Opservando Mundu

“Soña ku Rikesa”

E kantidat grandi di propaganda ku tin awe ta pone hopi hende pober kere ku nan lo skapa di pobresa dor di partisipá na wega di plaka, ounke en realidat e chèns di gana un suma importante ta masha chikí mes, segun e korant Times of Zambia. E artíkulo ta bisa ku “propaganda di loteria ta stimulá hende pa soña ku rikesa, luho i un bida instantáneamente sin problema,” ounke “nunka nan no ta bisa e hendenan ku nan chèns di gana ta masha chikí.” E korant ta konkluí: “Sin importá ki argumentu hende bini kuné, wega di plaka ta ladronisia di dia kla i e mester ser prohibí pa lei den tur sosiedat ku ta moralmente rekto.”

 Miedu di Skuridat

“Muchanan djawe tin mas miedu di skuridat ku tempu nan mayornan tabata chikí debí ku mas i mas nan ta den lus artifisial, lokual ta nifiká ku masha poko bes nan ta eksperensiá skuridat total,” segun un informe den The Times di Lònden. Aric Sigman, sikólogo i eskritor, a analisá investigashon ku ta demostrá ku kasi dos tersera parti di muchanan bou di dies aña ta insistí pa drumi ku un lus chikí. Sigman ta bisa ku falta di skuridat⁠—⁠asta anochi ora nan ta drumi⁠—⁠ta stroba hóbennan su imaginashon di desaroyá. Segun e informe: “Mucha su imaginashon mester haña espasio pa desaroyá. . . . Ta masha stimulante pa nan por hunga i entretené nan mes den sukú, pasobra tur e imágennan mental ku nan produsí lo ta úniko.” Pero awe, e “imágennan kla trahá ku televishon, sine i weganan di kòmpiuter ta imprimí den mente di mucha” ta spanta nan. Dr. Sigman ta komentá: “E konseho aki ta parse antikuá, pero nos mester ripitié: mester lesa mas i wak televishon ménos.”

Antártika Su Plataforma di Eis Ta Desintegrá

Den un periodo di solamente 35 dia, ku a kuminsá na fin di yanüari 2002, un sekshon di 3.250 kilometer kuadrá di e plataforma di eis Larsen B di e banda ost di e península di Antártika a kibra i parti den míles di ijsberg, segun un informe di e Sentro di Informashon Nashonal di Sneu i Eis di Universidat di Colorado. Gran parti di Antártika ta rondoná pa plachi diki di eis ku ta krese dor di gletsjer (riu di sneu i eis). Pero esnan di e península ta desintegrá debí ku for di final di dékada di 1940 e klima eibanda ta birando un poko mas kayente. Komo ku e plataforma di eis ta drif, e nivel di laman lo no subi mashá dor di e pidanan ku a kibra. Sin embargo, “e plataformanan di eis ta sirbi komo stet òf un sistema pa para e gletsjernan,” segun e informe. “Unabes e plataformanan di eis no t’ei, e gletsjernan . . . por kuminsá basha mas eis den laman ku loke nan ta rekohé komo sneu.” E motibunan pakiko e klima ta bira mas kayente no ta konosí, i e informashon por ta konfuso. Fuera di e península, “e restu di Antártika no ta duna señal ku tur kaminda e ta birando mas kayente,” segun The New York Times. De echo, algun investigashon ta indiká ku e kontinente den su totalidat kisas a bira mas friu durante e último 35 añanan.

China Su Biahenan pa Espasio

Dia 1 di aprel 2002, China su nave espasial Shenzhou III a aterisá sin problema na Mongolia despues di un mishon di un siman den espasio, segun BBC News. E nave no tabatin tripulante humano sino un “hende artifisial,” esta, un manekin ekipá ku kos pa kontrolá nivel di oksígeno i temperatura pa asina nan tèst kiko ta e ekiponan ku lo por usa pa sostené bida riba un futuro buelo ku tripulante. Ofisialnan chines di asuntunan espasial a anunsiá ku nan tin plan pa manda hende den espasio pa mas tardá aña 2005. E informe ta bisa: “E meta di plaso mas largu ku e agensia espasial di China a pone pa su mes ta di hiba hende luna pa aña 2010.”

Pa Grasparkiet, Kolónan Bibu Ta Bunita

Kon grasparkiet ta skohe nan pareha? Esei kisas ta dependé di kon bibu e koló di e para su pluma ta. Grasparkiet su plumanan ta kontené un kímiko ku ta apsorbá lus ultravioleta i ta reflehá esaki bèk, poniendo e plumanan bria ku un koló hel-kòrá fluoresente. Dr. Justin Marshall di Universidat di Queensland, Oustralia, huntu ku su koleganan, a hunta krema kontra solo riba pluma di grasparkiet di mondi pa hasi nan pluma dòf. E korant The Sydney Morning Herald a informá ku “e paranan koló dòf tabata hopi ménos atraktivo pa miembronan di e sekso opuesto.” Marshall ta bisa ku ora e plumanan tin un bon brio probablemente esaki ta indiká ku e para ta di bon kalidat. Ounke e kurpa di sierto otro kriatura kisas ta kontené kímikonan fluoresente, Marshall ta remarká ku ta ‘promé biaha ku a keda demostrá ku mundu di animal ta hasi uso di e koló fluoresente,’ segun e korant.

