Kon Nos A Skapa un Fluho Spantoso di Lava!

DI E KORESPONSAL DI SPIÈRTA! NA KONGO (KINSHASA)

TABATA djamars, 15 di yanüari 2002, aparentemente un dia normal na Áfrika Sentral. Ami ku un otro Testigu di Yehova a yega Goma, den e region Kivu na Kongo (Kinshasa), pa reuní ku e Testigunan di e region di Lagonan Grandi.

No Tin Motibu pa Preokupá?

Ounke e volkan Nyiragongo (3.470 meter haltu) ta keda un 19 kilometer for di e stat Goma, su komportashon a hala nos atenshon. * Nos por a tend’é ronka i tambe nos a mira huma ta sali for di e volkan. Pa e hendenan lokal, esaki no tabata algu straño pa e temporada di aña, p’esei nan no a preokupá.

Atardi nos a asistí na reunion di dos kongregashon di Testigunan di Yehova. Nos a sigui sinti kon tera tabata tembla levemente i a tende e ronkamentu. Pero parse ku esei no a molestiá niun hende. E outoridatnan lokal a sigui garantisá e poblashon ku no tabatin motibu pa pániko. Ounke un spesialista di volkan, un persona di Kongo mes, tabatin lunanan ta predisí un erupshon, niun hende a ker’é. Un amigu a komentá trankilamente: “Awe nochi shelu lo ta kòrá dor ku e volkan ta aktivo.”

“Nos Tin Ku Hui Mesora!”

Pero ora nos a bolbe na nos lugá di hospedá, nan a bisa nos bon kla: “Nos tin ku hui mesora!” E situashon no tabata safe i e stat tabata den peliger grandi. Wak kon lihé kos a kambia! Un poko promé nos tabata papia tokante e posibilidat di usa Goma komo un lugá sentral pa kordiná aktividatnan di prediká. Awor, pa atardi, nan a bisa nos ku nos mester hui for di e stat pasobra e tabata kore peliger di ser destruí!

Segun ku a bira anochi, shelu su koló a bira kòrá-kòrá, i ku bon motibu! E fluho di lava di Nyiragongo tabata bini rumbo pa e stat. E seru a parse un wea masha grandi kua su kontenido tabata herebé i basha over: lava kayente ku a destruí tur kos den su kaminda. Nunka nos no a paketá nos maleta asina lihé! Tabata kasi 7’or djanochi.

Míles di Hende Huyendo Riba Kaminda

Segun ku nos tabata hasi lihé pa hui, e kaminda ku ta sali for di Goma tabata yen-yen ku multitut di hende ku a hui pa skapa nan bida. Mayoria di nan tabata na pia, kargando e poko pertenensianan ku nan a logra kohe den purá. Hopi tabata karga kos riba kabes. Algun tabata di pak den vehíkulonan demasiado kargá. Tur hende tabata rumbo pa e frontera di  Ruanda ku no ta masha leu. Sin embargo, un volkan no ta respetá e límitenan ku hende ta pone. Ningun ehérsito por para su progreso! Nos a mira kon miedu di e lava a pone asta sòldá kore pa nan bida. Tabata kasi imposibel pa outo kore riba e kaminda. Nos tabatin ku sigui na pia. Nos tabata meimei di e multitut aki di 300.000 hende⁠—⁠hòmber, muhé, mucha i beibi⁠—⁠huyendo pa e furia di e volkan. E tera bou di nos pia a sigui ronka i tembla.

Tur hende tabata hui pa skapa nan bida. Ami ku mi amigu tabata hende straño ku a bini di un stat grandi, i nos tabata meimei di nan, kompañá pa un par di Testigu ku ta kuida nos. Nan presensia i preokupashon profundo a konmové nos mashá, i a laga nos sinti un tiki safe den e situashon hopi tenso i doloroso aki. Hende a hui kargando loke nan por: paña, wea ku panchi, algun artíkulo di kuminda. Den e laman di hende aki, tabatin pushamentu i stotmentu. Outo ku tabata purba pasa a dal den algun hende i e poko pertenensianan ku nan tabatin a kai abou i ser trapá. Ai di esun ku trompeká. Tabatin masha tenshon i tur hende tabata yen di miedu. Nos a purba yega Gisenyi, un lugá ku a keda algun kilometer den Ruanda. Nos a sigui ku nos marcha fòrsá.

