Ora Mèrdia Bira Skur

DI E KORESPONSAL DI SPIÈRTA! NA ANGOLA I ZAMBIA

‘MÈRDIA skur? Imposibel!’ kisas tin hende ta bisa. Esei no solamente ta posibel sino ku e ta sosodé vários biaha durante kada dékada: ki ora ku tin un eklipse solar total. Kiko ta kousa un eklipse solar, i dikon esei ta un bista asina espektakular? Pa un kontesta, laga nos kuminsá ku luna.

Bo sa kon luna ta kambia di aparensia segun ku e ta drei rònt di tera? Ora luna ku solo ta na e dos bandanan opuesto di mundu, nos ta mira loke nos ta yama luna yen sali na ost segun ku solo ta baha na wèst. Segun ku dianan ta pasa, luna ta sali kada anochi mas lat, krusando shelu pokopoko den e direkshon di solo ku ta sali. E parti kla di luna gradualmente ta bira mas chikí, i ku tempu bo ta mira djis un media luna. Ora luna ta den shelu henter dia huntu ku solo, asta e media luna ta disparsé i e luna, ku su parti skur kara pa tera ta kasi invisibel. Esaki nan ta yama luna nobo. Kaba e proseso ta bòltu, i luna gradualmente ta hala for di solo i finalmente ta bolbe bira luna yen. E siklo aki ta ripití su mes aproksimadamente kada 28 dia.

E faktor desisivo pa eklipse solar ta luna nobo. Normalmente e ta djis pasa dilanti di solo den dia sin ku nos ta ripará, pasobra nan órbita no ta riba mesun plano. Pero de bes en kuando, solo, luna i tera ta presis riba e mesun liña. E ora ei e sombra di luna ta kai riba tera i ta kousa un eklipse.

Eklipsenan solar ta resultado di un relashon úniko entre solo, luna i tera. Solo tin un tamaño inmensamente grandi; su diameter ta mas o ménos 400 biaha mas grandi ku di luna. Pero remarkablemente solo ta mas o ménos 400 biaha mas leu for di nos ku luna. Komo resultado di esei, pa nos riba tera, solo ku luna ta parse di ta kasi mes grandi. Pues, tin biaha por parse ku luna ta tapa solo.

Pa por tin un eklipse solar total, solo, luna i tera no solamente mester ta presis riba e mesun liña sino tambe nan mester hasi esei ora luna ta na e parti di su órbita ku ta mas serka di tera. * Na okashonnan asina, e punta di luna su sombra, forma di papurèshi, ta produsí skuridat riba un área smal di e superfisie di tera.

Den kaso di e eklipse total di 21 di yüni 2001, e sombra tabata te ku 200 kilometer hanchu. E ruta di e skuridat lo a kuminsá ora solo sali n’e kosta ost di Suramérika i a pasa over di Oséano Suratlántiko, kaminda lo el a alkansá su durashon máksimo di sinku minüt. Despues di pasa over di Angola, Zambia, Zimbabwe i Mozambique, lo el a terminá ora solo baha na kosta ost di Madagaskar. Laga nos wak ki impreshon opservadónan na Angola i Zambia tabatin di e espektákulo selestial aki.

Preparashonnan pa e Suseso

Yen di ekspektativa, investigadónan profeshonal, astrónomonan amatùr i hopi otro  hende mas a basha bai Áfrika pa e promé eklipse total di e milenio nobo. Komo ku Lusaka, Zambia, tabata e úniko kapital riba ruta di e eklipse, hopi bishitante a bai einan pa opservá e suseso.

Esaki kisas tabata e atrakshon turístiko mas grandi ku hamas Zambia tabatin. Djis un par di dia promé ku e eklipse, Lusaka a yena ku míles di bishitante. Lunanan di antemano hende a hasi preparativo pa e suseso. Hotèlnan, penshonnan, sitionan pa kamper i kasnan privá tabata yen di buk, akomodando e kantidat di bishitantenan.

Sitionan pa opservashon públiko tabata entre otro e aeropuerto di Lusaka, kaminda bishitantenan por a yega mainta, wak e eklipse i despues bai bèk anochi. Simannan largu televishon ku radio a anunsiá e espektákulo binidero, spièrtando bes tras bes pa e peliger di wak stret den solo. Benta di brelnan spesial pa wak solo a surpasá tur ekspektativa, i hopi tienda a bende tur loke nan tabatin na stòk.

