Amor den Akshon—Un Trabou di Ousilio Maratóniko

RICHARD VARA, redaktor baké di e korant Houston Chronicle, no ta un persona ku ta ser impreshoná fásilmente, pero aña pasá sí esei a sosodé. “Nunka mi no a mira un kos asina!” el a sklama. “Mi no por kere mi bista.” Lee P. Brown, alkalde di Houston, (Texas, Merka) a ekspresá e mesun sintimentu. El a bisa: “Mare tur hende na Houston por a mira loke boso a hasi. Mi ta sumamente impreshoná.” Kiko tabata e tópiko di nan komentario? E redaktor i e alkalde tabata papia di e trabou di ousilio ku Testigunan di Yehova a hasi na Houston. Kiko e trabou aki a enserá? Dikon e tabata nesesario? I kiko a hasié asina impreshonante? Pa haña e kontesta, laga nos kuminsá na prinsipio.

E Pió Inundashon di Houston

Na prinsipio di yüni 2001, Allison, un tormenta tropikal feros a asotá e área plat di sùitost Texas. Al final, riba djabièrnè 8 di yüni, Allison a basha den un periodo di 24 ora, un meter di áwaseru torensial riba Houston, e di kuater stat mas grandi di Merka. * Den poko tempu, e awa ku tabata subi a drenta tienda, ofisina i míles i míles di kas. Kareteranan prinsipal rònt di e stat a bira riunan violento ku a tapa outonan bandoná i trùknan grandi. E awa tabata asina haltu ku ni trùknan di brantwer ni otro vehíkulonan di reskate no por a pasa riba e kareteranan inundá. Mester a manda buska yudansa di helikòpter i vehíkulonan militar pisá pa reskatá hende.

Finalmente, ora shelu a klara riba djaluna 11 di yüni, tabata bisto ku Allison a kousa vários morto i masha hopi daño material. Bintidos hende a pèrdè nan bida, entre nan dos Testigu di Yehova: Jeffrey Green, un ansiano kristian, i su kuñá Frieda Willis. * Ademas, alrededor di 70.000 kas a sufri daño, hasiendo e inundashon aki un di e pió desasternan ku hamas a asotá un stat grandi asina. De echo, e daño material di 5 mil mion dòler ku Allison a kousa, a hasié e tormenta tropikal mas kostoso den historia merikano.

Un Avalancha di Boluntario

E habitantenan tabata den shòk. Un di e dunadónan di ousilio a bisa: “Nan kama tabata muhá. Nan tapeit tabata muhá. Nan potrètnan di beibi a bai pèrdí.” Hopi di e mas ku 16.000 Testigunan di Yehova ku tin den e área di Houston a sufri pèrdida. Ocho Salòn di Reino i sentenáres di kas di Testigunan di Yehova a sufri daño. Algun di e kasnan aki a yena ku vários centimeter di awa, otronan tabatin awa te na dak. Na tur, mas ku 80 kongregashon di Testigunan di Yehova a ser afektá. Sin embargo, no a laga e víktimanan aki pa nan kuenta. Un par di dia despues di e inundashon, un avalancha di boluntario a bini al reskate. Kon esaki a sosodé?

Asta promé ku e awanan di e inundashon a kuminsá baha, ansianonan kristian di e kongregashonnan di Testigunan di Yehova na Houston a drenta akshon. Un ansiano a konta: “Nos a bèl i bishitá nos rumannan. Kaba nos a kalkulá e daño, i pa djaluna 11 di yüni, nos a kompilá un rapòrt kompletu ku a menshoná tur esnan ku a sufri pèrdida, e kantidat di kasnan ku a sufri daño i kon grandi e daño tabata. Anto nos a manda e rapòrt aki pa e sede di Testigunan di Yehova na Brooklyn, New York.” Un par di dia despues, e ofisina di sukursal di Testigunan di Yehova na Merka a instalá un komité di ousilio ku a konsistí di ocho ansiano kristian di  Houston i a perkurá e fondonan finansiero pa duna ousilio. Kiko tabata e tarea di e komité? Yuda e víktimanan rekuperá emoshonalmente i tambe drecha e kasnan dañá di Testigunan di Yehova. Tabata trata di mas ku 700 kas!

