Hóbennan Sa Puntra . . .

Mi Mester Buska un Selular?

“Mi ta sinti mi masha insigur i iritá si mi no tin un telefòn selular huntu ku mi.”​—Akiko. *

TELEFÒN selular ta birando mas i mas popular den hopi pais. Nan ta práktiko pasobra bo amigunan i bo mayornan por drenta den kontakto ku bo na tur momentu i na unda ku bo ta, i abo tambe por hasi meskos. Hopi modèl di telefòn ta permití bo manda mensahe kòrtiku, loke ta “e manera mas resien pa hóbennan satisfasé nan deseo pa komuniká,” segun e korant The Times di Lònden. Tin selular ku asta por konektá bo ku Internet i duna bo akseso na Web site i E-mail.

Kisas bo tin un selular kaba, òf bo ta pensando pa buska unu. Den ámbos kaso, lo ta bon pa bo pensa riba e dicho: “Tur medaya tin dos banda.” Ta posibel ku un telefòn selular tin algun benefisio. Sin embargo, lo bo kier pensa tambe riba e otro banda di e medaya. Si bo ta konsiente di su posibel  desbentahanan, lo bo por us’é tòg na un manera sabí si bo disidí di kumpra unu.

“Kalkulá e Gastunan”

Hesus a deklará un bon prinsipio. El a bisa ku hende mester “kalkulá e gastunan” promé ku nan kuminsá ku un proyekto importante. (Lukas 14:28) Nos por apliká e prinsipio ei na telefòn selular? Sigur ku sí. Ta sierto ku awendia bo por haña e telefòn mes pa masha tiki sèn òf asta pòrnada. Sin embargo, manera Henna di 17 aña a deskubrí, “diripiente e resibu di telefòn por bira masha haltu.” Tambe bo por haña bo bou di un preshon konstante pa aseptá servisionan adishonal i kumpra modèlnan mas karu. P’esei e hóben Hiroshi ta bisa: “Mi tin un trabou partaim i mi ta spar pa tur aña mi por kumpra un modèl mas nobo.” Hopi otro hóben ta hasi meskos. *

Asta si bo mayornan bai di akuerdo pa paga e resibu pa bo, tòg ta importante pa bo ta konsiente di e gastunan. Un sirbidó kristian biahero na Hapon a remarká: “Tin mama ta tuma èkstra trabou partaim djis pa nan por paga e kuenta di telefòn selular di nan yunan; i kisas e muchanan no tin ni ègt mester di un selular.” Sigur lo bo no kier pone un karga asina pisá riba bo mayornan!

“Algu pa Mata Tempu”

Hopi hende ku ta kuminsá usa telefòn na un límite moderá, despues ta ripará ku e ta tuma mas di nan tempu ku nan a ferwagt i no ta laga tempu pa kosnan mas importante. Mika tabatin kustumber di pasa hopi tempu ku su famia ora nan ta kome atardi. Pero e ta bisa: “Awor, despues ku nos kaba di kome nos kada un ta bai den nos kamber ku nos mes [telefòn selular].”

Segun e korant The Guardian di Lònden: “Un tersera parti di adulto hóben entre 16 pa 20 aña ta preferá di manda mensahe skirbí via telefòn mas ku tur otro medio di komunikashon skirbí.” Manda mensahe skirbí kisas ta kosta bo ménos plaka ku papia via telefòn, pero bo ta gasta mas tempu na taip e mensahe. Mieko ta atmití: “Si un hende manda un mensahe ku ta bisa ‘pasa bon anochi,’ ami ta kontestá ‘pasa bon anochi.’ Despues, pa un ora largu nos ta keda manda mensahe pa otro. Ta gewon ko’i kèns nos ta manda bisa otro.”

Hopi hende ku ta usa telefòn selular lo por keda masha sorprendí si un dia nan para konta tur e tempu ku nan ta pasa na telefòn den un luna. Teija, un mucha muhé di 19 aña, ta atmití: “Pa hopi hende, un telefòn selular ta algu pa mata tempu kuné en bes di algu pa spar tempu.” Asta si bo tin un bon motibu pa bo tin un selular, ta importante pa bo ta konsiente di tempu ora bo ta us’é.

Un hóben kristian ku yama Marja ta komentá: “Na asambleanan kristian hopi hóben ta sinta manda mensahe pa otro, mensahe ku no ta importante. Ta algu masha gewon!” Algu similar a ser opservá tambe bou di hóbennan ku ta den sirbishi di vèlt. Beibel ta konsehá kristiannan pa hasi bon uso di tempu; kumpra tempu pa aktividatnan spiritual. (Efesionan 5:16) Ta tristu ora ku e tempu presioso ei ta ser usá pa kòmbersá na telefòn!

Komunikashon Sekretu

Marie ta menshoná un otro desbentaha: “Komo ku e yamadanan ta bai direktamente na e persona, no na e kas, tin e peliger ku mayornan no sa ku ken nan yunan ta papia ni ki ora nan ta na telefòn.” P’esei tin hóben ta usa telefòn selular pa nan tin kontakto na sekretu ku personanan di e sekso opuesto. Tin hóben ku a baha nan vigilansia, i a pasa por haltu di normanan ku normalmente nan lo a kumpli kuné ora nan ta komuniká ku otro hende. Kon asina?