Sin embargo, e promé kaminda ku e eklipse lo a yega e kontinente afrikano tabata na Sumbe, un stat kantu di kosta na Angola. Einan opservadónan lo por a mira un eklipse total di kuater minüt i mei, e durashon mas largu visibel riba tera seku.

Lunanan promé ku e eklipse, nan a pone na e kapital di Angola, Luanda, i na otro statnan prinsipal, bòrchinan grandi kantu di kaminda ku ta anunsiá e eklipse i ta spièrta hende pa su peligernan. E sombra di luna lo a pasa meimei di e pais, di manera ku henter Angola lo a mira por lo ménos un eklipse parsial pero kasi total. Luanda lo a mira 96 porshento di solo tapá. Gobièrnu, den koperashon ku kompanianan privá, a hasi areglo pa importá i parti miónes di brel spesial pa wak solo. Nan a duna hopi brel grátis na hende pober.

E sentro di Angola su aktividatnan di eklipse tabata Sumbe, situá na un bunita área plat kantu di kosta, entre Oséano Suratlántiko i e plateau sentral di Angola. E área di Sumbe a keda di spar di e pió konfliktonan ku a destrosá Angola, di manera ku bishitantenan a topa un stat intakto di aproksimadamente 25.000 habitante, kendenan ta hende amigabel, kordial i spontáneo. Pa akomodá tur e bishitantenan, nan a prepará mas fasilidat pa hospedá turista i a drecha e planta di koriente lokal. Tambe nan a organisá un workshop spesial tokante eklipse pa sientífikonan, ministernan di gobièrnu i trahadónan humanitario di Angola i otro paisnan. Nan a lanta un plataforma grandi kantu di laman pa tene un show na un eskala nunka bisto na Sumbe.

E Dia Grandi Ta Yega

Un di e benefisionan di opservá e eklipse na Angola tabata ku na yüni wer ta hopi seku. Pero imaginá bo e konsternashon ku a reina ora ku un dia promé ku e eklipse, shelu a lanta tur nublá den e área di Sumbe! Henter anochi te ku e siguiente mainta, e stat tabata tapá bou di un klechi diki di nubia. Hende lo a keda ku gana di wak e eklipse? Den transkurso di mainta e nubianan a kuminsá hala kita, i na final di mainta shelu tabata blou i sin un nubia. Esta un alivio! Na Zambia tambe tur hende tabata preokupá ora ku mainta a habri ku un shelu shinishi, tur nublá. Pero einan tambe shelu a klara nèt na tempu. Skucha e relato di hendenan ku a para mira e suseso tuma lugá.

Angola: “Nos a skohe pa opservá e eklipse for di un punta haltu ku tin bista riba laman. Segun ku e ora tabata yega, multitut di hende a reuní kantu di laman i na e sitionan di opservashon ku nan a prepará pa wak e suseso. Banda di 12 or di mèrdia, ora ku e eklipse tabata a punto di kuminsá, hopi hende a bisti nan brel protektivo i kuminsá wak si nan ta mira kon luna ta bai tapa solo. Djis despues di 12 or e eklipse a kuminsá. Ku vèrekeiker òf un teleskop, bo por a mira vários mancha pretu riba superfisie di solo. Opservadónan a mira kon sombra tabata tapa e manchanan aki un pa un. Segun ku e eklipse a progresá, bo por a sinti kon e temperatura ta baha i klaridat a kuminsá haña un koló straño. Finalmente, segun ku e sombra di luna a tapa e último pida di solo, a bira skur manera anochi.”

Zambia: “E ofisina di sukursal di Testigunan di Yehova na Zambia, situá na Makeni, Lusaka, tabata na un lugá ideal pa wak e eklipse total di  solo. Ora tabatin 3:07 di atardi, luna a kuminsá tapa solo. Strepinan di sombra a pasa riba muraya di edifisionan, i nan tabata move manera ola di laman. Bientu a baha, i paranan a stòp di kanta. Bestianan di mondi a kuminsá prepará pa bai drumi anochi. Ora tabatin 3:⁠09, un par di sekònde promé ku e eklipse total, bo por a mira solamente un par di punta ta lombra di solo, manera un kadena di pèrla, despues un punta so. Nan ta yama e fenómeno aki “pèrlanan di Baily,” i esun punta so, renchi di djamanta. * Despues di esei bo ta haña un bista di e esfera di koló di solo, un flèsh kòrá-ros, anto e eklipse ta total i ta bira skur!”