‘Kon nos ta bai tèkel e tarea inmenso aki?’ e miembronan resien nombrá di e Komité di Ousilio di Houston 2001 di Testigunan di Yehova a puntra nan mes. Nan tabata traha te anochi lat pa forma un plan inisial i a invitá e mas ku 160 kongregashonnan di Testigunan ku tin den e área di Houston pa yuda. E presidente di e komité a konta: “E reakshon tabata tremendo. Mas ku 11.000 Testigu a skirbi nòmber, i a ofresé nan tempu, labor i fishi pa yuda sin ku nan lo a risibí pago pa esei.”

Beskein i Boluntario

Un par di dia despues di e inundashon, boluntarionan a kuminsá traha riba e kasnan di e víktimanan, kitando tapeitnan muhá, flur i muraya dañá, kashinan yen di awa, portanan tur trosé i tur otro kos ku a susha ku e awa di inundashon kontaminá ku awa di riolering. Un boluntario a bisa: “Nos no a preokupá solamente pa drecha kas di nos rumannan, sino tambe pa protehá nan salú.” Komo ku beskein venenoso lo a kuminsá krese umbes tras di muraya i den kashi, e promé kos ku nan mester a hasi ta desinfektá e kasnan kompletamente.

Pa siña hasi e trabou na un manera safe, vários Testigu a pidi training serka e Agensia Federal pa Kombatí Kalamidat (FEMA), un agensia  gubernamental ku ta spesialisá den trata ku desaster. Despues di esei, kada Testigu entrená pa FEMA a invitá dies boluntario pa bai kuné na un kas ku a sufri daño. Einan e ta siña nan kon pa desinfektá e kas debidamente. E siguiente dia, kada un di e dies boluntarionan ei resien entrená, na nan turno ta bai ku dies otro boluntario. Un boluntario a konta: “Den un par di dia tabatin sentenáres di hende ku tabata sa kon pa hasi e trabou aki.” E beskein simplemente no por a plama mes lihé ku e kresiente kantidat di boluntario! Penshonadonan i teenagernan ku tabatin fakansi di skol tabata traha den dia. Anochi, otro boluntarionan a tuma over i a sigui ku e trabou. Den seis siman tur e kasnan kontaminá di e Testigunan tabata limpi i safe.

Un Sentro di Kordinashon i Shete Sentro Regional

Entretantu e komité di ousilio a kumpra un kantidat grandi di gipsplaat i tonelada di otro material di konstrukshon. Pero unda por a warda nan? E bosero di e komité di ousilio a relatá: “Ora manager di un kompania a tende di nos nesesidat, el a ofresé nos un lugá di depósito grátis. E lugá tabatin un superfisie di 5.000 meter kuadrá!” Fuera di warda material di konstrukshon, e depósito tabatin sufisiente lugá pa pone  ofisina. No a tarda hopi ku el a bira e sentro di kordinashon di e trabounan di ousilio, kaminda un 200 pa 300 boluntario tabata traha den dia, anochi i wikènt.

Komo ku e kasnan ku a sufri daño tabata situá den un área masha grandi, nan a establesé sentronan regional di ousilio den shete Salòn di Reino. Den wikènt kada sentro tabata kankan di boluntario. (Wak e kuadro “Sentro di Aktividat.”) Hopi di e boluntarionan ei a yega di traha huntu riba konstrukshon di Salònnan di Reino den e region. De echo, tabatin boluntario ku fishi di konstrukshon for di 11 Komité di Konstrukshon Regional di Arkansas, Louisiana, Oklahoma i Texas, ku a bin duna un man. * Den kada sentro regional, e trahadónan di fishi, ku a inkluí karpinté, fèrfdó i pipefitter, a dirigí kosnan i a train otro personanan.​—⁠Wak e kuadro “Programa di Training.”

