E Punto di Bista Bíbliko

Dios Ta Ignorá Nos Debilidatnan?

‘Mi no ta un malbado! Mi a hasi hopi esfuerso pa stòp di hasi malu, pero gewon mi ta muchu débil!’

E PALABRANAN aki ta ekspresá loke abo òf un otro hende ku bo konosé ta sinti? Hopi hende ta konkluí ku ta kasi imposibel pa vense debilidatnan moral ku ta duru ankrá den nan. Tin hende ta adikto na alkohòl, tabako òf droga. Golosidat ta dominá bida di hopi otro hende. I tin hende ta entregá na inmoralidat seksual, pretendiendo ku nan ta iremediablemente adikto na sèks.

Manera Mateo 26:41 ta indiká, Hesus a ekspresá bondadosamente ku e tin komprenshon pa hende su debilidatnan. * De echo, henter Beibel ta mustra bon kla ku Yehova Dios i Hesus ta realmente miserikòrdioso ku hende. (Salmo 103:​8, 9) Pero nos por ferwagt ku Dios ta ignorá tur nos defektonan?

Moises i David

Analisá e relato di Moises. Beibel ta bisa: “E hòmber Moises tabata masha humilde, mas ku tur hòmber ku tabatin riba superfisio di tera.” I el a hasi esfuerso pa keda ku e bon kualidat ei. (Numbernan 12:⁠3) Segun ku e israelitanan tabata pasa dor di e desierto, nan a aktua hopi bes na un manera irasonabel i a demostrá falta di rèspèt pa Dios i pa su representantenan. Durante di tur esei, Moises a buska Dios su guia humildemente.​—⁠Numbernan 16:​12-⁠14, 28-⁠30.

Pero nèt ora ku e biahe largu i agotador tabata yegando su fin, Moises a pèrdè dominio propio i a rabia dilanti henter e nashon i a desobedesé Dios su instrukshonnan. Dios a pordon’é. Pero el a pasa por haltu di e insidente? Nò. El a bisa Moises ku Aròn: “Pasobra boso no a kere mi . . . boso lo no hiba e asamblea aki na e tera ku mi a duna nan.” Moises lo no a drenta e Tera Primintí. Despues di a lucha 40 aña largu pa e privilegio maravioso ei, un debilidat humano serio a pon’é pèrdè e rekompensa.​—⁠Numbernan 20:​7-⁠12.

 Rei David tabata un otro hòmber temeroso di Dios ku un debilidat. Na un okashon el a laga pashon domin’é i a tene relashon seksual ku e esposa di un otro hòmber. Kaba el a purba tapa esei dor di laga mata e hòmber. (2 Samuel 11:​2-⁠27) Despues, el a repentí sinseramente di su krímennan, i Dios a pordon’é. Pero David a destruí e famia di Urías, i Yehova no a protehá David di e kalamidatnan ku a sigui. Su yu hòmber beibi a bira hopi malu, i Yehova no a spar e mucha, apesar ku David a hasi orashon na su fabor. E yu a muri, i despues di esei a sigui un seri di tragedia den e famia di David. (2 Samuel 12:​13-⁠18; 18:⁠33) David a paga hopi karu pa e echo ku el a laga debilidat moral domin’é.

E ehèmpelnan aki ta mustra ku Dios ta tene hende responsabel pa nan komportashon. Esnan ku kier sirbié mester reforsá e áreanan débil di nan spiritualidat i bira mihó kristian. Den promé siglo hopi persona a hasi esei.

E Lucha pa Libra for di Práktikanan Pekaminoso

Apòstel Pablo ta ser konsiderá komo un bon ehèmpel di bida kristian, i esei ta na su lugá. Pero bo tabata sa ku e tabatin un lucha konstante kontra su debilidatnan? Na un manera bibu Romanonan 7:​18-⁠25 ta deskribí e konflikto òf ‘bataya’ aki, manera versíkulo 23 ta yam’é. Pablo a lucha sin stòp, pasobra e tabata sa ku piká ta persistí.​—⁠1 Korintionan 9:​26, 27.

Algun miembro di e kongregashon kristian di antiguo Korinto tabata hende ku anteriormente tabatin kustumber di kometé piká. Beibel ta bisa ku ántes nan tabata ‘fornikadó, adúltero, homoseksual, ladron, golos pa plaka, buraché.’ Pero tambe e ta bisa ku nan a ser “labá.” (1 Korintionan 6:​9-⁠11) Kon asina? Mediante konosementu eksakto, asosiashon kristian i e spiritu di Dios, nan a haña e fortalesa pa stòp ku nan práktikanan malbado. Ku tempu, Dios a deklará nan hustu den nòmber di Kristu. Sí, Dios a pordoná nan i asina a duna nan un konsenshi limpi.​—⁠Echonan 2:38; 3:⁠19.

Pablo i e kristiannan di Korinto no a hasi manera kos ku nan tendensianan pekaminoso no tabata nada. Mas bien, nan a lucha kontra nan i ku Dios su yudansa nan a triunfá. E adoradónan ei di promé siglo a bira bunita den sentido moral, apesar di nan ambiente i inklinashonnan imperfekto. Kiko di nos?

Dios Ta Ferwagt pa Nos Lucha Kontra Nos Debilidatnan

Ora nos ta lucha kontra un debilidat, esei no kier men ku e ta ser eliminá kompletamente. I ounke nos no tin ku entregá na nos imperfekshon, nos no por destruyé. Imperfekshon kisas ta produsí debilidatnan ku ta masha persistente, pero tòg nos no mester entregá na nan. (Salmo 119:⁠11) Dikon esaki ta asina importante?

Pasobra Dios no ta permití nos usa imperfekshon konstantemente komo un esküs pa mal komportashon. (Hudas 4) Yehova kier pa hende drecha nan bida i biba segun bon normanan moral. Beibel ta bisa: “Aboresé loke ta malu.” (Romanonan 12:⁠9) Dikon Dios ta tuma un posishon asina firme?

Un motibu ta ku ora un hende entregá na debilidat esei ta perhudiká e mes. Beibel ta bisa na Galationan 6:⁠7: “Loke un hende sembra, esaki tambe e lo kosechá.” Hende ku ta entregá na adikshon, golosidat i inmoralidat seksual, hopi bes ta haña nan ku konsekuensianan teribel den nan bida. Pero tin un motibu mas importante ainda.

Piká ta ofendé Dios. E ta kousa “separashon” entre nos i Yehova. (Isaías 59:⁠2) P’esei, komo ku esnan ku ta praktiká piká no por haña su aprobashon, Yehova ta spièrta nan: “Laba boso mes, hasi boso mes limpi. . . . Stòp di hasi maldat.”​—⁠Isaías 1:⁠16.

Nos Kreadó ta amoroso i miserikòrdioso. “[E] no kier pa ningun hende bai pèrdí, ma pa tur bin na repentimentu.” (2 Pedro 3:⁠9) Ora ku konstantemente nos ta entregá na debilidat, nos no por haña Dios su aprobashon. I ya ku Dios no ta ignorá nos debilidatnan, nos tampoko no mester ignorá nan.

[Nota]