Leon na Peliger

E revista New Scientist ta informá ku “pronto leon lo por stòp di eksistí den gran parti di Áfrika.” Mester tin un poblashon di 500 pa 1.000 leon den un lugá, pa haña 100 pareha ku ta produsí yu. E kantidat aki ta sufisiente pa evitá ku nan ta rasa ku famia muchu djaserka. Segun e organisashon Union di Konserbashon Mundial, e poblashonnan di leon den parti wèst i parti sentral di Áfrika ta hopi mas tiki ku e kantidat ei. Hans Bauer di Universidat di Leiden na Hulanda a bisa: “E situashon ta serio. No tin ni un poblashon ku nos por ta sigur ku lo sigui eksistí.” E motibu prinsipal ku nan ta bai atras ta ku hende ta kita tereno for di e bestianan su habitat. Leon tin mester di un área grandi pa yag; un solo leon machu tin mester di te ku 200 kilometer kuadrá. Segun un atvertensia di Bauer: “Leon ta un rasa klave di kua otro bestianan ta dependé. E echo ku leon ta ser menasá ta un atvertensia. Esei lo por nifiká ku aki 20 pa 30 aña, otro bestianan lo por ta den peliger.”

Riesgonan di Zonnebank

“Usadónan di zonnebank (banki ku lus artifisial pa kima bira brùin) tin dos biaha mas tantu chèns di haña kanser di kueru, i hóbennan ta kore mas riesgo ainda,” segun e korant The Guardian di Lònden. Profèser Margaret Karagas di Skol Médiko di Darmouth (New Hampshire, Merka), a entrevistá 1.500 hende entre 25 pa 74 aña di edat. Di e hendenan ei mas ku mitar a kaba di ser diagnostiká ku kanser di kueru. The Times of London a bisa ku e chèns di haña kanser ta oumentá “ku 20 porshentu pa kada dies aña ku un hende a usa zonnebank promé ku e hasi 50 aña.” Profèser Karagas ta bisa: “Lampinan ku hende ta usa pa kima bira brùin ta imitá lus di solo [ku] un kantidat intenso i konsentrá di radiashon ultravioleta.” Kompará ku e dékada di 1960, na Gran Bretania tin awor tres biaha mas tantu hende ta muri di kanser di kueru, i na Eskosia esei ta kuater biaha mas tantu. Ekspertonan ta bisa ku e kousa di e kantidat di mortonan ei ta debí ku hende ta eksponé nan mes mas tantu na rayonan ultravioleta dor di zonnebad i dor di usa lampinan pa kima bira brùin. Un bosero di e organisashon Investigashon di Kanser na Reinonan Uní a bisa: “No ta eksistí ku bo ta kima haña un koló brùin sin riesgo. Eigenlijk ora bo koló bira brùin, esei ta un forma ku bo kurpa ta reakshoná riba daño kousá na su DNA.”

“Tankinan di Awa” na Peliger

Mitar di e poblashon di mundu ta dependé di awa dushi for di seru, segun The Toronto Star di Kánada. E serunan aki ta kore grave peliger. Den un rapòrt di Nashonnan Uní pa marka e Aña di Seru, nan ta ser yamá e “tankinan di awa di mundu.” Segun Star, e daño ta ser kousá dor di “kambio di klima, polushon, konflikto armá, oumento di poblashon, destrukshon di selva i mal uso di nan di parti di industrianan di agrikultura, mina i turismo.” Segun e korant, e rapòrt ta spièrta ku “e deterioro aki lo hiba na mas inundashon, skùifmentu di tera i hamber.”

Adikto na Alkohòl

The Independent di Lònden ta informá ku awor 1 di kada 13 hende na Gran Bretania ta adikto na alkohòl. Esei ta hasi adikshon na alkohòl “dos biaha mas komun ku adikshon na droga òf remedi.” Di 1994 pa 1999 tabatin un oumento di 43 porshentu den e kantidat di morto direktamente relashoná ku mal uso di alkohòl, entre otro kousá dor di malesa di kurason, malu di igra i venenamentu ku alkohòl. Aksidentenan di outo kousá dor di shofùr burachi a subi di 10.100 na 1998 pa 11.780 na 2000, i nan tabata responsabel pa 1 di kada 7 morto riba kaminda. Sesenta porshentu di doñonan di trabou tin problema ku trahadó ku ta bebe di mas, i 40 porshentu di esnan ku ta kometé krímennan violento ta hasi esei bou di influensia di alkohòl. Eric Appleby, direktor di e fundashon britániko Preokupashon ku Alkohòl, a bisa: “E gran eskala di e problemanan pa loke ta nan impakto riba hende su salú, relashonnan sosial i pòtmòni, pa no papia mes di servisionan públiko, . . . ta reforsá e nesesidat di akshon urgente i uní.”