Un Plan i un Banko di Informashon

E boluntarionan a traha segun un plan di konstrukshon ku a konsistí di shete fase. Nan a entregá material di konstrukshon na e kasnan den kuater kargamentu, i a programá e trabou di reparashon pa tuma lugá den tres wikènt. Di e manera aki nan lo a kompletá henter e trabou di ousilio den mas o ménos seis luna.

Pa e plan por funshoná, e komité a forma 22 departamentu, inkluso di kompra, akomodashon, transporte i logístika. Tur departamentu a risibí yudansa di e informashon ku tabatin den un banko di dato ekstenso ku e boluntarionan a desaroyá. Promé ku e trabounan di reparashon a kuminsá, e boluntarionan a pasa dies dia hinkando informashon den kòmpiuter. Un boletin di notisia a bisa: “Tabata un máratòn di hinka dato.” Sin embargo, na final di e “máratòn” ei nan tabatin un kolekshon di datonan útil na nan disposishon. Ku un solo click di e mouse di un kòmpiuter, e banko di dato a mustra ki ora kualkier un di e 11.000 boluntarionan lo tabata disponibel, ki abilidat òf fishi e tabatin, i kon pa tuma kontakto kuné. Ku un otro click, nan a mira e posishon di e reparashonnan, e pèrmitnan di konstrukshon ku nan tabatin mester i otro detayenan di e kasnan ku a sufri daño. E banko di dato ei a bira konosí komo “e kurason di e trabou di ousilio.”

Yen di Emoshon i Gratitut

Boluntarionan baké den konstrukshon di kas a bishitá e kasnan ku tabata seku i sin beskein pa determiná kiko mester hasi pa drecha e daño. E bosero a splika: “E boluntarionan aki tabata kalkulá e kantidat di material ku lo tabatin mester te den e detaye di mas chikí: asta e kantidat di klabu. Nos no kier a malgastá e fondonan ni material ku nos a risibí komo donashon.” Na mesun tempu tabatin otro boluntario ku a bai buska e pèrmitnan nesesario di konstrukshon serka funshonarionan di gobièrnu.

Despues famianan afektá a haña e invitashon pa bini na e depósito pa skohe for di un selekshon limitá di tapeit, kashi, linoli i otro artíkulonan  pa remplasá loke nan a pèrdè. E víktimanan di inundashon su hemut tabata yena i hopi bes nan a yora ora nan a mira tur loke a ser perkurá pa nan. Tambe nan a risibí konseho for di boluntarionan ku tabata eksperto den asuntu di seguro i reglanan di gobièrnu. Kaba a programá un dia pa drecha e kasnan, i riba e fecha eksakto ku e gruponan di trahadó tabatin mester di e material di konstrukshon, boluntarionan ku a kore trùk a entregá nan. Un persona ku no ta Testigu a bisa su esposa Testigu ora e rumannan tabata drecha nan kas: “Bo rumannan ta un maravia. Un grupo di trahadó ta bai, i un otro ta kore yega. Nan ta traha manera vruminga!”

Reparashonnan básiko a dura un tres wikènt pa kada kas. E presidente di e komité a bisa: “Pero de bes en kuando, esei a dura sinku te asta ocho siman.” Loke tabata pasa ta ku ora nan kita muraya di kasnan mas bieu, e boluntarionan hopi bes a ripará ku tabatin daño bieu, i nan no kier a pone muraya nobo sin drecha promé e problemanan bieu aki. Un boluntario ku ta hòmber di fishi a bisa: “Tabatin biaha ku nos a mira ku e erantenan di palu tabata pèstá ku komehein, pues nos tabata hasi sigur di eliminá e komeheinnan. Nos mester a kambia erantenan di hopi kas pa nos por a drecha kosnan. Nos a laga e kasnan den bon kondishon.” Un víktima di inundashon a ekspresá e sintimentu di hopi otro doño di kas ora ku yen di gratitut el a bisa un bishitante: “Mi kas ta mihó awor ku ora m’a kumpr’é!”

