan di klima i e kantidat kresiente di katástrofe kousá dor di mal tempu,” segun e kompania. Nan a komentá ku 2001 tabata e di dos aña mas kayente for di tempu ku hende a kuminsá tene registro di esei 160 aña pasá. Temblor a kousa mayoria morto⁠—⁠mas ku 14.000 na yanüari so, komo resultado di un temblor ku a tuma lugá na India. Na tur nan a konta 80 temblor grandi aña pasá.

Faha di Siguridat Patras Ta Salba Bida

“Pasaheronan sintá patras den outo ku no ta mara nan faha ta pone okupantenan sintá dilanti i ku tin nan faha mará kore un riesgo ku ta sinku biaha mas grandi di ser matá den un aksidente,” segun e korant The Guardian di Lònden. Den un análisis di e registronan di mas ku 100.000 aksidente di outo na Hapon durante un periodo di sinku aña, investigadónan na e Universidat di Tokio a deskubrí ku kasi 80 porshento di morto di okupantenan sintá dilanti ku nan faha mará por a ser evitá si pasaheronan sintá patras a usa nan faha di siguridat. Den un aksidente, pasaheronan ku no tin faha mará ta ser bentá dilanti ku asina un forsa ku e okupantenan dilanti ta kore un riesgo hopi mas grandi di ser leshoná seriamente òf asta di ser plèchá mata. Ounke na Gran Bretania for di 1991 ta obligatorio pa mara faha di siguridat ora un hende sinta patras den outo, enkuestanan ta mustra ku rònt di 40 porshento di adulto ainda no ta hasi esei.

Peliger di Kontaminashon di Aire na Asia

“Na India, mas ku 40.000 hende ta muri tur aña debí na kontaminashon di aire,” segun e revista ambiental Down to Earth. Investigashon dirigí dor di Banko Mundial i e Instituto di Medioambiente di Stockholm a mustra ku kontaminashon di aire na Asia ta surpasá esun di Europa i Amérika huntu, i ta responsabel pa míles di morto na Seúl, Beijing, Bangkok, Djakarta i Manila. Por ehèmpel, na Manila mas ku 4.000 hende ta muri tur aña di malesanan respiratorio, miéntras ku 90.000 ta sufri di bronkítis króniko severo. E porsentahe di mortalidat ta asta mas haltu na Beijing i Djakarta. Nan ta atribuí e problema na “uso di gasolin di mal kalidat, métodonan inefisiente di produsí energia, uso di vehíkulonan den mal estado i tráfiko blòkiá,” segun e revista.

Sakando Probecho di e Kambio pa Euro

Ku e kambio pa euro, Iglesia Katóliko di Italia a “probechá di e okashon di e morto di lira pa remediá e eskases di limosna” dor di “hasi su preisnan un suma será,” segun Corriere della Sera. E vikariato di Roma a manda un komunikado pa tur su parokianan pa nan “drecha e ‘lista di preis.’ E kontribushon pa hasi un misa, ku ántes tabata 15.000 lira, a bira 10 euro (19.363 lira). E kontribushon máksimo pa un kasamentu, ku ántes tabata 450.000 lira, a bira 270 euro (523.000 lira).” Sin embargo, e komunikado ta spesifiká ku “e sifra aki ta referí na seremonia di kasamentu pa hende ku ‘no ta parokiano,’ miéntras ku parokianonan mes ta disidí kuantu nan ta duna, meskos ku pa boutismo i entiero.” Asina mes, pastornan di parokianan na Roma ainda ta konfrontá e problema ku hopi bes nan ta haña e kahanan di kolèkt hopi bashí, kisas komo resultado di “un sierto golosidat pa plaka bou di e fielnan, kombiná ku un bahada den e kantidat di hende ku ta bai misa,” segun e korant.