Mayornan Soltero Ta Haña Nan ku Hopi Desafio

“Mi emoshonnan ta haltu. Hopi anochi mi ta yora den baño. Mi situashon ta hopi difísil.”​—JANET, UN MAMA SOLTERO KU TIN TRES YU.

TIN vários situashon ku ta krea un mayor soltero. Algun famia ta keda ku un mayor so komo konsekuensia di guera, desaster natural òf malesa.

Mayornan di algun mucha ta disidí ku nan no ta kasa ku otro. Na Suesia por ehèmpel, kasi mitar dje kantidat di yunan ta nase pafó di matrimonio. Divorsio tambe ta krea hogarnan ku un mayor so. Investigashon ta mustra ku mas di 50 porshento di mucha merikano ta haña nan ta biba pa un tempu den un hogar ku un solo mayor durante nan infansia.

Loke e Desafionan Ta Enserá

Mamanan ku resientemente a bira biuda ta haña nan ku un karga èkstra. Nan tin ku kuminsá asumí responsabilidat pa nan famia miéntras nan ta tristu ainda debí n’e pèrdida di nan partner. Podisé ta tuma luna, asta añanan pa nan kustumbrá ku e papel aki. Huntu ku esei nan tin ku trata ku problemanan ekonómiko i ku e responsabilidat di konsolá nan yunan. Pa un mama ku su kasá a muri lo por ta masha difísil p’e asumí e responsabilidatnan èkstra ei. Esaki por pone ku e mucha ta keda sin haña e kuido i guia di su mayor nèt ora ku e tin mas mester di atenshon i konfiansa.

Hopi bes bo ta haña ku e mamanan soltero ku no a kasa ku tata di nan yu ta personanan hopi yòn i sin eksperensia. Podisé nan no a haña chèns di kaba skol. Sin niun entrenamentu adekuá, tin hopi chèns ku nan ta pober i ta hasi trabounan ku ta paga masha tiki sèn. Si nan miembronan di famia, manera nan mayornan, no yuda nan, nan lo tin tambe e responsabilidat pa buska hende pa kuida nan yu durante dia. Podisé un mama soltero tin ku lucha tambe ku karganan emoshonal manera bèrgwensa i soledat. Algun di nan lo tin miedu ku e echo ku nan tin yu lo stroba nan di haña un bon partner un dia. Segun ku e muchanan den e famianan ei ta krese, nan tambe por sinti nan molestiá pa preguntanan tokante nan pasado riba kua nan no tin kontesta, i tambe p’e echo ku nan kier p’e mayor ousente rekonosé nan.

Meskos tambe, mayornan ku pasa dor dje proseso di divorsio ta haña nan ku hopi strès. Divorsio por pone algun mayor haña un rabia profundo. E sintimentu di no ta digno i ku nan a ser rechasá tambe por stroba algun mayor di duna atenshon emoshonal na nan yunan. Mamanan ku mester kuminsá traha pa promé bes lo por tin difikultat pa kumpli ku e responsabilidat di manehá un hogar. Nan lo por sinti  ku nan no tin ni tempu ni energia pa e nesesidatnan spesial di e muchanan. I e muchanan mes tin ku trata ku kambionan grandi i diripiente despues dje divorsio di nan mayornan.

Desafionan Úniko di Mayornan Divorsiá

Mayornan soltero ta realisá ku e nesesidatnan di kada yu ta diferente i ta kambia konstantemente. Kisas no ta fásil pa mayornan soltero divorsiá haña oportunidat pa duna kada yu e guia spiritual ku e mester.

Por ehèmpel, sa sosodé ku algun mayor divorsiá ku ta Testigu di Yehova no tin e tutela di nan yunan. Nan a hasi esfuerso pa nan haña e derecho pa ta huntu ku nan yunan riba e dia i ora ku nan por bai reunion kristian ku nan. E areglo di bishita aki lo duna e mucha kontakto regular ku e kongregashon kristian, i esaki lo benefisiá e yunan di mayornan divorsiá mashá.

Mayornan divorsiá ku tin ménos oportunidat pa bin den kontakto regular ku nan yunan mester buska maneranan pa sigurá e yunan di nan amor i kariño. Pa e mayor por tin éksito, e mester ta konsiente dje nesesidatnan emoshonal di su yu ku ta kambia kònstant. Esaki ta e kaso foral ora e mucha bira teenager i ta kuminsá haña mas interes den aktividatnan sosial i amigunan.

Un mayor soltero eksitoso ta tene kuenta tambe ku e yu su kapasidatnan, su personalidat i manera di pensa. (Génesis 33:13) Mayor i yu ta disfrutá di kombersashon i asosiashon estrecho, íntimo i kaluroso ku otro. Semper nan por komuniká libremente. E mucha ta parti di e mayor su bida, i e mayor ta parti di e mucha su bida.

Mester Ta Rasonabel

Despues di un divorsio, ta bon pa yunan tin kontakto regular ku tur dos mayor. Suponé ku e mayornan tin kreensianan religioso diferente; un ta Testigu di Yehova, i e otro no ta. Komunikashon regular i franko ta yuda evitá konflikto innesesario. Apòstel Pablo a skirbi: “Mantené un reputashon di ta rasonabel.” (Filipensenan 4:⁠5, Phillips) Mester siña e yunan respetá e derecho ku ámbos mayor tin pa praktiká nan religion.