 Kuminda Rápido

Pa perkurá kuminda pa tur e kantidat di boluntarionan ei, un grupo di Testigu a transformá un lugá di depósito tras di un Salòn di Reino den un sentro di prepará i repartí kuminda. Testigunan di tur parti di Merka a kontribuí ku frishidèr, frizer, dishwasher, stof i otro aparato di kushina. Tur djasabra i djadumingu, 11 kòki i un 200 boluntario tabata prepará míles di tayó di kuminda den e sentro. E boluntario ku tabata supervisá e kushina aki a bisa: “Nos tin 19 aña ta prepará kuminda pa proyektonan di konstrukshon di Salòn di Reino, pero e proyekto aki tabata mas grandi di loke hamas nos a imaginá.”

Nan tabata paketá e kumindanan den 120 baki grandi. I tabata hinka nan den 60 vehíkulo, ku a entregá e kumindanan na tur e sentronan regional i esun di kordinashon. Miéntras tantu, kada grupo ku tabata traha riba un kas, a manda un boluntario na e sentro regional na kua nan ta asigná, pa buska kuminda pa henter e grupo. E boluntarionan tabata kome nan kuminda den e kas i despues a sigui mesora ku nan trabou.

Mishon Kumplí!

Finalmente, na aprel 2002, e 11.700 boluntarionan a yega e liña final di un di e kampañanan di ousilio di mas grandi ku Testigunan di Yehova a yega di organisá. E boluntarionan a dediká 1.000.000 ora na drecha òf rekonstruí un total di 8 Salòn di Reino i 723 kas. Un di e víktimanan di e inundashon a papia pa hopi otro víktima ora el a bisa ku lágrima di gratitut: “Mi ta gradisí Yehova i e boluntarionan pa tur e yudansa ku nan a duna. Komo miembro di un hermandat amoroso mi a haña hopi sosten!”

[Nota]

[Kuadro/Plachi na página 15]

SENTRO DI AKTIVIDAT

Ta djasabra mainta 7’or na Sentro Num. 4, den parti nortost di Houston. Boluntarionan ta papia ku otro, hari, bebe kòfi i kome donut den e Salòn di Reino. Tin di nan a kore sentenáres di kilometer ku outo for di nan kas pa yega akinan. Pero banda di 7:30 e kòmbersashonnan alegre ta plakia, i e superintendente di e sentro regional ta tuma algun minüt pa konsiderá un teksto bíbliko. Tambe e ta anunsiá ku djadumingu mainta 7:30 lo tene un Studio di Toren di Vigilansia promé ku e boluntarionan bai na nan lugá di traha, i e ta animá tur presente pa partisipá den e studio dor di duna nan komentario sea na ingles òf spañó. E ta informá ku e sede mundial di Testigunan di Yehova a manda saludo, i e presentenan ta risibí esei ku un fuerte aplouso.

Kaba e superintendente ta duna un informe di e situashon aktual di e trabou di ousilio i ta gradisí e boluntarionan kalurosamente pa e bon spiritu ku nan ta manifestá. E ta puntra: “Tin ruman aki ku no sa kiko e mester hasi òf unda e mester bai?” Niun hende no ta hisa man. “Ken ta keda kome?” Mesora tur man ta bai laira, i tur hende ta na harimentu. Por último, un ruman ta hasi orashon i e 250 boluntarionan⁠—⁠hòmber, muhé, hóben i bieu⁠—⁠ta bai nan asignashon, kla pa un otro dia largu di trabou pisá.

E mesun kos ta pasa na e otro seis sentronan regional i na e sentro di kordinashon. Miéntras tantu, e otro boluntarionan ku ta traha den e kushina sentral ta drùk ta drei e weanan riba kandela, ya ku pa 12 or di mèrdia mas ku 2.000 boluntario hambrá na tur parti di Houston lo ta kla pa un kuminda kayente!

