Un Mayor Soltero, Pero No Solitario

“Loke mi ta gusta mas komo mama ta ora mi yunan yega kas i duna mi un abraso i bisa mi ku nan stima mi.”​—DORIS, UN MAMA SOLTERO KU TIN DOS YU.

MAYORNAN soltero por haña konsuelo for di e deklarashon di Beibel: “Yunan ta un regalo di SEÑOR, nan t’un berdadero bendishon.” (Salmo 127:⁠3, Beibel na papiamentu koriente) Ora yunan wòrdu lantá den un famia ku un mayor so nan no ta di ménos balor den bista di Dios. Nos Kreadó ta deseá pa famianan ku un mayor so logra éksito. Beibel ta bisa di Yehova: “E ta sostené wèrfano i biuda.” (Salmo 146:⁠9) Mayornan soltero por tin tur konfiansa ku Dios ta kla pa apoyá nan.

Un yu mester ser kriá den un ambiente di amor i di siguridat ku lo pèrmitié desaroyá físikamente, emoshonalmente i spiritualmente. Tur tata i mama tin e obligashon di entrená nan yu, i alabes e ta un privilegio pa nan ser usá dor di Dios pa hasi esei.

Hopi mayor a ripará ku pa logra éksito nan mester hasi orashon regularmente, apliká prinsipionan di Beibel ku konsistensia i dependé kompletamente riba Yehova. Esaki ta na armonia ku e animashon ku nos ta haña na Salmo 55:⁠22, ku ta bisa: “Tira bo karga riba SEÑOR, i e lo sostené bo.”

De bes en kuando, welanan, ansianonan lokal i mayornan eksperensiá den e kongregashon kristian lo por ta dispuesto pa yuda un famia ku un mayor so pa trata ku situashonnan difísil. Ounke ta sierto ku miembronan di famia i kompañeronan di kreensia por ta di gran yudansa pa mayornan soltero, finalmente ta e mayornan di e yu ta responsabel dilanti Dios. *

 Felismente, hopi mayor soltero a logra trata ku e desafionan úniko ku nan situashon a trese kuné, i nan por a lanta yunan responsabel, ku bon manera i temor pa Dios. Spièrta! a papia ku algun di nan. At’akí algun kos ku e mayornan ei tin en komun.

• Bon maneho di kas. Mayornan soltero ku tin éksito ta hasi esfuerso pa nan ta bon organisá i ta traha duru pa kordiná nan orario. Bon planiamentu i organisashon ta esensial. Beibel ta bisa: “E plannan di hende balente siguramente ta kondusí na abundansia.”​—⁠Proverbionan 21:⁠5.

• Dedikashon. Mayornan soltero ku tin éksito ta konsiderá nan bida di famia komo un di nan promé prioridatnan. Nan ta hasi esfuerso pa pone e nesesidatnan di nan yunan promé ku esnan di nan mes.​—⁠1 Timoteo 5:⁠8.

• Un proseder balansá. Mayornan soltero ku tin éksito no ta minimisá ni eksagerá nan problemanan; nan ta buska solushon. Nan ta aseptá e difikultatnan i ta purba trata ku nan sin amargá òf sinti duele di nan mes.

• Bon komunikashon. Mayornan soltero ku tin éksito ta animá komunikashon. Nan ta animá tur miembro di famia pa ekspresá nan pensamentu- i sintimentunan di un manera kla i habrí. Un tata soltero ta bisa tokante su yunan: “Mi ta papia ku nan tur ora. Ora nos ta prepará kuminda huntu, nos ta kombersá dushi ku otro. Ta e ora ei nan ta realmente konfiá mi nan kosnan.”

• Perkurá pa bo mes. Maske mayornan soltero ku tin éksito tin ku dediká hopi tempu na otro kosnan, nan ta rekonosé ku ta importante pa nan perkurá pa nan propio nesesidatnan spiritual, emoshonal i físiko. Ethel, un mama soltero ku a divorsiá i ku tin dos yu, a splika: “Mi ta purba apartá un poko tempu pa mi mes. Por ehèmpel, ora e muchanan ta tuma lès di músika serka un amigu, mi ta haña un ora pa mi mes. Mi ta kai sinta i no ta sende televishon.”

