Kapturá den un Gota di Oro

DI E KORESPONSAL DI SPIÈRTA! NA REPÚBLIKA DOMINIKANA

UN VRUMINGA ta kana lihé-lihé riba tronkon di un palu, inkonsiente dje peliger ku ta ward’é. Diripiente, un pia ta pega, despues un otro, te ora e vruminga keda pegá den e hars di e palu. Un gota di oro chikitu mas ta kai i tapa e vruminga kompletamente. Awor sí e no por skapa mas. Finalmente, e masa pegapega ku ta kontené e vruminga ta kai na suela. Áwaseru ta laba e vruminga atrapá hiba den un riu kaminda e ta keda derá den lodo. Miles di aña despues e vruminga ta ser deskubrí, perfektamente konserbá den un gota di oro. E hars a bira duru i forma amber (barnsteen), un piedra presioso masha gustá.

Kiko nos sa di amber? Un amber ku un insekto derá den dje por konta nos algu di den pasado lehano? Nan ta kontené e sekreto ku ta permití hende rekreá formanan di bida ku pa hopi tempu no ta eksistí mas?

Oro di Nort

Pa míles di aña, e orígen misterioso di amber i su bunita koló di oro a intrigá hende. Ademas, amber a parse di tin un poder asombroso! Rònt di aña 600 promé ku Era Komun, e sientífiko griego Táles a ripará ku ora frega amber ku paña, e por trèk pluma òf pida yerba chikitu. E “poder asombroso” aki ta elektrisidat státiko. Por sierto, den algun idioma e palabra pa “elektrisidat” ta derivá for di e palabra griego pa amber, ku ta elektron. Mas ku dos mil aña despues e dòkter ingles William Gilbert a deskubrí ku, ademas di amber, otro supstansianan tambe por produsí elektrisidat státiko.

Entre aña 54 pa 60 di nos era, emperador romano Nero a manda un ofisial di ehérsito bai buska e fuente dje supstansia presioso aki. Biahando den direkshon nort, el a hañ’é na Kosta Báltiko i a regresá ku sentenáres di kilo di amber. Na Roma nan a balorá amber pa su bunitesa  i supuesto abilidat di protehá esun ku tin e bistí for di daño. Tambe e tabata un ingrediente pa remedi i ungwento. Historiadó romano Plinio a informá ku amber tabata asina popular ku un estatua chikitu kòrtá den amber tabatin mas balor ku un esklabo saludabel!

E promé sivilisashonnan di nort Europa a usa amber, tin bes yamá e oro di nort, pa troka pa heru, koper i otro produktonan di zùit. Durante Edat Medio, e Kabayeronan Teutóniko ku a kaba di regresá for di e Krusadanan tabata kontrolá e komersio den amber i e produkshon di dje na Europa estriktamente. Esnan ku tabata kolekshoná amber sin outorisashon por a risibí kastigu di morto.

Miéntras tantu, riba e isla karibense di Quisqueya, awor Repúblika Dominikana i Haiti, e indjannan taino tambe a deskubrí amber. Ora Columbus a bishitá Quisqueya na 1942 pa promé bes, el a regalá un kasike yòn di e isla un kadena di kralchi di amber lombrante. Parse ku Columbus a keda sorprendí ora el a risibí a kambio un par di sapatu dorná ku kralchi di amber!

Kiko Ta Amber?

Amber di Repúblika Dominikana ta e hars ku a bira duru di un tipo di palu tropikal blachi hanchu ku no ta eksistí mas. Algun famia di dje, konosí lokalmente komo algarroba, ta krese ainda den Karibe i tambe na Sentro i Suramérika. Sin embargo, ta na Ost Áfrika so bo por haña e famia mas yegá di e “palu di amber” dominikano. Amber di e region báltiko na Europa ta bini di un tipo di palu di kèlki.

Kon amber ta ser formá? Pa kuminsá, aki aya e kaska dje palu ta sker un tiki. Un taki ta kibra i krea un splet den e tronkon. Bakatòr tambe ta koba buraku den e palu. Esei ta pone e hars pegapega kore (lèk) bin afó pa seya e splet òf buraku. Ora ku un insekto òf otro kriatura chikitu, pa su di malu, keda pegá den e hars, e ta hoga kompletamente den dje despues di tempu. Distinto di sap di palu ku ta konsistí di awa i nutriente, hars ta konsistí di terpeen, alkohol i èster. E supstansianan kímiko aki ta aktua manera sekante i antibiótika. Nan ta balsamá kualkier insekto òf mata ku keda será den e hars. Bou di e kondishonnan ambiental apropiá, e hars ta seka pokopoko bira duru i bira amber, konserbando su kontenido intakto pa míles di aña. P’esei, amber ta hars di palunan di pasado ku a bira fòsil.

