Un Reenkuentro Úniko Despues di 30 Aña

NA 1967 dos hóben a konosé otro pa kasualidat. Nan a ser asigná komo kompañero di kuarto na Universidat Tékniko di Michigan, Merka. Dennis Sheets, di Lima, Ohio, tabatin 18 aña e tempu ei i a kuminsá ku su promé aña di estudio di kultivo di selva. Mark Ruge di 20 aña a bini di Buffalo, New York. E tabatin tres aña ta studia bouwkunde.

E tempu ei nan amistat kisas a parse algu breve i pasahero. Nan niun di dos no a sigui ku nan edukashon universitario; kada un a kohe su propio rumbo. Mas ku trinta aña a pasa. Anto un dia na Repúblika Dominikana, e dos hòmbernan ta topa kara-kara atrobe. Te na sierto grado, e reenkuentro sorprendente aki tabata un kasualidat. Pero tabatin un otro faktor mas ku ta responsabel p’esei. Kiko esei tabata? Pa haña e kontesta, laga nos analisá e rumbonan separá di nan bida.

Dennis Ta Bai Guera

Dennis a bai kas bèk despues di su promé aña di universidat. Anto na desèmber 1967, e ta ser reklutá pa ehérsito merikano, i na yüni 1968 nan ta mand’é Vietnam. Einan e ta mira e horornan di guera. Ora su tempu asigná a kaba na 1969, e ta bolbe Merka i ku tempu ta haña trabou na un kompania grandi na Ohio. Sin embargo, e no tabata satisfecho.

Dennis ta splika: “For di mucha mi tabata soña ku muda pa Alaska i bira un kunukero.” P’esei na 1971, huntu ku un amigu di skol sekundario, Dennis ta kuminsá traha pa kumpli ku e soño ei. Nan ta bai Alaska, pero en bes di bira kunukero, e ta kohe djòp. Pa un tempu e tabata biba den un tènt i tabatin e trabou di vigilá pa kandela di mondi. El a laga su barba krese i a kuminsá huma mariwana.

Na 1972 Dennis a bandoná Anchorage, Alaska, p’e bai eksperensiá e karnaval di Mardi Gras na New Orleans, Lousiana. Despues di esei, el a traha un kas chikí den mondi di Arkansas. Einan e tabata traha frame di palu pa kas i pleister betòn. Na yüni 1973 Dennis ta kuminsá biaha rònt Merka dor di pidi left, en buska di un propósito den bida.

Mark den e Movementu Kontra Guera

Mark a keda universidat un par di semèster mas despues ku Dennis a bai, pero despues el a disidí ku e no kier bira parti di e sistema ku ta apoyá guera. P’esei el a bai Buffalo bèk, kaminda el a traha komo forman na un fábrika di stal. Ketu bai malkontentu ku e asuntunan di guera, el a kita for di trabou, kumpra un motosaikel i a biaha bai San Francisco, California, na e otro banda di Merka. Ounke nan no tabata sa esei, pa un periodo Dennis ku Mark tabata na San Francisco durante e mesun tempu.

Meskos ku Dennis, Mark tambe a laga su barba i kabei krese i a kuminsá usa mariwana. Pero Mark tabata masha enbolbí den e movementu kontra guera, i tabata partisipá den marchanan di protesta. FBI tabata busk’é pasobra e no a mèldu pa servisio militar, p’esei pa algun aña e tabata usa nòmbernan falsu pa nan no hañ’é. Na  San Francisco e tabata hiba un bida di hippie, anto ta einan, na 1970, dos Testigu di Yehova a yama na su porta.

Mark ta splika: “Nan mester a sinti ku mi a mustra un poko interes, pasobra nan a bolbe pasa. Mi no tabata na kas, pero nan a laga un Beibel bèrdè i tres buki.” Sin embargo, Mark no a traha tempu pa lesa nan pasobra e tabata muchu okupá ku aktividatnan polítiko i ku dibertí su mes. Ademas, FBI tabata busk’é sinfin. P’esei bou di un otro nòmber falsu, el a muda bai Washington, D.C. Su amiga, Kathi Yaniskivis, ku el a topa na universidat, a djòin e einan.

