AIDS Ta Plama na Áfrika

“Nos ta tratando ku un tipo di apokalípsis moderno.”

E PALABRANAN ei ta di Stephen Lewis, representante spesial di Nashonnan Uní pa HIV/AIDS na Áfrika. Nan ta reflehá e preokupashon ku hopi hende tin relashoná ku e situashon di AIDS den e paisnan afrikano sùit di Sahara.

Tin vários faktor ku ta yuda HIV plama asina tantu. Anto na su turno, AIDS a pone otro problemanan bira pió. E kondishonnan ku ta reina den algun pais afrikano i den otro partinan di mundu kaminda AIDS ta plamando, hopi bes tin di haber ku lo siguiente:

Moralidat. Kontakto seksual ta e manera prinsipal ku hende ta pega ku HIV. Pues ta bisto ku loke ta yuda plama e malesa ta e falta di normanan  moral klaramente definí. Sin embargo, hopi hende ta di opinion ku no ta práktiko pa boga pa hende soltero keda sin tene relashon seksual. Francois Dufour a skirbi den e korant The Star di Johannesburg, Suráfrika: “Djis spièrta hóbennan pa no hasi sèks lo no duna resultado. Tur dia nan ta ser bombardiá ku ehèmpel- òf esenanan seksual ku ta bisa nan kon nan aparensia mester ta òf kon nan mester komportá nan mes.”

Anto e komportashon di hóbennan aparentemente ta konfirmá e evaluashon aki di e situashon. Por ehèmpel, un enkuesta den un pais a indiká ku alrededor di un tersera parti di hóbennan entre 12 pa 17 aña a yega di tene relashon seksual.

Violashon seksual a ser deskribí komo un krísis nashonal na Suráfrika. Un informe den e korant Citizen di Johannesburg a deklará ku violashon “ta asina plamá ku e ta surpasá tur otro riesgo di salú ku hende muhé di e pais aki ta konfrontá. Anto mas i mas esaki ta konta tambe pa e muchanan.” E mesun artíkulo ei a bisa: “E kantidat di violashon di mucha a bira dòbel den último tempu . . . Parse ku hende ta kometé e aktonan aki basá riba e mito ku un persona ku ta portadó di HIV lo wòrdu kurá si e violá un bírgen.”

Malesa transmití seksualmente. Den e region tin un porsentahe haltu di malesa transmití seksualmente. E revista  South African Medical Journal a remarká: “E presensia di malesa transmití seksualmente ta pone ku hende tin 2 pa 5 biaha mas chèns di pega ku HIV-1.

Pobresa. Hopi pais na Áfrika ta lucha ku pobresa, i esaki ta krea un bon ambiente pa AIDS plama. Kosnan ku kisas ta ser konsiderá komo nesesidat básiko den paisnan industrialisá, no ta disponibel den mayoria pais den desaroyo. Tin komunidatnan grandi ku no tin koriente ni akseso na awa limpi pa bebe. Den áreanan di kunuku kasi no tin kaya òf nan ta hopi malu. Hopi habitante ta sufri di mal nutrishon i tin masha tiki fasilidat médiko.

AIDS ta afektá negoshi i industria tambe. Segun ku mas i mas empleado ta bira infektá, kompanianan minero ta sinti e efekto di ménos produkshon. Tin kompania ta pensando riba maneranan pa outomatisá i usa mas mashin pa kompensá e pèrdida di labor humano. Na un mina di platina nan a kalkulá ku durante aña 2000, e kasonan di AIDS bou di e empleadonan a bira kasi dòbel, i rònt di 26 porshentu di e trahadónan tabata infektá.

Un resultado tristu di AIDS ta e gran kantidat di mucha ku ta bira wèrfano ora nan mayornan muri di e malesa. Fuera di pèrdè nan mayornan i siguridat finansiero, e muchanan aki tin ku soportá tambe e stèmpel ku AIDS ta pone riba nan. Famianan djaserka òf nan komunidat sea ta muchu pober pa yuda nan òf no ta dispuesto pa hasié. Hopi wèrfano ta kita for di skol, i algun di nan ta kuminsá praktiká prostitushon, anto asina ta sigui plama e malesa. Vários pais a forma programanan gubernamental òf privá pa yuda e wèrfanonan aki.