Unda Por Haña e Tesoro Pèrdí?

Ounke por haña amber na tur parti di mundu, ta solamente un 20 lugá asina tin sufisiente amber ku por hasi algu komersialmente rendabel kuné. Aktualmente, mayoria amber ta bini di e region báltiko di Ost Europa, Repúblika Dominikana i algun parti di Mèksiko.

No ta fásil pa haña amber. Hopi sientífiko ta kere ku pa hars kambia bira amber, mester der’é bou di tera, generalmente den klei muhá òf lodo bruá ku santu. Hopi mina na Repúblika  Dominikana ta situá den tereno haltu i brutu kubrí ku mondinan suptropikal ku hopi vegetashon. Ta na pia òf riba buriku so por yega na e lugánan ei, via kamind’i kabritu masha steil.

Algun mina tin e forma di pos hanchu i hundu. Pero otronan ta túnelnan smal ku por ta asta 200 meter largu. Pa motibu ku mashin i eksplosivonan por kibra amber, mineronan mester pasa den tur e trabou di kibra piedra di santu duru i klei pisá na man ku beitel, piki ku skòp. Hopi bes e úniko kos ku un minero tin pa duna poko lus ta un bela.

Di Piedra Gròf pa Hoya Refiná

Despues ku e minero kita e piedra rònt di e amber, e ta bai den lus di solo briante kuné, lab’é i kita su kaska gròf na un banda. Na e banda ei e ta hunta e superfisie ku zeta. Esei ta hasi posibel ku e por wak den e amber. E ta wak kiko tin será den dje. Esei por ta bestia chikitu, insekto òf otro material orgániko ku a bira fòsil den e amber. Kisas den 1 di kada 100 piedra di amber dominikano bo por topa un insekto. En kambio, ta solamente den 1 di kada 1.000 piedra di amber báltiko por mira un insekto. Un dje motibunan ta pasobra por lo general amber báltiko no ta muchu transparente, miéntras mas ku 90 porshento di amber dominikano ta transparente.

Nan ta surti e amber kuidadosamente segun tamaño, forma, koló i kontenido. Mayoria dje míles di piedra di amber ku nan ta koba saka tur siman ta chikitu. Pero no tur. Tin un amber dominikano ku ta pisa rònt di 8 kilo! Ku e pidanan mas chikitu sin nada aden nan ta traha hoya, miéntras ku e pidanan mas balioso ta reservá pa kolekshonistanan privá òf museo.

Mayoria amber tin e kolónan hel i oro bibu. Tur luna nan ta haña un par di amber blou na Repúblika Dominikana. Amber bèrdè ta asta mas skars ainda. Sientífikonan ta pensa ku ta e variashonnan den e komposishon kímiko dje hars i di e mineralnan dje tera den kua el a kai, ta determiná su koló.

Un Bista di e Mondinan di Antaño

Debí na su karakterístikanan úniko, un piedra di amber ku su “prezu” ta keda eksistí hopi mas tantu tempu ku e ekosistemanan tropikal yen di palu for di kua e ta bini. E material orgániko den mayoria fòsil a bira piedra. Su struktura original a ser remplasá ku mineral. Di otro banda, amber riba su mes ta algu orgániko, meskos ku kualkier animal òf mata ku tin den dje. Si e ta transparente, sientífikonan por studia i saka potrèt tridimenshonal di su tesoronan antiguo sin hasi daño na nan. Nan ta yama amber un bentana di oro pa tira bista den pasado pa motibu ku e ta kontené un registro di no solamente e insektonan i otro kriaturanan chikitu sino tambe di mata i ekosistemanan ku a disparsé hopi tempu pasá.

