For di Nos Lektornan

Maestronan Mi tin kuater aña komo yùfrou di skol básiko, i mi a keda enkantá ku e seri “Kon Nos Lo A Hasi sin Maestro?” (8 di mart 2002) Un kos ku mi a ripará i ku ta preokupá mi ta ku muchanan no sa e diferensia entre bon i malu. Tambe ta difísil pa maestronan ora ku e muchanan sa bon kiko ta nan derechinan promé ku nan ta konsiente di nan responsabilidatnan. Apesar di esei, duna lès ta un karera rekompensador, foral ora e alumnonan tin smak pa siña i ta hasi progreso.

J. K., Merka

Danki pa e artíkulonan aki. Nan a yuda mi komprondé kuantu sakrifisio maestronan ta hasi pa nos, maske hopi bes nos no ta hasi meskos pa nan.

S. M., Italia

Mi tin ocho aña. Boso artíkulonan tokante maestronan a yuda mi mira ku nan stima e alumnonan. Nan gusta siña mucha, asta ora esei ta difísil. Mi a skirbi mi yùfrou un karchi pa yam’é danki. Ami ku mi ruman muhé di kuater aña ta siñando kon pa siña otro hende tokante Yehova. Maske tin biaha esei ta duru, nos ta hasié pasobra nos stima hende.

T. M., Merka

Kuater aña despues ku mi a stòp di duna lès, un alumno a skirbi mi pa ekspresá su apresio pa tur e biahanan ku mi a yud’é. Huntu ku e karta el a manda un ‘bladwijzer’ ku e mes a traha. Boso por imaginá kon kontentu e karta ei a hasi mi!

A. R., Slovenia

Na mi yunan su skol mi a duna e kabes di skol i dos yùfrou e revista aki. Mi a warda dos dia i a bai bèk pa wak kiko nan a opiná. Nan a pidi 20 revista mas na spañó i ingles pa parti pa e mayornan.

M. M., Merka

Aña pasá mi a traha komo yùfrou di skol básiko pa kuater luna. E otro maestronan ku mi a traha kuné tabata bisa ku e falta di apresio di parti di e mayornan a hasi nan trabou difísil. P’esei mi a keda hopi kontentu ku e seri di artíkulo aki sí ta balorá e trabou di maestronan dediká. Ora mi trimèster a kaba, mi a haña hopi karta di gradisimentu for di mi alumnonan. Kada un dje kartanan aki ta un tesoro pa mi!

S. I., Hapon

Sintimentu di Kulpa Mi tabatin mester di e artíkulo “E Punto di Bista Bíbliko: Remordimentu Semper Ta Malu?” (8 di mart 2002) Debí ku mi tabata spera demasiado di otro hende, tabata difísil pa mi kontrolá mi emoshonnan ora mi tabata trata ku mi kompañera den e trabou di prediká tempu kompletu. Pero e artíkulo aki a mustra ku no ta amoroso pa konstantemente nos purba laga hende sinti nan kulpabel ora nan no hasi un kos manera nos ta haña ta bon. Esei por asta stroba e persona di hasi e kambionan deseá. Mi ta kontentu ku mi por a kambia mi punto di bista. Por fabor, sigui siña nos e manera ku Yehova ta mira asuntunan.

K. K., Hapon

Pèrdè Barika Ora mi a mira e artíkulo “Mi A Pèrdè Barika” (8 di aprel 2002), awa a yena mi wowo miéntras mi tabata kòrda kon esei a pasa ku mi. Mesora mi a hasi orashon pa gradisí Yehova ku el a perkurá e informashon tan nesesario aki i pa e konsuelo ku e artíkulo ta duna. Un kos ku semper lo konsolá nos ta ku den Dios su mundu nobo, esaki lo no sosodé nunka mas ku niun hende.

J. S., Merka