Finalmente na 1971, FBI a gara Mark. Dos agente di FBI a eskolt’é riba un vuelo for di Washington, D.C., pa New York i nan a hasi sigur ku el a sigui bula pa Toronto, Kánada. Evidentemente FBI no a konsider’é un menasa pa órden sivil; simplemente nan tabata kier pa e sali for di e pais. E siguiente aña e ku Kathi a kasa, i nan a muda bai Gabriola Island, British Columbia, Kánada. Nan kier a skapa for di sosiedat, sin embargo nan tabata sinti ku bida mester tin un propósito.

Nan Ta Bira Testigu di Yehova

Manera bo sa, Dennis tabata biaha rònt Merka ku left en buska di un propósito den bida. Su biahe a hib’é Montana, kaminda el a haña un djòp pafó di e stat Chinook. E tabata yuda un kunukero durante e kosecha di grano. E hòmber su kasá i su yu muhé tabata Testigu di Yehova. Nan a duna Dennis un revista Spièrta! p’e lesa. No a tarda hopi ku el a keda konvensí ku Testigunan ta praktiká e religion berdadero.

Dennis a muda bai Kalispell, Montana, ku un Beibel den su poder. Einan el a asistí na su promé reunion di Testigunan di Yehova. Na e reunion ei el a pidi un studio di Beibel. Djis despues, el a kòrta su kabei i feita su barba. Na yanüari 1974 el a sali bai prediká pa promé biaha, i dia 3 di mart 1974 el a batisá na Polson, Montana, den un baki pa bestia bebe awa.

Miéntras tantu Mark ku Kathi, bibando na Gabriola Island, a disidí ku nan ta bai purba investigá Beibel ya ku nan tabatin tempu pa esei. Nan a kuminsá lesa e vershon King James, pero e ingles antikuá tabata poko difísil pa nan komprondé. E ora ei Mark a kòrda ku ainda e tabatin e Beibel i e bukinan ku e Testigunan a dun’é añanan promé. Nan a lesa e Beibel huntu ku e bukinan E berdad cu ta hiba na bida eterna i E Bijbel realmente ta Palabra di Dios? Mark ku Kathi a keda profundamente impreshoná ku loke nan a lesa.

Mark ta splika: “Loke foral a impreshoná mi tabata e echo ku e buki Berdad ta menshoná un grupo di kristian ku lo no a bai guera bou di ningun sirkunstansia. Pa mi, ta hende asina tabata praktiká berdadero kristianismo.” Djis despues, Mark ku Kathi a bolbe Houghton, Michigan, pa bishitá e famianan di Kathi, apesar di e riesgo di ser arestá. Einan, ainda ku nan aparensia di hippie, nan a asistí na un reunion di e Testigunan. Nan a aseptá un studio di Beibel i a studia durante e luna ku nan tabata na Michigan.

Ora nan a regresá Gabriola Island, nan a topa un Testigu den kaya na Nanaimo, British Columbia, i nan a splik’é ku nan tabata kier un studio di Beibel. E mesun dia ei un outo yen di Testigu a bini ku fèri na e isla pa tuma kontakto ku nan, i nan a kuminsá un studio di Beibel. Tres luna despues, Mark ku Kathi a kuminsá prediká. Anto tres luna despues di esei, dia 10 di mart 1974, tur dos a batisá. Un siman despues ku Dennis a batisá!

Dennis den Sirbishi di Tempu Kompletu

Dennis a bira pionero, òf predikadó di tempu kompletu, na sèptèmber 1974. E ta bisa: “Mi tabata masha felis ku mi trabou di pionero, pero mi kier a hasi mas; p’esei na yüli 1975 mi a inskribí pa sirbi na e sede mundial di Testigunan di Yehova na Brooklyn, New York. Na desèmber di e aña ei mi a haña invitashon pa bai einan.”

