Pasa un Man di Fèrf

UN LUGÁ resien di fèrf ta duna bo un gran satisfakshon. Den un kamber ku ta parse sushi òf ku a pèrdè koló, un man di fèrf por hasi un gran diferensia. Lo bo kier duna bida na un òf dos kamber den bo kas? Si nunka bo mes no a purba fèrf, kisas lo bo haña esei mas fásil di loke bo a pensa!

Ban traha huntu ku Fernando, ku su kasá Dilma i nan yu muhé di ocho aña, Vanessa, miéntras ku nan ta bai fèrf un parti di nan kas. Despues di esei, podisé nos mes lo ta mihó kualifiká pa fèrf. Pero promé ku nos bisti nos pañanan pa bai fèrf, laga nos siña un poko tokante kon pa skohe koló.

Kon pa Skohe Koló

Ta importante pa skohe koló di fèrf kuidadosamente. Koló por hasi hopi mas ku realsá beyesa di bo kas. E por tin asta un  efekto riba bo beis. Kolonan bibu i lombrante ta eksitá bo mas, miéntras ku kolónan suave ku no ta lombra tin mas chèns di relahá bo. Un koló por parse skur ora bo fèrf e riba un muraya den kas, pero e mesun koló por parse mas kla parti pafó. Fernando ku Dilma a skohe un koló hel-oro i off-white pa nan kas. Despues nos lo mira unda nan ta usa nan.

Tuma nota di e wil òf sírkulo di koló ariba. Kolónan ku ta direktamente opuesto di otro riba e wil ta ser yamá kolónan komplementario. Nan ta parse mas intenso ora pone nan banda di otro. Si bo kier un areglo di koló mas konservativo i no dje tribí ei, skohe vários tono di e mesun koló. Nan ta yama esaki un skema di koló monokrómátiko.

Promé ku nos amigunan kuminsá fèrf, nan tin algun pregunta. Fernando kier sa ki tipo di fèrf nan mester usa, i Vanessa ta puntra kon ta traha fèrf. Pues, ta parse nos un bon idea pa bai bishitá e fábrika lokal di fèrf pa wak ku nos por haña un kontesta.

Kon Nan Ta Traha Fèrf

Gerard, doño di e fábrika, a bai di akuerdo pa duna nos un tour. Un di e promé kosnan ku nos ta mira ora nos drenta e fábrika di fèrf ta un mekser masha grandi mes ku tabata drei un pasta pegagoso ku tabatin den un baki di 800 liter. Gerard ta grita den tur e bochincha: “Traha fèrf ta meskos ku traha bolo: mester pisa tur ingrediente anto kaba meskla nan huntu.”

“Pero kiko ta e resèpt pa produsí fèrf moderno?” nos ta puntra.

“Tin kuater ingrediente básiko,” Gerard ta kontestá. “Komponente di koló (pigmènt), komponente pa mara, líkido i otro komponentenan spesial. E fèrf ku boso ta mira den e baki aki tin titaanwit komo su base. Awendia nan ta koba e pigmènt blanku aki saka for di den tera i ta us’é den fèrf moderno na lugá di chumbu.” E meskla ta parse hariña di pan.

Gerard ta sigui bisa: “Nos ta bati e meskla aki te ora e bira un pasta fini huntu ku un tiki di e komponente pa mara, ku den e kaso aki ta hars akríliko. Ora e trahadó di fèrf ta satisfecho ku e konsistensia, lo e agregá e sobrá hars, kaba líkidonan manera awa òf disolvente (thinner), i por último otro komponentenan spesial.”

Nos kier sa ki sorto di fèrf nos lo tin mester pa kas. Nos guia ta splika: “Tin dos tipo básiko di fèrf pa kas. Fèrf di zeta, ku ta usa zeta manera di linasa òf di soya modifiká komo komponente pa mara e fèrf; i fèrf di awa, ku ta usa hars di vinil òf hars akríliko pa mara e fèrf. Fèrf di zeta lo seka hopi duru, pues nan ta bon pa kaminda hopi hende ta pasa òf mishi, manera pa porta i leshi òf rantnan di palu. Sin embargo, fèrf di zeta tin tendensia di bira hel i kuminsá kaska despues di tempu. Di otro banda, bon kalidat di fèrf di vinil òf fèrf akríliko ta keda ku nan koló original pa mas tempu i nan tin un holó ménos stèrki. Fèrf pa pafó, 100 porshento akríliko, tambe lo wanta mihó e kayente di un zomer oustraliano òf e friu di un wenter kanades.”