Un Anochi den Siguridat

Nos a yega na un penshon, pero klaru ku no tabatin mas lugá. Nos tabatin ku keda satisfecho ku nos por sinta pafó rònt di un mesa di hardin. Esaki tabata despues di un kaminata agotador di tres ora i mei. Nos tabata kontentu di ta na bida i fuera di peliger i huntu ku nos rumannan kristian ku a biaha ku nos. Felismente, ningun Testigu no a pèrdè nan bida.

Tur kos a mustra ku nos lo tin ku pasa anochi den aire liber. For di e distansia safe aki, nos por a wak e shelu kòrá-kòrá riba e stat di Goma. En realidat e tabata masha impreshonante i bunita! Pokopoko di dia a habri. E ronkamentu i sagudimentu a sigui henter anochi. Pensando bèk riba e susesonan difísil di e dia promé, nos  no por keda sin sinti kompashon pa e míles di famianan ku mester a hui ku nan yunan chikí.

Yudansa A Yega Lihé

Testigunan di Kigali, e kapital di Ruanda, a djòin nos djabièrnè mèrdia, dia 18 di yanüari. Un komité di ousilio ku a konsistí di rumannan hòmber di Goma i Gisenyi a kuminsá aktua. E promé meta tabata pa perkurá kaminda di keda pa e refugiadonan Testigu den e seis Salònnan di Reino ku tabatin den bisindario. Esei a tuma lugá e dia ei mes. Nan a pone un bòrchi kantu di kaminda skirbí na franses i swahili pa indiká kon pa yega na un Salòn di Reino lokal, unda e refugiadonan por haña yudansa i konsuelo. Riba e mesun dia ei tambe a yega tres tòn di nesesidatnan básiko na e Salònnan di Reino kaminda e Testigunan tabata hospedá. E siguiente dia, djasabra, un trùk kargá ku kuminda, klechi, plèstik, habon i remedi a yega for di Kigali.

Inkietut Ta Oumentá

Tabata reina gran preokupashon. Kon por a satisfasé e nesesidatnan di tur e hendenan aki? Kiko di e volkan? Ki ora e erupshon lo a stòp? Kuantu daño e stat Goma a sufri? E notisianan ku tabata sirkulá i e temblamentu konstante di tera no tabata mustra nada prometedor. Ekspertonan tabata teme ku nivelnan peligroso di gas di suafel lo a kontaminá e aire. Tambe nan tabata preokupá ku e awa di Lago Kivu lo ser kontaminá dor di reakshonnan kímiko.

Durante e 48 oranan despues di e erupshon tabatin notisianan inkietante ta sirkulá. Anto djasabra atardi nos a tende ku tin mas o ménos 10.000 hende, entre nan 8 Testigu i un mucha, rondoná pa fluho di lava ku den algun área ta yega 2 meter haltu. E aire tabata kargá ku gas venenoso i nos a teme pa nan bida. E situashon tabata parse sin speransa. Asta e katedral di Goma a keda kasi kompletamente destruí dor di e avanse inevitabel di lava. N’e momentu ei ningun hende tabata kere ku Goma lo sobrebibí e destrukshon.

Algun Notisia Trankilisante

Djadumingu mainta 9’or, un di e rumannan rondoná pa lava a yama nos na telefòn. El a konta nos ku e situashon ta kambiando i kos tabata pinta mihó. Áwaseru tabata kai, e lava a kuminsá fria i aire tabata klarando. Ounke ainda e lava tabata kayente i peligroso, hende a kuminsá krusa e fluho pa bai na lugánan mas safe. E stat no tabata kompletamente destruí.

Esaki tabata e promé bon notisia for di dia ku e kataklismo a kuminsá. E volkan tabata parse ménos aktivo i e ekspertonan den bisindario tabata duna opinionnan ku a kontradisí otro. Nos a logra establesé kontakto ku Bukavu, un stat bisiña ku a keda na e otro punta di Lago Kivu. Nos a tende ku sinku famia Testigu, i tambe tres mucha sin nan mayornan, a yega Bukavu  ku boto. E Testigunan den e stat ei lo a perkurá pa nan.

Nos Por Bolbe!