Dennis su promé asignashon tabata pa yuda den e trabou di kombertí e eks-Hotèl Towers den un residensia pa e personal di e sede. El a traha vários aña einan, supervisando e ponementu di mosaiko. Despues, komo ku e kier a kasa, el a muda bai California. Na 1984, tempu ku e tabata sirbi komo ansiano den e kongregashon di Cathedral City, el a kasa ku un pionero ku yama Kathy Enz.

 Dennis ku Kathy tabata determiná pa mantené nan bida simpel afin ku nan por a okupá nan mes ku asuntunan ku tabatin di haber ku e Reino di Dios. P’esei hopi biaha Dennis tabata nenga oportunidatnan pa gana hopi plaka riba tereno di konstrukshon den sùit di California. Na 1988 e ku Kathy a inskribí pa yuda den e trabou di konstrukshon internashonal di Testigunan di Yehova. Na desèmber di e aña ei, nan a risibí e asignashon pa traha riba e proyekto di konstrukshon di sukursal na Buenos Aires, Argentina.

Na 1989, Dennis ku Kathy a haña e invitashon pa sirbi den e trabou di konstrukshon di Testigunan di Yehova na un manera mas permanente. Den e sirbishi di tempu kompletu spesial aki, nan a sirbi dos biaha na Sürnam i Kolombia. Tambe nan a traha riba konstrukshon di sukursal na Ekuador i Mèksiko i na Repúblika Dominikana.

Mark den Sirbishi di Tempu Kompletu

Na 1976, Mark huntu ku míles di otro hòmber hóben merikano ku a hui bai Kánada pa nan no drenta servisio militar, a haña pordon general serka gobièrnu merikano. E ku su kasá Kathi, tambe kier a mantené nan bida simpel afin di por dediká mas tempu na nan sirbishi. P’esei Mark a traha partaim komo mididó di tereno, i pokopoko e ku Kathi a paga e debenan ku nan a akumulá promé ku nan a batisá.

Na 1978, ora ku e Testigunan na Kánada tabata planea pa traha un edifisio di sukursal nobo pegá ku Toronto, Ontario, Mark ku Kathi tabata den posishon pa ofresé nan servisionan. Siendo ku Mark tabatin eksperensia den midimentu di tereno, nan a haña invitashon pa partisipá den e konstrukshon. Nan a traha riba e proyekto na Georgetown te ora el a terminá na yüni 1981. Despues di esei nan a muda bai bèk British Columbia i durante e siguiente kuater añanan nan a yuda ku konstrukshon di un Salòn di Asamblea di Testigunan di Yehova einan. Ora esei a ser kompletá, nan a bolbe haña invitashon pa bin traha riba ekspanshon di e sukursal di Kánada.

Na 1986, despues di algun luna na Georgetown, nan a invitá Mark ku Kathi pa keda komo miembronan regular di e sukursal di Kánada. For di e tempu ei nan ta parti di e personal i tambe nan a haña masha oportunidat pa partisipá den trabou di konstrukshon den hopi otro pais. Debí na Mark su eksperensia den midimentu di tereno, a kuminsá us’é pa midi tereno pa edifisionan di sukursal i pa Salònnan di Asamblea di Testigunan di Yehova na Sur- i Sentroamérika i na islanan di Karibe.

Den transkurso di añanan, e ku Kathi a sirbi na Venezuela, Nikaragua, Haiti, Guyana, Barbados, Bahámas, Dominika, Merka (Flórida) i Repúblika Dominikana. Ta e sirbishi di tempu kompletu spesial aki a pone Mark ku Dennis topa un biaha mas.

Reenkuentro na Repúblika Dominikana

Sin ku nan tabata sa, Mark ku Dennis tabata traha riba proyektonan similar na Repúblika Dominikana. Un dia nan a topa otro pa kasualidat na e sukursal di Testigunan di Yehova na Santo Domingo. Manera bo mes por imaginá, nan tabata masha kontentu di por a bolbe siña konosé otro. Kon ku bai bini, nan tur dos tabata 33 aña mas bieu i tabatin hopi kos di konta otro di nan bida. Ku kresiente asombro nan a interkambiá  ku otro gran parti di loke bo a kaba di lesa. Pero loke tabata mas remarkabel pa nan​—⁠i tambe pa tur hende ku nan a konta nan eksperensia​—⁠tabata e hopi similaridatnan ku tabatin den nan bida.

