E Punto di Bista Bíbliko

Arkeologia—Nesesario pa Tin Fe?

Na 1873 e miembro di klero ingles Samuel Manning a skirbi tokante Yerúsalèm: “Un atrakshon iresistibel ta trèk peregrinonan for di tur parti di mundu pa bini aki. E murayanan kibrá, e kayanan sushi i deskuidá, e ruinanan ku ta serka di basha den otro, tur ta opheto di un interes i rèspèt profundo pa miónes di hende ku niun otro sitio riba tera por lanta.”

E Tera Santu a atraé hende por lo ménos for di tempu di Emperadó Romano Constantino. * Pa rònt di 1.500 aña, peregrinonan a bini i bai, buskando kontakto religioso i personal ku e Tera Santu. Tòg, pa straño ku por parse, ta te na prinsipio di siglo 19 numa eruditonan a kuminsá kompañá e peregrinonan aki, habriendo asina e époka di arkeologia bíbliko; e estudio di artefakto, hende, lugá i idioma di e Tera Santu di antigwedat.

Deskubrimentunan arkeológiko a pone ku hende a bin komprendé hopi aspekto di e tempu di Beibel mihó. Tambe, hopi bes e kosnan ku arkeologia a saka na kla ta kuadra ku historia di Beibel. Pero un konosementu asina ta nesesario pa e fe kristian? Pa kontestá esei, laga nos dirigí nos atenshon na un sitio kaminda hopi arkeólogo ta eksplorá: e stat di Yerúsalèm i su tèmpel.

‘Niun Piedra Lo No Keda Riba Otro’

Riba e fecha di 11 di nísan, kalènder hudiu, den lènte di aña 33 di nos era, Hesukristu, kompañá pa algun di su disipelnan, a bandoná e tèmpel  den Yerúsalèm pa último biaha. Segun ku nan tabata kana bai e Seru di Oleifi, un di su disipelnan a bis’é: “Maestro, mira ki piedranan i ki edifisionan grandi!”​—⁠Marko 13:⁠1.

E hudiunan fiel aki tabatin un amor profundo pa Dios i pa su tèmpel. Nan tabata orguyoso dje kompleho di edifisio magnífiko aki i e 15 siglonan di tradishon ku esakinan a representá. Loke Hesus a kontestá su disipel a shòk e: “Bo ta mira e edifisionan grandi aki? Ni un piedra lo no keda riba otro ku lo no wòrdu bashá abou.”​—⁠Marko 13:⁠2.

Awor ku e Mesias primintí a yega, kon Dios por a permití pa su propio tèmpel ser destruí? Ta gradualmente, ku yudansa di spiritu santu, Hesus su disipelnan a bin komprendé kompletamente ta kiko e tabata kier men. Pero kiko Hesus su palabranan tabatin di haber ku arkeologia di Beibel?

Un “Stat” Nobo

Na Pentekòste di aña 33 di nos era, e nashon hudiu a pèrdè su posishon di fabor dilanti Dios. (Mateo 21:43) Esaki a habri kaminda pa algu muchu mas grandi⁠—⁠un gobièrnu selestial ku lo trese bendishon pa henter humanidat. (Mateo 10:⁠7) Hesus su profesia a kumpli ora ku Yerúsalèm i su tèmpel a ser destruí na 70 Era Komun. Hayasgonan arkeológiko ta konfirmá ku esei en bèrdat a pasa. Sin embargo, pa e kristiannan su fe no ta importante si a haña e ruinanan dje tèmpel antiguo ei òf laga. Nan fe ta basá riba un otro Yerúsalèm, pero esaki ta un otro tipo di stat.

Na aña 96 di nos era, apòstel Huan, ku a tende Hesus su profesia tokante e destrukshon di Yerúsalèm i su tèmpel i ku a biba pa mira su kumplimentu, a haña e siguiente vishon. “Mi a mira e stat santu, Yerúsalèm nobo, ta baha for di shelu, for di Dios.” Un bos for di trono a bisa: “E lo biba meimei di [humanidat], i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.”​—⁠Revelashon 21:​2-4.

E “stat” aki ta konsistí di kristian fiel ku lo sirbi komo rei ku Kristu den shelu. Huntu nan ta forma e gobièrnu selestial⁠—⁠e Reino di Dios⁠—⁠ku lo goberná riba tera, tresiendo e rasa humano bèk na perfekshon durante e Milenio. (Mateo 6:10; 2 Pedro 3:13) E kristiannan hudiu di promé siglo ku mester a forma parti di e grupo ei a realisá ku nada ku nan tabatin den e sistema di kosnan hudiu no tabata komparabel ku e privilegio di reina ku Kristu den shelu.

Ora apòstel Pablo a skirbi di e posishon prominente ku e tabatin den hudaismo, el a papia pa nan tur: “Tur kos ku tabata ganashi pa mi, e kosnan ei mi a konsiderá komo pièrdè pa kousa di Kristu. Mas ku esei, mi ta konsiderá tur kos komo pièrdè kompará ku e balor superior di konosé Kristu Hesus mi Señor.”​—⁠Filipensenan 3:​7, 8.

E echo ku apòstel Pablo tabatin un gran rèspèt pa e Lei di Dios i e areglo di tèmpel ta indiká bon kla ku su palabranan no ta nifiká ku hende mester a despresiá e areglonan divino aki. * (Echonan 21:​20-24) Pablo kier a djis mustra ku e areglo kristian tabata superior ku e sistema hudiu.

Sin duda Pablo i otro kristiannan hudiu di promé siglo tabatin un konosementu spesífiko di hopi detaye fasinante di e sistema di kosnan hudiu. I ya ku arkeologia ta tira lus den pasado, kristiannan por komprendé awor algun di e detayenan ei. Pero, tuma nota riba kiko Pablo a bisa e yònkuman Timoteo pa dirigí su atenshon prinsipalmente: “Perkurá pa e kosnan aki [ku tin di haber ku e kongregashon kristian]; sea dediká na nan, pa bo progreso por ta bisto pa tur hende.”​—⁠1 Timoteo 4:⁠15.

Ta bon ku arkeologia di Beibel a yuda nos komprendé mihó e markonan históriko di e Skritura. Pero kristiannan ta realisá ku nan fe no ta dependé di hayasgonan arkeológiko di hende, sino di Beibel, e Palabra di Dios.​—⁠1 Tesalonisensenan 2:13; 2 Timoteo 3:​16, 17.

[Nota]

[Plachinan na página 26]

Ariba: Yerúsalèm na 1920; moneda romano ku e hudiunan tabata usa, aña 43 E.K.; granatapel di marfil na flor, posiblemente di e tèmpel di Sálomon, siglo 8 P.E.K.

[Rekonosementu pa Potrét na página 26]

Moneda: Potrèt © Israel Museum, Yerúsalèm; pa kortesia di Israel Antiquities Authority; granatapel: Pa kortesia di Israel Museum, Yerúsalèm