 Kiko ta e kosnan di mas balioso ku piedra di amber sa kontené? Hopi ta dependé di e punto di bista di e kolekshonista. Algun di e kosnan mas kostoso ta esnan konosí entre amantenan di amber komo e tres tesoronan: skòrpion, totèki i sapu. Dor ku mayoria di nan ta mas grandi i mas fuerte ku hopi insekto, nan por a libra nan mes fásilmente for di e gara di hars. Esnan ku sí a keda atrapá por lo general tabata masha chikitu òf kisas débil pa motibu di enfermedat òf heridá dor di otro bestia yagdó. Kuantu biaha nan a yega di haña un di eseinan? Masha poko biaha! Un kolekshonista ta kalkulá ku hende a yega di deskubrí apénas 30 pa 40 skòrpion, 10 pa 20 totèki i 8 pa 9 sapu. Esnan ku ser hañá ta presioso en bèrdat. Na 1997 nan a deskubrí un amber dominikano ku ta kontené un sapu chikitu, i nan a kalkulá ku e ta bal mas ku $50.000.

Pa algun sientífiko, otro tipo di kosnan será den amber ta asta mas fasinante. Dor ku e insektonan a ser atrapá lihé, hopi amber ta kontené “bistasonan” di historia di antigwedat. Bo por haña indikashon di e komportashon di insekto, manera esun di un bestia yagdó ku su víktima. Algun ku ta kontené webu, larva ku ta saliendo, pòpchi di araña ku èmbrio, òf araña ku a kaba di sali for di pòpchi ta permití sientífikonan studia e etapanan di desaroyo di insekto. Un piedra di amber, wardá den un museo na Stuttgart, Alemania, ta kontené un kolonia di 2.000 vruminga di antigwedat.

Meskos tambe, for di loke amber ta kontené sientífikonan por haña informashon tokante e flora dje mondinan di antigwedat. Flor, padestul, yerba, blachi i simia konserbá den amber a hasi posibel pa identifiká hopi mata i palu di pasado. Ademas, sientífikonan ta bastante sigur ku un tempu tabatin palu di figu tambe, ounke ningun di nan blachi òf takinan a ser hañá. Kon nan por sa? Pasobra nan a deskubrí vários sorto di maribomba den amber⁠—⁠maribomba ku ta biba solamente den palu di figu. P’esei ta razonabel pa asumí ku palu di figu a krese den mondi tambe.

Rekonstrukshon di Pasado?

Algun aña pasá un pelíkula popular tabata basá riba e idea ku lo por reprodusí dinosouro dor di e DNA di sanger di dinosouro hañá den sanguranan será den amber. Hopi sientífiko ta duda ku esaki ta realmente posibel. Tur kriatura bibiente tin nan propio DNA ku ta kontené e instrukshonnan kodifiká ku ta determiná nan karakterístikanan hereditario. Sin embargo, ounke eksperimentunan sientífiko a rekuperá fragmentonan chikitu di DNA for di algun insekto i mata hañá den amber, e eksperimentunan aki no por reprodusí kriaturanan ku a pasa pa historia.

E DNA rekuperá no ta solamente dañá sino tambe inkompleto. Segun un kálkulo, e fragmentonan ku por ser rekuperá ta kisas ménos ku ‘één miljoenste deel’ dje informashon total den e kódigo genétiko dje organismo. E tarea di rekonstruí e kódigo ei kompletamente a ser kompará ku rekonstruí un buki ku tin míles di página for di un frase bruá i inkompleto. *

Di tur manera, e idea di ‘clone’ dinosouro a bolbe lanta interes den amber, i aktualmente tin eksibishonnan di amber den museonan rònt mundu. Na e Museo Mundo de Ambar na Santo Domingo, Repúblika Dominikana, bishitantenan por mira imágennan interaktivo riba kòmpiuter i studia amber bou di mikroskop poderoso. Den un tayer n’e museo, artesanonan hopi ábil ta kombertí amber brutu den hoyanan bunita i piedra presioso ku ta kontené fòsil.

Amber a fasiná humanidat pa hopi siglo. Awe, amber ta masha gustá pa su kolónan bibu i bunitesa misterioso. Tambe e ta laga nos tira un bista den pasado i permití nos haña sa masha hopi kos.

[Nota]

[Plachinan na página 17]

A yega di haña vários insekto i tambe sapu pegá den amber

[Plachinan na página 18]

Pida amber chikitu ta ser kombertí den piedra presioso refiná

[Rekonosementu pa Potrèt na página 17]

Insektonan den amber na página 16 i 17 i hoya na página 18: Pa kortesia di Museo Mundo de Ambar, Santo Domingo RD - Foto Gianfranco Lanzetti; página 17 sapu: Pa kortesia di Museo Mundo de Ambar, Santo Domingo RD e Nelson Fulgencio - Foto Gianfranco Lanzetti