Tur dos a hiba un bida di hippie i a muda pa áreanan isolá pa libra di e estilo materialista di bida moderno ku tur su inkietutnan. Dennis a kasa ku un mucha muhé ku yama Kathy; Mark a kasa ku un mucha muhé ku yama Kathi. Tur dos hòmber a aseptá un studio di Beibel ora nan a asistí na nan promé reunion di Testigunan di Yehova. Tur dos a batisá na mart 1974. Tur dos a bira miembro di e famia di sukursal di Testigunan di Yehova: Dennis na Merka i Mark na Kánada. Tur dos a hasi esfuerso pa tene nan bida simpel afin di por alkansá metanan spiritual. (Mateo 6:​22, NW ) Tur dos a bira enbolbí den konstrukshon internashonal i a risibí asignashon den vários pais. Te ku e dia ku nan a topa otro pa kasualidat na Repúblika Dominikana, niun di dos no a topa niun amigu bieu ku a aseptá e bèrdat di Beibel.

Mark ku Dennis ta atribuí e koinsidensianan remarkabel aki na destino? Apsolutamente ku nò. Nan ta rekonosé ku manera Beibel ta bisa, “tempu i suseso imprevisto ta kai riba [nos] tur,” i tin biaha den maneranan masha interesante. (Eklesiástes 9:​11, NW ) Sin embargo, tambe nan ta rekonosé ku tabatin un kos mas ku a hunga un ròl den nan reenkuentro: nan tur dos tabata buska un propósito den bida i nan tabatin amor pa Yehova Dios.

E historia aki di Dennis ku Mark ta resaltá tambe algun kos ku tur hende di kurason sinsero ku siña e bèrdat di Beibel tin en komun. Dennis ta komentá: “Loke ami ku Mark a eksperensiá ta demostrá ku Yehova ta konsiente di e situashon di bida di hende, i ku ora nan kurason haña e disposishon korekto, e ta hala nan serka dje.”​—⁠2 Krónikanan 16:9; Huan 6:44; Echonan 13:⁠48, NW.

Mark ta agregá: “Tambe nos eksperensia a yuda nos komprondé ku ora un hende adaptá su mes na e normanan di Yehova, dediká su bida na dje i hasi su mes disponibel, Yehova por usa e persona aki su talento- i abilidatnan pa promové adorashon berdadero na benefisio di Su pueblo.”​—⁠Efesionan 4:⁠8.

Tambe nan eksperensia ta mustra ku Yehova Dios ta bendishoná e sirbishi di henter alma ku su pueblo ta rindi. Dennis ku Mark sigur ta sinti nan mes bendishoná. Dennis ta bisa: “Ta un privilegio di por sirbi na fabor di interesnan di Reino den sirbishi spesial di tempu kompletu. Esei a permití nos disfrutá di un interkambio di estímulo i a la bes traha ku rumannan kristian di tur parti di mundu.”

Mark ta agregá: “Yehova definitivamente ta bendishoná esnan ku pone su Reino na promé lugá. Pa mi, e echo ku mi por sirbi komo miembro di e famia di sukursal di Kánada i di partisipá den konstrukshon internashonal, ta un bendishon spesial.”

Un reenkuentro úniko? Sí, pasobra manera Mark a bisa: “E berdadero motibu dikon nos a keda asina emoshoná ora nos a topa otro ta ku nos tur dos a siña konosé, stima i sirbi e Dios úniko, Yehova.”

[Plachi na página 18]

Dennis, 1966

[Plachi na página 18]

Mark, 1964

[Plachi na página 20]

Dennis na South Dakota, 1974

[Plachi na página 20]

Mark na Ontario, 1971

[Plachi na página 21]

Dennis ku Mark, huntu ku nan kasánan, djis despues di nan reenkuentro inesperá na 2001