Nos ta spera ku nos por kòrda tur e kosnan ku Gerard a siña nos. Pero ainda e tin un par di kos mas di konta nos: “Tur dos tipo di fèrf tin kuater nivel básiko di brio: lombrá, satin, tiki brio, sin brio. Lombrá ta mihó pa usa kaminda bo mester di un superfisie ku no ta daña òf gasta lihé dor di uso konstante (manera man di trapi, kashi). Satin  ta bon pa baño i gang. Un akabado ku tiki brio òf mat ta bon pa kamber i sala, i fèrf sin brio ta mas práktiko pa plafòn.” Nos ta yama Gerard danki pa e tour instruktivo i ta bai kas pa kuminsá ku e parti mas difísil di nos proyekto: prepará e superfisienan ku mester fèrf.

Preparashon Kabal Ta Esensial

Kon bunita un lugá ta keda di fèrf i pa kuantu tempu, ta dependé di kuantu preparashon bo ta hasi promé ku bo kuminsá fèrf. Pues ta tempu pa pone man na obra i kuminsá prepará pa poko trabou duru. Kisas nos por siña algun kos útil segun nos ta traha. Fernando tin dos proyekto na mente: fèrf e komedor i e kurá dilanti. Laga nos kuminsá promé ku e komedor.

Despues di saka tur muebel for di den komedor, nos ta pone algun laken bieu riba flur. Promé nos tin ku skür e kaskanan di fèrf bieu for di e kozein di bentana, di e leshinan i di e plafon. Nos lo yuda Fernando ku e trabou ei. Tuma nota ku e ta pone su trapi kaminda e flur ta pareu. Ademas, lo e sòru pa nunka e para riba e tree te ariba di e trapi, pasobra e ora ei lo e tin hopi mas chèns di kai for di e trapi. E murayanan di pleister ta den hopi bon kondishon, pero tòg lo mester laba nan ku awa i habon promé ku por fèrf nan.

Kaba, nos ta usa un ko’i raspa pa kita material ku ta lòs den kualkier nachi ku tin, pa despues yena nan. Nos lo usa un seal akríliko pa tapa buraku i nachi ku tin rònt di e bentana i rònt di e leshinan abou ya ku e filler aki ta keda fleksibel i por soportá e movementu ku tin entre e palu i kaminda ta di pleister. Despues, segun ku Vanessa ta laba e hèrmèntnan ku nos a usa pa yena nachi, nos lo skür e superfisienan di palu i e murayanan, usando un skürpapir ku no ta muchu gròf. Esaki lo kita tur klòmpi chikí ku tin i tambe lo hasi e superfisie un poko gròf di manera ku e mannan di fèrf ku nos pasa lo pega mas firme.

Dikon nos tin e maskernan prèt bistí? Wèl komo un medida di prekoushon, pa evitá ku fèrf i stòf di semènt ta iritá nos garganta. Nos brel protektivo tambe no ta parse masha den stail, pero ora nos ta fèrf na laira, nan lo protehá nos wowonan kontra sushi ku ta kai. Nos mester ta èkstra kouteloso ora di kita fèrf di  chumbu. (Wak e kuadro “E Menasa di Chumbu” riba e página aki.)

Por último nos ta pasa un basora suave pa kita tur stòf den komedor. Awor mester pone sea gròntfèrf òf praimer riba e palunan ku no tin fèrf i tambe kaminda a drecha e murayanan di pleister promé ku kuminsá fèrf mes-mes. Esaki ta laga e último kapanan di fèrf seka ku un brio igual en bes di sak den e palu kaminda a skür pa drecha e palu òf kaminda tin fèrf bieu. Una bes nos ta kla ku e praimer, e komedor ta prepará i nos por kuminsá fèrf mes.

Nos a ripará ku e kurá ta trahá di palu sin fèrf. Despues di duna e kurá un bon limpiá, nos lo tin ku tapa tur e kabesnan di klabu ku un praimer di metal. Esaki lo evitá ku mancha di frus ta pasa dor di e fèrf despues. Komo ku e kurá ta eksponé na e aktividatnan di wer, nos lo pasa dos pa tres man di fèrf akríliko riba dje.

Wèl, esaki ta sufisiente pa un dia. Awor ku nos ta kla ku tur nos preparashonnan, mayan nos por kuminsá fèrf mes.

