E Punto di Bista Bíbliko

 Orashonnan Ku Dios Ta Skucha

“[Sigui] pidi, i lo wòrdu duná na boso; [sigui] buska, i boso lo haña; [sigui] bati, i lo wòrdu habrí pa boso. Pasobra ken ku pidi, ta risibí; i esun ku buska, ta haña; i pa esun ku bati, lo wòrdu habrí.” ​—⁠LUKAS 11:​9, 10.

DEMOSTRANDO pleno konfiansa den e palabranan di Hesukristu sitá ariba, hopi kristian ta akudí na Dios den orashon ku nan problemanan i ansiedatnan, ku e siguransa ku Dios stima nan i ta perkurá pa nan. Sin embargo, tin hende ta kuminsá sinti nan mes frustrá segun ku nan ta warda pa Dios kontestá nan orashonnan. Abo ta sinti ku bo orashonnan no ta logra nan meta? Dios ta skucha ora bo ta hasi orashon?

Asta si ta parse ku Dios no ta kontestá nos orashonnan, esaki no kier men ku e no a tende nan. Beibel ta sigurá nos: “E wowonan di SEÑOR ta riba e hustunan, i su oreanan ta atento pa skucha nan orashon.” (1 Pedro 3:12) Pues Yehova Dios ta tende e orashon di hende hustu, sea ku nan ekspres’é na bos haltu òf den nan kurason. (Yeremías 17:10) Tambe Yehova ta eksaminá e pensamentu- i sintimentunan ku tin tras di kada orashon, sintimentunan ku kisas ni esun ku ta resa no ta komprendé plenamente òf no ta konsiente di dje.​—⁠Romanonan 8:​26, 27.

Pero pa orashonnan ta aseptabel pa Dios nan mester kumpli ku sierto rekisito. Na promé lugá, nan mester ta dirigí eksklusivamente na Dios, no na Hesus, ni na un “santu” ni un imágen. (Éksodo 20:​4, 5) Tambe mester hasi orashon den nòmber di e Yu di Dios, Hesukristu. (Huan 14:⁠6) Esaki kier men ku Hesus ta tende nos orashon promé anto kaba e ta pasa e mensahe pa Dios? Nò. Mas bien, dor di hasi orashon na Yehova den nòmber di  Hesus, nos ta identifiká nos mes komo disipel di Kristu i nos ta rekonosé ku ta solamente pa motibu di su reskate nos por aserká Dios.​—⁠Hebreonan 4:​14-16.

Nos mester hasi orashon ku fe. Apòstel Pablo a indiká: “Sin fe ta imposibel pa agradá [Dios], pasobra esun ku bin serka Dios mester kere ku e ta, i ku e ta esun ku ta rekompensá esnan ku ta busk’é.” (Hebreonan 11:⁠6) Kon un hende por sa si e tin e klase di fe ei? E eskritor bíbliko Santiago ta kontestá: “Ami lo mustra bo mi fe pa medio di mi obranan.” (Santiago 2:18) Sí, fe ta produsí akshon, i e akshonnan ei na nan turno ta mustra ku nos stima Dios i ta purba agrad’é.

Tambe adoradónan di Dios mester ta persistente ora nan ta hasi orashon. Hesus a mustra esaki bon kla den e teksto di Lukas 11:9 i 10 sitá den introdukshon, kaminda e verbo griego original ta indiká akshon kontinuo. Al fin i al kabo, si un persona resa djis un solo biaha tokante un asuntu, esei no ta mustra ku e no ta realmente serio ku su petishon?

Loke Dios Ta Primintí

Sin importá ku kuantu frekuensia i sinseridat nos ta resa, nos ta bibando ainda den “tempunan trabahoso.” (2 Timoteo 3:⁠1) Ounke ta sierto ku Hesus a bisa ku su siguidónan lo ta felis, e no a bisa ku nan bida lo ta sin problema. (Mateo 5:​3-11, Beibel na papiamentu koriente) El a bisa ku su disipelnan lo por ta felis apesar di ta yora, pasa hamber i set òf sufri persekushon.

Pa nos logra e felisidat ku Hesus a papia di dje no ta nesesario pa nos tin sirkunstansianan ideal. Mas bien, e felisidat ei ta un satisfakshon interno ku nos ta sinti pasobra nos ta sirbi Dios. Pues, nos por alkansá un grado di felisidat asta ora nos ta den yen di problema.​—⁠2 Korintionan 12:​7-10.

Kon pa Trata ku Problemanan Personal

Pues anto, ta pòrnada nos ta resa na Dios tokante kosnan personal, manera kon pa haña un bon kasá òf kon pa trata ku problemanan di famia, di salú òf di empleo? Nò. Pasobra maske Dios no ta primintí di kambia e sirkunstansianan di nos bida milagrosamente, lo e duna nos e sabiduria pa manehá nan ku éksito. Santiago a skirbi en konekshon ku prueba: “Si kualkier di boso falta sabiduria, lag’é pidi Dios, kende ta duna na tur hende generosamente i sin reproche, i esaki lo wòrdu duná na dje.” (Santiago 1:⁠5) Pues mediante su spiritu santu, Yehova lo guia nos. Esaki lo yuda nos komprendé prinsipionan bíbliko i apliká nan ora di tuma desishon.

Klaru ku no ta Dios su spiritu ta tuma desishon pa nos. Al kontrario, nos mester hasi esfuerso personal. Por ehèmpel, si nos tin un problema, nos a hasi investigashon relashoná kuné, analisá e vários aspekto- i elementonan di e situashon? Esaki lo ta un obra ku ta mustra Dios ku nos tin fe. (Santiago 2:18) Nos ta persistí pa purba solushoná nos problema dor di pidi Dios su guia kontinuamente? (Mateo 7:​7, 8, NW ) Nos a eksaminá kuidadosamente e prinsipionan bíbliko ku ta apliká na e situashon? E Palabra di Dios por hasi nos “kualifiká i bon prepará pa hasi tur sorto di bon obra.”​—⁠2 Timoteo 3:​16, 17, BPK.

Ounke ta bèrdat ku Dios por intervení den asuntunan di hende i eliminá tur nos problemanan, el a permití nos ekspresá nos boluntat liber. Lamentablemente, hopi hende ta usa nan boluntat liber pa kousa daño na otronan. P’esei algun problema ku nos ta hasi orashon tokante dje lo por sigui te ora Dios su mundu nobo yega. (Echonan 17:​30, 31) Kisas ta un situashon ku ta eksistí den e área kaminda nos ta biba, por ehèmpel kriminalidat òf guera; òf kisas nos tin ku perseverá bou di difikultatnan ku opositornan ta kousa. (1 Pedro 4:⁠4) Nos tin ku rekonosé ku den e mundu malbado aki, tin situashon ku lo no drecha.

No opstante, Dios stima su adoradónan i e kier yuda nan. Ora su Reino ta ehersé pleno dominio riba tera, lo e eliminá tur e problemanan horibel di e mundu aki. (Revelashon 21:​3, 4) Tanten, nos tin ku sigui pidi pa su guia pa nos por trata ku e problemanan di bida. Si nos hasi esei, nos por tin sigur ku Yehova lo kumpli ku su promesa ku tin pará skirbí den Beibel na Isaías 41:10: “No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.”