Ignoransia. Un kantidat grandi di hende infektá ku HIV no sa esaki. Hopi hende no kier tèst nan mes debí na e bèrgwensa i rechaso konektá ku e malesa. Un komunikado di prensa di e Programa Konhunto di Nashonnan Uní Riba HIV/AIDS (UNAIDS) a remarká: “Hende ku tin, òf ku ta ser sospechá di tin HIV ta ser nengá tratamentu na fasilidatnan médiko, no ta haña kas ni trabou, nan amigu- i koleganan ta hui pa nan, seguro ta nenga di kubri nan òf nan no tin mag di drenta paisnan stranhero.” Tin ku asta a ser asesiná ora hende a haña sa ku nan tin HIV.

Kultura. Den vários kultura afrikano, hende muhé hopi bes no por puntra nan partner tokante su aventuranan pafó di matrimonio, no por nenga kontakto seksual ni sugerí métodonan pa hasi sèks na un manera mas safe. Kreensianan kultural hopi bes ta reflehá ignoransia i un rechaso di aseptá e realidat di AIDS. Por ehèmpel, nan por kulpa brueria pa e malesa i bai buska yudansa serka kurandero.

 Fasilidatnan médiko inadekuá. Fasilidatnan médiko ku ya kaba tabata limitá, awor ta demasiado yen debí na AIDS. Dos hospital grandi ta informá ku mas ku mitar di nan pashèntnan ta portadó di HIV. E dòkter na kabes di un hospital den e provinsia KwaZulu-Natal a bisa ku su afdelingnan ta funshoná na un kapasidat di 140 porshentu. Tin biaha, dos pashènt tin ku kompartí un kama, i un di tres pashènt ta drumi riba flur bou di e kama!​—⁠South African Medical Journal.

Ounke e situashon na Áfrika ya kaba ta trágiko, manera kos ta pinta lo e por bira pió. Peter Piot di UNAIDS a bisa: “Ainda nos ta na e promé etapanan di e epidemia.”

Pero ta bisto ku den algun pais hende ta hasiendo esfuerso pa trata ku e malesa. I na yüni 2001 tabata promé bes ku e Asamblea General di Nashonnan Uní a tene un konferensha spesial pa trata HIV/AIDS. Hende su esfuerso lo tin éksito? Ki dia lo bini un paro definitivo na e kareda mortal di AIDS?

[Kuadro/Plachi na página 5]

E REMEDI PA AIDS, NEVIRAPINE, I E DILEMA DI SURÁFRIKA

Kiko ta nevirapine? Segun e reportera Nicole Itano, esei ta ‘un remedi kontra retrovírus ku segun tèstnan a demostrá por redusí ku 50 porshentu e probabilidat di ku un mama ta transmití AIDS pa su yu.’ Un kompania aleman ku ta traha remedi a ofresé pa suministr’é grátis na Suráfrika durante e próksimo sinku añanan. Sin embargo, te ku ougùstùs 2001 gobièrnu no a aseptá e oferta. Kiko ta e problema?

Suráfrika tin 4,7 mion hende ku ta portadó di HIV; mas ku kualkier otro pais na mundu. E revista The Economist di Lònden a informá na febrüari 2002 ku e presidente di Suráfrika Thabo Mbeki “ta duda di e opinion generalmente aseptá, esta, ku HIV ta kousa AIDS” i e “no ta konfia e kosto, siguridat i balor di remedinan kontra AIDS. E no a prohibí nan, pero dòkternan na Suráfrika ta ser deskurashá di usa nan.” Dikon esaki ta motibu pa gran preokupashon? Pasobra na Suráfrika míles di beibi ta nase ku HIV tur aña i 25 porshentu di hende muhé na estado ta portadó di e vírus.

Komo resultado di e konflikto di opinion aki, hende a entamá un kaso pa fòrsa gobièrnu distribuí nevirapine. Korte Konstitushonal di Suráfrika a dikta su desishon na aprel 2002. Ravi Nessman a skirbi den The Washington Post ku korte a dikta ku “gobièrnu mester hasi e remedi disponibel pa institutonan médiko ku tin e kapasidat di dun’é na pashènt.” Ounke gobièrnu di Suráfrika a parti e remedi solamente na 18 sitio den henter e pais, komo un tèst pa wak kon ta bai kuné promé ku kuminsá partié na gran eskala, hende ta bisa ku e sentensia aki di korte a duna un speransa na tur hende muhé na estado ku ta portadó di HIV den e pais.

 [Kuadro/Plachi na página 6]

UN VÍRUS ASTUTO TA KOHE SÈL DEN TRAMPA

Pone bo mes un ratu den e mundu chikiritiku di e vírus di inmunodefisiensia humano (HIV). Un sientífiko a remarká: “Ounke mi tin hopi, hopi aña ta opservá e partíkulanan di vírus dor di un mikroskop, te ainda mi ta keda babuká i ta bira eksitá di e diseño asina presis i kompliká den algu asina chikiritiku.”

