Ora Erornan Chikí Ta Bira Desaster

DIA 6 di yüli 1988, trahadónan riba e boortoren Piper Alpha den Noordzee a kuminsá drecha un mashin ku ta pòmp gas kondensá, pero nan no a kaba e trabou. Falta di bon komunikashon entre e trahadónan a pone ku esnan ku a subi warda despues a sende e pòmp okashonando un kandela. Komo ku nan tabata traha te den laira riba laman, sin niun kaminda di eskape, 167 persona a muri.

Diesdos aña despues, dia 25 di yüli 2000, un avion supersóniko Concorde tabata aselerá riba pista di Aeropuerto Charles de Gaulle na Paris, Fransia. Segun ku e avion a kohe velosidat, un pida chikí di metal titanio ku tabatin bentá riba pista a pone un tayer eksplotá, i esei na su turno a kibra un tanki di gasolin den e ala. Kombustibel a drenta den e motornan na banda robes, lokual a stroba nan di haña koriente i a forma un vlam di kandela di 60 meter. Despues di dos minüt, e avion a dal den un hotèl, matando tur hende abordo i tambe algun hende riba tera.

Reflekshonando riba e tipo di aksidentenan ei, James Chiles ta bisa den su buki Inviting Disaster​—⁠Lessons From the Edge of Technology (Invitashon pa Desaster​—⁠Lèsnan for di Alto Teknologia): “Den nos mundu nobo, rondoná pa mashinnan ku de bes en kuando ta pèrdè kontròl, nos tin ku rekonosé e daño ekstraordinario ku erornan ordinario por kousa awor.” Komentando riba e buki di Chiles, e revista Science ta bisa: “E avanse rápido i ekstraordinario di siensia i teknologia durante e último par di shen añanan tabata eksitante. E ta duna nos e sintimentu ku kasi no tin límite na nos posibilidat pa komprondé i manipulá e mundu físiko. [Pero] no tin ningun motibu pa nos pensa ku awor nos ta ménos inkliná na hasi eror ku ántes.”

Relashoná ku teknologianan mas peligroso, Science ta bisa: “Asta un riesgo masha chikí [di eror] ta di mas. Pa e teknologianan ei, nos mester insistí riba perfekshon.” Pero humanidat su logronan di pasado ta indiká ku perfekshon ta posibel? Nò! Pues, desasternan kousá dor di vários tipo di eror sin duda lo sigui tuma lugá.

Pero nan lo no sigui pa semper. Hende temeroso di Dios por spera un futuro den kua hende lo no pèrdè nan bida trágikamente debí na eror òf limitashon humano. Kon bini? Pasobra Dios, mediante su gobièrnu selestial, lo eliminá tur kousa di morto, pena i doló.​—⁠Mateo 6:​9, 10; Revelashon 21:​3, 4.

[Rekonosementu pa Potrèt na página 31]

AP Photo/Toshihiko Sato