Djaluna 21 di yanüari, nos a haña chèns pa animá i konsolá e víktimanan na Gisenyi, i tambe determiná kiko tabata nan nesesidatnan. E rumannan ku temporalmente tabata hospedá den e seis Salònnan di Reino a organisá nan mes. Nos a haña e kantidat eksakto di Testigu ku a hui: 1.800 persona kontando e muchanan.

Kiko di futuro? E outoridatnan lokal tabatin pensá di traha kamponan di refugiado rápidamente. Sin embargo, algun hende ainda tabatin mal rekuerdo di e kamponan di refugiado ku nan a traha despues di e genosidio di 1994. Nos a disidí di bai Goma bèk, i banda di mèrdia nos a yega e stat. Rònt di 25 porshentu di e stat a ser destruí. Nos por a kana riba e lava ku a kore dor di e kayanan di e stat i ku awor tabata birando duru. Ainda e lava tabata kayente, i tur kaminda bo por a hole e gasnan ku tabata sali for di dje. Hopi hende tabata desididu pa bolbe na e stat.

Un or di atardi nos a reuní ku 33 ansiano kristian den e Salòn di Reino di Kongregashon Goma Sentro. E opinion tabata unánime: Nan ta disidí di bai bèk Goma. Nan a bisa: “Ta aki nos ta pertenesé.” Kiko di e riesgo ku e volkan lo bolbe tin un erupshon? Nan a kontestá: “Nos a kustumbrá ku esei.” Nan tabatin miedu ku hende lo hòrta tur nan propiedatnan si nan no bai bèk lihé. E siguiente dia tur e famianan Testigu ku a hui, tabata bèk na Goma. E gran mayoria di e 300.000 hendenan ku a krusa frontera tambe a bolbe na e stat afektá.

Un Siman Despues

Un biaha mas e stat tabata yen di aktividat. Evidentemente, lo e no muri. Djis despues hende a kuminsá nivelá e lava sufisientemente pa bolbe uni e dos sekshonnan di e stat ku a ser dividí. Tur kos ku tabata den kaminda di e fluho di lava a ser destruí. E sentro komersial i e sekshon atministrativo di e stat a ser ruiná. Nan a kalkulá ku un tersera parti di e pista di aeropuerto a keda destruí.

Un konteo eksakto a mustra ku tabatin 180 famia Testigu entre esnan ku a pèrdè tur kos i ku a keda sin kas. E komité di ousilio a hasi areglo pa yuda aproksimadamente 5.000 hòmber, muhé i mucha haña un porshon di kuminda tur dia. Lo usa un kargamentu di tapol di plèstik ku Testigunan di Yehova di Bèlgika, Fransia i Suisa a kontribuí, pa perkurá refugio temporal pa esnan sin kas i tambe pa traha lugá di reunion pa e kongregashonnan ku nan Salòn di Reino a risibí daño grave òf a ser destruí. Algun di e famianan ku a keda sin kas lo hospedá serka Testigunan kende nan kas sí a keda intakto, miéntras ku otronan lo hospedá den e refugionan temporal.

Djabièrnè 25 di yanüari, un dies dia despues di e anochi teribel ei, tabatin 1.846 hende presente na un reunion tené den kurá di un skol na Goma pa skucha palabranan animante for di e Skritura. E rumannan a ekspresá masha hopi palabra di gradisimentu tantu pa e konsuelo komo pa e yudansa práktiko ku Yehova a perkurá mediante su organisashon. Nos komo bishitante a keda profundamente konmoví pa e kurashi i fe firme ku e rumannan a demostrá apesar di nan sirkunstansia penoso. Meimei di tantu angustia, tabata un plaser pa forma parti di un hermandat uní den adorashon di e úniko Dios berdadero, Yehova, e Fuente di konsuelo eterno!​—⁠Salmo 133:1; 2 Korintionan 1:​3-⁠7.

[Nota]

[Mapanan na página 22, 23]

(Pa e teksto den su formato kompleto, wak e publikashon)

Liñanan ku flecha ta indiká e fluho di lava

KONGO (KINSHASA)

Seru Nyiragongo

↓ ↓ ↓

Aeropuerto Goma ↓ ↓

↓ GOMA

↓ ↓

LAGO KIVU

RUANDA

[Plachinan na página 23]

E fluho di lava a obligá dies di míles di habitante hui for di e stat Goma

[Rekonosementu]

AP Photo/Sayyid Azim

[Plachinan na página 24, 25]

Denter di un siman e Testigunan a organisá nan reunionnan kristian