Un vírus ta mas chikí ku un bakteria; i un bakteria ta hopi mas chikí ku un sèl humano normal. Segun un outoridat, e vírus di HIV ta asina chikí ku “230 mion [partíkula di HIV ] lo pas den e punto na final di e frase aki.” Un vírus no por multipliká a ménos ku e infiltrá den un sèl i tuma kontròl di e rekursonan di e sèl.

Ora HIV invadí e kurpa humano, e mester lucha kontra forsanan formidabel di e sistema inmunológiko ku hende tin. * Den e tuti di wesu e kurpa ta produsí un sistema di defensa ku ta konsistí di sèl di sanger blanku. Tin vários tipo di sèl di sanger blanku. Tin unu ku yama fagosit, es desir, “komedó di sèl.” Tambe tin un tipo ku yama linfosit; i na su turno, tin vários tipo di linfosit, di kua e dosnan prinsipal ta konosí komo T-sèl i B-sèl.

Tin vários kategoria di T-sèl i nan kada un tin un otro funshon. Esnan ku yama helper-T-sèl ta hunga un papel klave den e strategia di defensa. Helper-T-sèl ta yuda identifiká e invasornan stranhero i ta duna instrukshon pa produsí sèl ku ta ataká i destruí e enemigu. Ora HIV ta ataká, e ta mek foral riba e helper-T-sèlnan aki. Tin tambe T-sèl asesino ku ta ser aktivá pa destruí e sèlnan di kurpa ku ser infektá. Anto e B-sèlnan ta produsí antikuerpo ku ta ser usá den e lucha kontra infekshon.

Un Strategia Astuto

HIV ta ser klasifiká komo un retrovírus. E kódigo genétiko di HIV ta den forma di RNA (ásido ribonukleiko) i no komo DNA (ásido deoksiribonukleiko). HIV ta pertenesé na un grupo spesífiko di retrovírus konosí komo lentivírus pasobra e por keda skondí pa un periodo largu promé ku e síntomanan serio di e malesa kuminsá manifestá nan mes.

Ora HIV logra drenta un sèl, e ta usa e mekanismo di e sèl pa logra su meta. E ta “reprogramá” e DNA di e sèl pa traha masha hopi kopia di HIV. Pero promé ku e por hasi esaki, HIV tin ku usa un otro “idioma.” E mester kambia su propio kódigo RNA den DNA ya asina e mekanismo di e sèl ku el a invadí por lesa e kódigo i komprond’é. Pa logra esaki, HIV ta hasi uso di un enzima di vírus ku yama reverse transcriptase. Ku tempu e sèl ta muri, pero promé ku esei e ta produsí míles di partíkula nobo di HIV, i esakinan ta infektá otro sèl.

Unabes e kantidat di helper-T-sèl baha drástikamente, otro vírus por invadí e kurpa, sin miedu di ser ataká. E kurpa ta haña tur sorto di malesa i infekshon. E ora ei e persona infektá ta pasa pa e etapa di full-blown AIDS. HIV a logra daña henter e sistema di defensa di su kurpa, es desir, e persona su sistema inmunológiko.

Esaki ta un splikashon simplifiká. Nos mester kòrda ku tin hopi kos ku investigadónan no sa, tantu tokante e sistema inmunológiko komo tokante e manera ku HIV ta funshoná.

E vírus chikí aki tin kasi 20 aña ta apsorbá tur rekurso mental i físiko di e investigadónan prinsipal riba tereno di medisina na tur parti di mundu, i esei a resultá den un enorme gastu finansiero. Pero un resultado ta ku hende a siña hopi tokante HIV. Dr. Sherwin B. Nuland, un siruhano, a komentá algun aña pasá: “E kantidat di informashon ku . . . a ser rekompilá tokante e vírus di inmunodefisiensia humano i e progreso ku hende a hasi den forma un defensa kontra su atake, ta realmente asombroso.”

No opstante, e kareda mortal di AIDS ta sigui na un paso alarmante.

[Nota]

[Plachi na página 6]

HIV ta invadí e sèlnan di sanger blanku (linfosit) di e sistema di defensa di e kurpa i ta reprogramá nan pa produsí HIV

[Rekonosementu pa Potrèt na página 6]

CDC, Atlanta, Ga.

[Plachi na página 7]

Tin míles di hóben ku sí ta pega na e normanan di Beibel