Kisas e mayor ku no ta Testigu ta insistí pa e yu asistí na sirbishinan religioso na su misa. Kiko e mayor ku ta Testigu di Yehova por hasi? E tambe por kompartí su konvikshonnan religioso ku e yu. Ku tempu e mucha por tuma su propio desishon relashoná ku religion, meskos ku tabata e kaso ku e hóben Timoteo, kende su mama i wela probablemente a siñ’é e prinsipionan di Beibel. (2 Timoteo  3:14, 15) Si e yu ta sintié inkómodo ora e ta asistí na sirbishi di un otro religion, kisas e por kòrda riba e personahe di Beibel ku yama Naaman, kende despues ku el a bira un adoradó berdadero a sigui kumpli ku su debernan dor di kompañá e rei ku tabata bai adorá n’e kas di Rimon. E relato aki por sigurá e yu ku Yehova ta stim’é i ta komprend’é maske e ta asistí na seremonianan religioso ku e no ta kustumbrá kuné.​—⁠2 Reinan 5:​17-19.

Un mayor eksitoso por moldia e manera di pensa di su yu òf yunan i komprendé nan sintimentunan. (Deuteronomio 6:⁠7) Ta sierto ku mayornan ku no a kasa nunka lo por sinti bèrgwensa di nan estilo di bida di ántes. Sin embargo, e mayornan ei mester kòrda ku nan yunan tin dos mayor biológiko. Yunan kier sa di tur dos mayor, i nan tin ku sinti ku nan mayornan kier nan, i ku nan no ta djis e resultado di un aksidente. Dor di papia respetuosamente tokante e mayor ousente i duna kontesta ku e mucha por komprendé òf mester sa segun su edat, e mayor por duna e yu un konfiansa basá riba amor.

Mayornan mester kòrda ku e promé impreshonnan ku un yu ta haña di amor, outoridat i poder ta ser influensiá dor di e relashon ku e yu tin ku su tata òf mama. Dor di ehersé su outoridat i poder ku amor, e mayor kristian por ègt yuda prepará e yu p’e tin un relashon amoroso ku Yehova i p’e respetá e areglonan den e kongregashon.​—⁠Génesis 18:⁠19.

Koperashon dje Yunan Ta Esensial

Yunan ku ta biba den un famia ku un mayor so, mester komprendé tambe ku nan koperashon ta esensial p’e famia por tin éksito. (Efesionan 6:​1-⁠3) Nan obedensia na outoridat di mayor ta mustra ku nan ta stima nan mayor i ta respetá e esfuerso èkstra ku e mayor ta hasi pa perkurá un hogar safe i felis. Siendo ku komunikashon ta bini di dos banda, yunan di un famia ku un mayor so mester kòrda ku nan mester ta dispuesto pa apoyá  e esfuerso ku e mayor ta hasi pa mantené un bon komunikashon den e famia.​—⁠Proverbionan 1:8; 4:​1-4.

Hopi bes e yunan ei ta haña nan ta karga responsabilidat mas trempan ku muchanan ku ta biba den un hogar ku dos mayor. Si e mayor duna su yunan instrukshon ku amor i pasenshi, e muchanan lo haña konfiansa i balor propio segun ku nan ta dominá e abilidatnan pa logra éksito den bida for di un edat yòn. Tambe por delegá algun trabou di kas na e yunan pa asina nan yuda tene kas na òrdu.

Esaki no kier men ku e mayor soltero mester kombertí su yunan den adultonan chikitu ku por perkurá pa nan mes i ku no tin mester di guia di nan mayor. Sigur sigur ta un gran bobedat pa laga un mucha chikitu su so òf sin supervishon.

Hopi bes mayornan soltero ta pensa eróneamente ku nan mester ta un partner òf amigu ku ta pareu di nan yunan. Ounke mester tin un relashon estrecho entre mayor i yu, mayornan soltero mester tene na mente ku yunan mester di un mayor i ku un yu no ta sufisiente madurá emoshonalmente p’e ta konfidente òf pareu di e mayor. Bo yunan tin mester di bo komo mama òf tata.

Si mayornan soltero i nan yunan koperá ku otro di un manera amoroso, esei por yuda nan edifiká un famia felis. Siendo ku mas i mas yu ta ser lantá den hogarnan ku un solo mayor, tur hende mester ta konsiente di e desafionan úniko ku mayornan soltero i nan yunan ta konfrontá i ser dispuesto pa duna nan apoyo i animashon amoroso.

[Kuadro/Plachi na página 9]

Efekto Riba Yunan

Na komparashon ku dos mayor ku ta huntu, mayornan soltero por lo general tin ménos tempu pa dediká na kada yu individual. Tin bes un mayor soltero ta biba huntu ku un partner ku no ta su kasá. Sin embargo, un bida kompañá ta ménos stabil ku un matrimonio. Probablemente e yunan ku ta biba den e tipo di famia ei ta haña nan ta krese huntu ku tur e diferente partnernan ku nan mayor a kambia durante nan bida.

Segun algun estudio, “e promedio di yunan ku ta kore riesgo di hiba un bida ménos saludabel den sentido moral i emoshonal ta mas haltu serka yunan ku ta bini di famia ku un mayor so, ku serka muchanan ku ta bini di famianan ku ámbos mayor.” Sin embargo, un análisis mas a fondo di e estudionan ei ta indiká ku falta di entrada lo por ta “e solo faktor mas importante ku ta responsabel pa e diferensia entre e muchanan di vários forma di famia.” Klaro ku esaki no ta nifiká ku yunan di un famia ku un mayor so, ta kondená na frakaso. Ku bon guia i entrenamentu, nan por vense e efektonan negativo.