Angola: “E efekto impreshonante di e renchi di djamanta a kousa un gran reakshon serka e públiko. Anto, 1:48 p.m. ora lokal, e eklipse total a kuminsá. E reakshonnan tabata hopi variá. Tin hende tabata drùk ta saka potrèt. Otronan tabata grita den koro: ‘Total! Total! Total!’ Tambe tabatin hende ku a kuminsá flùit i grita di asombro ora ku mèrdia a bira skur manera anochi. Solo su atmósfera tin un temperatura di miónes di grado Celsius, i bo por a mira loke a parse manera stom òf huma di e kayente ta sali bai den tur direkshon pa forma e korona òf halo. Nos por a mira gas kayente ta bria tur rònt di e sírkulo skur di luna. Diripiente, komo si fuera tempu a bula bai dilanti, e eklipse total a pasa i un rayo di solo a bria for di otro banda di e sombra.

Segun ku e solo a kuminsá bira visibel atrobe, nos a mira e manchanan di solo ku anteriormente e sombra a tapa, ta sali un pa un for di skuridat. I pokopoko solo a bolbe haña su forma rondó bèk.”

Zambia: “Akinan e durashon di e eklipse total tabata 3 minüt i 14 sekònde, pues nos tabatin tempu pa apsorbá e suseso impreshonante. Tabata skur, pero tabatin un brio na horizonte.  Ounke shelu ainda tabata blou, bo por a mira planetanan ku normalmente klaridat di solo ta tapa; por ehèmpel nos por a mira Yupiter i Saturno komo puntanan di lus briante. Kisas e aspekto mas espektakular di e eklipse tabata e korona di solo. El a aparesé manera un brio blanku-ros rònt di un sírkulo pretu. Opservadónan a keda fasiná i a deskribié komo ‘simplemente asombroso, magnífiko.’ Gradualmente luna a pasa forbei, revelando pokopoko e kara di solo i permitiendo e rayonan di solo yega tera sin estorbo. Pa 4:28 p.m. e eklipse a kaba!”

Lèsnan for di e Eklipse

Hopi hende a bisa despues di e eklipse ku e eksperensia ei a konmové nan. Na Angola, un señora a bisa ku kasi el a kuminsá yora. Un otro persona a reflekshoná riba e bunita regalo ku Dios a perkurá. I unu a bisa ku ta solamente un Kreadó amoroso lo a perkurá e espektákulo aki pa asina hende por apresiá e beyesa inkreibel di solo komo e fuente di energia di tera.

Tabata bisto ku hopi hende na Áfrika tin gran rèspèt pa e Kreadó i pa Beibel. Ora ku Testigunan di Yehova den e stat di Sumbe a papia ku otro hende tokante e eklipse i a menshoná ku esaki tabata solamente un di e obranan maravioso di Yehova, nos Kreadó, e habitantenan a mustra hopi interes pa papia tokante e asuntu. Hopi di nan ku smak a aseptá ehemplarnan di un Toren di Vigilansia resien ku a papia di e obranan maravioso aki.

E suseso selestial aki a yuda miónes di hende lubidá nan problemanan pa un par di minüt i konsentrá riba algu realmente animante i impreshonante. Despues di a mira rasgonan glorioso di solo ku normalmente ta invisibel, algun hende a pensa riba e gloria invisibel pero asta mas maravioso ainda di e Kreadó di solo, Yehova Dios.

[Nota]

[Diagram na página 21]

(Pa e teksto den su formato kompleto, wak e publikashon)

→ →

Solo → Luna ⇨ Zona skur ⇨ Tera

→ →

[Rekonosementu pa Potrèt na página 21]

© 1998 Visual Language

[Plachinan na página 23]

Pèrla di Baily

Eklipse total

Renchi di djamanta

[Rekonosementu pa Potrèt na página 23]

Kortesia di Juan Carlos Casado, www.skylook.net

[Plachi na página 23]

Opservadónan di e eklipse na Lusaka, Zambia