E Manera Ku Nan Ta Lesa Lep

DI E KORESPONSAL DI SPIÈRTA! NA GRAN BRETANIA

NAN a filma dos persona ku nan a sospechá di ta terorista papiando ku otro den un parke públiko. Ounke niun hende no por a tende loke nan tabata papia, tòg polis a arestá nan i despues nan a ser sentensiá na hopi aña di prisòn. Un persona ku ta lesa lep a lesa nan kombersashon filmá. E lesadó di lep aki ta ser aseptá komo un testigu eksperto na Gran Bretania i nan ta yam’é un “arma sekreto potente” di polis britániko.

Pa nos haña sa mas dje arte di lesa lep, nos a bai bishitá Mike ku Christina. Ora Christina tabatin tres aña el a bira surdu. Despues el a asistí na un skol pa mucha surdu, i einan nan a siñ’é lesa lep. Mike a siña lesa lep riba su mes despues ku el a kasa ku Christina.

Ta difísil pa lesa lep? Segun Mike: “Bo tin ku konsentrá riba e forma i movementunan di e lep, lenga i kachete.” Christina ta agregá: “Bo tin ku wak e persona ku ta papia ku bo atentamente, i segun ku bo abilidat pa lesa lep ta oumentá, lo bo ripará ekspreshonnan di kara i gesto tambe.”

Mi a siña ku e fout di mas grandi ku e persona ku ta papia por hasi ta, grita òf eksagerá e manera ku e ta move su lepnan. E fayonan ei por konfundí otronan i stroba mas ku nan ta yuda. Una bes ku e lesadó di lep dominá e arte aki, ta posibel asta p’e kuminsá identifiká aksèntnan regional. Klaro ku esaki no ta fásil! Problema di Oido, un organisashon ku ta spesialisá den duna lès di lesamentu di lep, ta indiká frankamente: “Pa bo siña lesa lep, bo tin ku praktiká, praktiká i sigui praktiká.”

Christina ta atmití ku tin biaha e ta sinti bèrgwensa ora e gara su mes ta “skucha” un kombersashon inkonsientemente den un bus òf trein. E úniko kos ku e por hasi ta wak otro kaminda mesora. Pero su abilidat por ta un protekshon. Christina no ta wak futbòl na televishon mas pasobra hopi bes el a yega di sintié inkómodo dor ku e por a mira kiko algun dje hungadónan tabata bisa.

Poko hende lo logra haña e mesun abilidatnan ku e “arma sekreto” di polis di Gran Bretania ta poseé. Pero asta e abilidat pa lesa lep djis un tiki so por ta un arte balioso ku lo bo por desaroyá despues ku bo a pèrdè bo oido.

 [Plachi na página 13]

Christina

[Plachi na página 13]

Mike