E posibilidat pa “manda mensahe via telefòn ta nifiká ku niun hende por kontrolá kiko [hóbennan] ta hasiendo,” segun e korant The Daily Telegraph di Lònden. E echo ku bo no ta mira ni tende e otro persona, por afektá bo. E hóben Timo ta bisa: “Tin hende ta sinti ku un mensahe skirbí via telefòn ta un manera mas neutral pa komuniká. Den un mensahe, algun hende ta skirbi kosnan ku nan lo haña muchu fresku pa bisa kara-kara.”

Ora Keiko, un hobensita kristian di 17 aña, a kuminsá usa telefòn selular, el a duna kasi tur su amiga- i amigunan su number. Djis despues e ku un mucha hòmber den su kongregashon a kuminsá ta manda mensahe pa otro tur dia. Keiko ta bisa: “Na kuminsamentu nos tabata djis papia tokante kosnan di tur dia, pero despues nos a kuminsá konta otro nos problemanan. Nos a krea nos propio pida mundu chikí via nos telefòn selular.”

 Felismente, Keiko a risibí yudansa serka su mayornan i serka e ansianonan kristian promé ku e asuntu a bira demasiado serio. Awor e ta atmití: “Ounke promé ku mi mayornan a duna mi un telefòn selular, nan a spièrta mi mashá tokante manda mensahe pa mucha hòmber, tòg mi a hasié tur dia. Esei no tabata e mihó manera pa usa e telefòn.” *

Beibel ta spièrta nos pa “mantené un bon konsenshi.” (1 Pedro 3:16) Hasi esei kier men ku ora bo ta usa un telefòn selular, bo tin ku hasi sigur ku, manera Koichi ta bisa, “bo no tin motibu pa tin bèrgwensa,” asta si un hende mester lesa bo mensahenan òf tende loke bo ta papia. Semper kòrda ku pa nos Tata selestial nada no ta sekretu. Beibel ta splika: “No tin ningun kriatura skondí pa [Dios] su bista, ma tur kos ta habrí i bisto dilanti di wowo di esun ku nos tin di haber kuné.” (Hebreonan 4:13) P’esei pakiko purba tin un relashon sekretu?

Pone Límite

Si bo tin pensá di buska un telefòn selular, pakiko no evaluá bo situashon bon pa wak si realmente bo tin mester di dje? Kòmbersá ku bo mayornan. Tin ta pensa meskos ku e hóben Jenna, kende a bisa: “Pa hopi hóben, un telefòn selular ta un responsabilidat muchu grandi.”

Asta si bo disidí ku bo ta bai kumpra unu, ta importante pa bo us’é na un manera disipliná. Kon? Dor di pone límite rasonabel. Por ehèmpel, limitá e kantidat di opshon ku bo ta usa òf e kantidat di tempu i plaka ku bo ta gasta na telefòn. Komo ku mayoria kompania di telefòn ta duna bo un spesifikashon di kuantu yamada bo a hasi, lo bo por analisá esei de bes en kuando huntu ku bo mayornan. Tin hóben ta haña ku ta mihó nan usa un telefòn selular ku ta usa karchi prepago ya asina nan ta hasi ménos uso di telefon.

Pensa tambe bon ta ki ora i kon lo bo respondé riba e yamadanan i mensahenan ku bo ta risibí. Bo mes fiha un par di punto rasonabel pa guia bo. Shinji ta splika: “Mi ta chèk mi mensahenan solamente un biaha pa dia, i por lo general mi ta kontestá e mensahenan solamente si nan ta importante. Esei a pone ku mi amigunan a stòp di manda ko’i kèns pa mi. Si di bèrdat tin un problema urgente, nan lo yama mi tòg.” Mas importante ainda, skohe bon ku ken bo ta komuniká. Wak bon ta ken bo ta duna bo number di telefòn. Apliká e mesun normanan ku semper bo ta usa relashoná ku bon asosiashon.​—⁠1 Korintionan 15:⁠33.

Beibel ta bisa: “Tin un tempu stipulá pa tur kos. . . . Un tempu pa keda ketu i un tempu pa papia.” (Eklesiástes 3:​1, 7) Pues ta klaru anto ku tin un tempu pa telefònnan selular tambe “keda ketu.” Nos reunionnan kristian i sirbishi di vèlt ta e “tempu stipulá” pa adorá Dios, no pa usa telefòn. Hopi bes doño di restorant i teater ta pidi nan klientenan pa no usa telefòn selular. Respetuosamente nos ta kumpli ku nan petishon. E Soberano di universo sigur no ta meresé ménos rèspèt!

Hopi hende, si nan no ta spera un yamada importante, ta paga nan telefòn, òf ta pon’é na “silent” ora nan ta partisipando den un aktividat importante. Tin ta pone nan telefòn for di alkanse. After all, no ta asina ku mayoria mensahe por warda?

Si bo disidí ku bo ta bai buska un selular, sea determiná pa abo kontrolá bo uso di e telefòn i no laga e telefòn kontrolá bo. Klaramente, bo tin ku keda alerta i no laga bo uso di telefòn stroba bo di hasi kos ku ta mas importante. Beibel ta animá nos: “P’esei, mira bon kon boso ta kana, . . . [pa boso ta] manera hende sabí.” (Efesionan 5:15) P’esei si bo disidí di tin un telefòn selular, sea determiná pa mustra ku bo ta sabí i rasonabel den e manera ku bo ta us’é.

[Nota]

 [Plachinan na página 20]

Tin hóben ta mantené relashonnan sekretu via telefòn selular