[Kuadro/Plachi na página 16]

PROGRAMA DI TRAINING

Durante e trabounan di ousilio, hòmbernan di fishi boluntariamente a dirigí lèsnan pa train boluntarionan sin preparashon pa nan por hasi tareanan spesífiko. Algun boluntario a haña training pa desinfektá kas, otronan a siña kon mester instalá muraya i kashi, i tambe tabatin ku a siña hasi muraya fini i fèrf. E Seminarionan di Trahadó Kualifiká aki a wòrdu grabá riba vidiokasèt, anto a usa e vidionan ei na e sentronan regional pa train mas boluntario. Un miembro di e komité di ousilio a komentá: “Via e seminarionan aki nos a garantisá e kalidat haltu di e trabou di reparashon.”

[Plachi na página 16]

Hòmbernan di fishi ta duna lès

[Kuadro na página 18]

“E BERDADERO AKTO DI DIOS”

“Kompanianan di seguro ta yama desasternan natural un akto di Dios [òf force majeur],” un miembro di e komité di ousilio a remarká. Anto el a agregá: “Sin embargo, e grupo di boluntario ku a traha akinan durante tur e lunanan ei ta e berdadero akto di Dios. Nos hermandat ta un milager!” Durante e trabounan di ousilio aki tabatin 2.500 boluntario òf mas presente den wikènt pa traha. E presidente di e komité a bisa: “E boluntarionan aki⁠—⁠sin ku nan ta risibí pago⁠—⁠a kanselá fakansi ku nan tabatin planiá, a kambia nan programa di famia i a posponé otro asuntunan personal, pa nan por a yuda den un di e trabounan di ousilio di mas grandi ku Testigunan di Yehova a yega di hasi.”

E kampaña largu di ousilio a rekerí hopi sakrifisio. Un boluntario ku a apoyá e trabou for di komienso te final, tabatin su empleo normal di 50 ora pa siman. Pero tòg el a dediká 40 ora tur siman na e trabou di ousilio. E di: “Yehova a duna mi e fortalesa. Konosínan a puntra mi: ‘Nan ta paga bo pa esei?’ Mi a bisa nan: ‘Lo bo no por paga mi pa hasi esaki.’ ” Den wikènt, despues di nan empleo di henter siman, un famia di e estado Louisiana tabata kore 400 kilometer pa bin yuda ku e trabou di ousilio, i despues 400 kilometer pa bai kas bèk. Hopi boluntario tabata traha for di ora solo sali te ora e baha, i despues tabata bai kas bèk ku outo. Un grupo di 30 boluntario di fishi, ku a kore shete pa dies ora pa yega, a bisa: “Tabata bale la pena.” Un otro boluntario tabata baha for di su trabou 3:30 di atardi i despues bai traha komo boluntario den e sentro di kordinashon te ku 10 or djanochi. Den wikènt tambe e tabata yuda. E di: “Mi ta sinti un satisfakshon.”

E boluntarionan aki i tambe tur otro tabata dispuesto pa yuda debí ku nan tabatin amor di ruman, e marka ku ta identifiká kristiannan berdadero. (Huan 13:⁠35) Despues ku e alkalde di Houston a bishitá e sentro di kordinashon di e trabounan di ousilio, esei a konmov’é pa bisa un grupo di Testigu: “Boso ta kere den hasi loke Dios ta bisa nos pa hasi. Boso ta biba boso kreensianan.”

[Plachi na página 14]

Awa di inundashon ta invadí Houston, 9 di yüni 2001

[Rekonosementu pa Potrèt na página 14]

© Houston Chronicle

[Plachi na página 15]

Kareteranan a bira riu

[Plachi na página 15]

Awa a drenta kas

[Plachinan na página 17]

Algun di e míles di Testigunan ku a sirbi komo boluntario

[Plachi na página 18]

E grupo di kushina a prepará mas ku un kuart mion tayó di kuminda!

[Rekonosementu pa Potrèt na página 13]

NOAA