• Un aktitut positivo. Mayornan soltero ku tin éksito ta mantené un punto di bista positivo tokante nan responsabilidat komo mayor i di bida en general. Nan ta wak e rasgonan positivo di situashonnan difísil. Un mama soltero ta deklará: “Mi a realisá ku ser mama soltero tin su kosnan agradabel tambe kuné.”

 Mayornan Soltero Ku A Logra

E prinsipionan aki ta duna resultado? Sí, i nos por mira esei for di hopi relato di mayornan soltero eksitoso. E promé artíkulo a menshoná Gloria di Inglatera. E ta un mama soltero divorsiá ku ta traha i ku a lanta dos yu hòmber i un yu muhé. Ora nan a bira grandi, tur tres a bira ministernan kristian di tempu kompleto, i ta dediká nan bida na promové loke Beibel ta siña. Ora a puntra Gloria kon bin el a logra esei, el a splika: “E promé desafio tabata pa mantené un studio di Beibel komo famia, regularmente i interesante. Mi tabata kier pa mi yunan ta felis, pa nan tin pas mental, pa nan ta kontentu i protehá for di peliger. Mi a haña un trabou pa traha anochi. Mi meta tabata pa tene e muchanan huntu ku mi ki ora ku tabata posibel. Promé ku mi bai traha, nos tabata hasi orashon komo famia i mi tabata pone nan drumi. Ora mi tabata traha, mi tanta tabata keda kas ku nan.”

Kon Gloria a yuda su yunan pone e prioridatnan korekto? E ta sigui: “Mi meta prinsipal tabata pa pone kos spiritual na promé lugá. Nos no tabatin masha plaka, i mi tabata hopi franko ku e muchanan tokante esei. Mi mes tambe tabata hasi tur loke mi tabata pidi nan hasi, i nan tur tabata koperá.” Rekordando kon el a mantené su famia estrechamente uní, Gloria ta bisa: “E sekreto tabata hasi tur kos huntu. Niun hende no tabata isolá su mes den su kamber. Nos a kushiná, limpia i dekorá kas huntu. Nos a balansá nos aktividatnan. Semper mi a perkurá pa nos rekreá tambe.”

Carolyn, un mama soltero ku tin un yu hòmber yòn ku yama Joseph, ta kontentu ku e manera ku su yu ta kresiendo. Kiko ta su sekreto? E ta bisa: “Promé ku nos drumi anochi, nos ta lesa Beibel huntu, i despues mi ta hasié pregunta tokante e informashon ku el a lesa. Ademas, nos ta konsiderá algun paragraf selektá for di publikashonnan basá riba Beibel i nos ta apliká nan na nos situashon personal. Esaki ta yuda Joseph enfrentá problema tal komo abusu na skol.” Carolyn ta atmití ku su bida sigur no ta fásil, pero e ta sinti ku e no ta su so. E ta remarká: “Mi tin un lucha konstante, pero mi ta sinti ku Yehova a yuda mi di bèrdat. E kongregashon kristian tambe ta animá mi mashá.”

Relatonan ku ta mustra e éksito di mayornan soltero, manera esun di Gloria i Carolyn, ta duna prueba ku awe tambe mayornan por dependé riba e prinsipionan di Beibel ku a proba di ta efikas pa nan por lanta yunan ekselente i spiritualmente fuerte. (Proverbionan 22:⁠6) Éksito ta posibel! Lanta yu komo mayor soltero ta trese hopi desafio ku ta duna oportunidat pa krese i kompartí. E mihó manera ku mayornan soltero por trata ku e problemanan ku nan situashon ta trese kuné ta dor di dependé kompletamente riba Dios i keda konvensí ku lo e yuda nan na e mihó manera posibel.​—⁠Salmo 121:​1-3.

[Nota]

[Plachinan na página 11]

Studio di Beibel komo famia a yuda Gloria su tres yunan bira ministernan kristian di tempu kompleto. Aki nan ta lesa un karta i wak un potrèt di e yu hòmber mayó ku aktualmente ta sirbi komo misionero

[Plachinan na página 12]

Carolyn ku su yu hòmber, Joseph