Nos Ta Kuminsá Usa e Kuashinan

Awe nos lo kuminsá kosechá e rekompensanan di e trabou duru di preparashon ku nos a hasi ayera. Promé ku tur kos, nos tin ku hasi sigur ku e fèrf ta bon di drei promé ku kuminsá us’é. Ya nos a brua djis un tiki awa, mas o ménos 5 porshento di e volúmen, den e fèrf akríliko pa muraya. Esaki ta yuda e fèrf flui mas fásil for di e kuashi. Pero nos tin ku tene kuidou pa nos no pone muchu awa, sino e fèrf ta bira muchu delegá i lo bo mira e koló bieu bou di e esun nobo. Pa rant di e murayanan i pa plafòn, nos tin pensá di usa un kuashi hanchu. Anto pa fèrf superfisienan grandi nos lo usa e ròlnan. Esaki lo hasi e trabou bai mas lihé. *

Nos tin ku kòrda kita e fèrf di mas for di e kuashi na un solo banda di e bleki fèrf i laga e man sosegá na e banda limpi ya asina ni e man di kuashi ni nos mannan no ta keda tur na fèrf. Por último, nos tin ku apliká e regla: “Traha di ariba bai abou.” Esaki ta nifiká ku nos lo kaba ku plafòn promé ku nos kuminsá ku e murayanan. Ya ora kaba nos tin ku djis limpia kualkier mancha di fèrf for di e leshinan ku un paña muhá i fèrf e leshi ku e fèrf di zeta lombrante ku nos a skohe. Tur hende a hasi un bon trabou! E murayanan hel suave i e leshinan off-white a keda bunita.

Awor ban pa e kurá dilanti. Pa esaki nos tin pensá di usa un kuashi grandi pa apliká e fèrf di awa riba e kurá di palu. Tres man di fèrf mester ta sufisiente. Mester di mas o ménos un ora pa kada man seka bon, pues nos lo kaba djis promé ku bira skur. Laga nos kuminsá.

Promé, nos ta muha e kabeinan di e kuashi papa muhá ku awa i ta sagudí e awa di mas. Esaki ta oumentá e kuashi su kapasidat di chupa e fèrf i ta evitá ku e fèrf ta seka riba e kuashi. Nos ta pone hopi fèrf riba e kuashi i ta pasa man largu i firme. En bes di dòp riba e palu, nos lo konsentrá pa “pusha” e fèrf bon den e palu.

Esta bon! Nos a kaba di pasa e di tres man nèt ora solo a kuminsá baha. E kurá ta parse nobis-nobis! Nos ta eksaminá nos trabou. E dos dianan ei di labor a bale la pena. Esta un kambio grandi! Ta dushi ora bo drecha e aparensia di bo kas ku un man di fèrf.

[Nota]

[Kuadro/Plachi na página 26]

Tepnan pa Vense Algun Problema Komun

▪ BESKEIN: Laba kaminda bo kier fèrf ku un meskla di blich ku awa. E awa mester ta kuater biaha mas tantu ku e blich. Usa hanskun i brel protektivo. Bolbe pasa un man di un bon fèrf akríliko, ya ku beskein ta krese mas fásil riba fèrf di zeta. Si tin disponibel, agregá un produkto pa mata beskein.

▪ AWA I OTRO MANCHANAN: Drecha kaminda ta lèk òf kita e kousa di e mancha. Laba kaminda mester fèrf ku awa ku habon. Pasa un man di praimer òf shellac (un tipo di vèrnis) ku ta kontené un protekshon kontra mancha, kaba pasa un kapa di gròntfèrf.

▪ SUPERFISIENAN MANERA PUIRU: Kita tur stòf. Apliká un man di seal ku ta seka pokopoko. Seal di zeta sa penetrá i mara e partíkulanan mas mihó ku seal di awa.

[Kuadro na página 27]

E Menasa di Chumbu

E Agensia di Protekshon di Medioambiente di Oustralia ta bisa lo siguiente den e foyeto chikí Lead Alert​—⁠Painting Your Home? (Kuidou ku Chumbu​—⁠Bo Ta Bai Fèrf Bo Kas?)

▪ Asta nivelnan relativamente abou di chumbu den sanger por afektá e desaroyo intelektual i komportashon di mucha chikí.

▪ Foral pa mucha bou di sinku aña e riesgo ta grandi, ya ku nan sistema nervioso ainda ta desaroyando. Mucha chikí ta apsorbá te ku 50 porshento di e chumbu ku drenta nan kurpa, miéntras ku hende grandi ta apsorbé rònt di 10 porshento.

▪ Si un mucha kome pida kaska di fèrf ku tin chumbu aden tamaño di un pünès, e nivel di chumbu den su sanger lo keda hopi haltu pa vários siman.

[Plachi na página 25]

Sírkulo di koló

[Plachi na página 25]

“Kushina” di un trahadó di fèrf

[Plachi na página 26]

Bisti brel i masker protektivo pa siguridat