Bo Por Deskubri Diseño den Naturalesa

ORA nos ta keiru den kunuku, mayoria di nos ta ripará e beyesa di naturalesa. Kisas nos ta mir’é den un tròshi di flor, un para kolorido, un palu mahestuoso òf un panorama impreshonante. Hopi hende ta atribuí e beyesa ei na un Kreadó òf Diseñadó Maestral.

Kisas bo ta suponé ku ta sientífiko so por deskubrí e diseñonan kompliká ku tin den naturalesa. Sin embargo, bo no tin mester di ekipo sientífiko sofistiká pa nota diseño den naturalesa. Tur loke bo tin mester ta un bista skèrpi, un poko imaginashon i apresio pa beyesa i forma. Kisas tambe lo bo tin ku analisá mas djaserka ophetonan konosí ku promé ayá bo no a paga masha tinu na nan.

Un di e diseñonan di mas simpel ta e forma di spiral. Bo por mir’é den ophetonan konosí ku hende a traha manera e kabuya di man di telefòn òf un ‘kurketrekker.’ Sin embargo, bo por haña spiralnan hopi mas elegante den kokolishi òf fruta di palu di pino. Si bo wak e kurason di un zòneblum bon, atrobe bo ta mira e patronchi di spiral. E kurason di un rosa òf di kas di araña tambe tin forma di spiral, maske nan ta ménos riparabel.

Wak un kas di araña djaserka. Na promé lugá, e araña ta traha e ‘balkinan’ prinsipal di su kas, algu paresido na e spaknan di un wil. Kaba e ta kuminsá meimei pa konektá e balkinan aki na otro usando un hilu di seda ku ta pegapega. E araña ta keda wef den sírkulo te ora ku e kas ta kla. E sírkulonan aki ku ta bira mas i mas grandi ta forma e spiral.

Un otro patronchi fasinante den naturalesa ta un mancha ku parse un wowo. Bo por haña e mancha aki na e lugánan di mas straño: riba pluma di un para, riba ala di barbulètè òf asta riba skama di piská. Sientífikonan ta kere ku e mancha manera wowo aki por yuda atraé un pareha, konfundí un atakante òf rechasá atenshon indeseá. Pouwis kisas ta e ehèmpel mas famoso di e mancha ei, i su show pa atraé su pareha ta un di e maravianan di e mundu di naturalesa. Alexander e Grandi tabata asina impreshoná ku e beyesa di pouwis ku el a insistí pa protehá e para aki den henter su dominio.

E forma di sírkulo i di un bola tambe ta patronchinan konosí. E bola koló di oro di solo ku ta baha òf e bola platiá di luna yen, semper ta masha bunita pa mira. Hopi flor di famia margarita òf chrysanten ta parse solo, ku nan kurason hel i blachinan di flor den vários koló radiante. E kurason di e flornan koló di oro aki ku bo ta haña kasi tur kaminda, tin yen di nèktar ku ta atraé barbulètè, kasi meskos ku un playa di santu blanku ta atraé turista.

Komo ku e forma di bola ta e forma di volúmen mas ekonómiko, bo ta haña mayoria fruta i bèshi den forma rondó di diferente tamaño i koló. Nan kolónan bibu ta atraé para, i esakinan na nan turno ta plama e simianan a kambio di un plato sukulento.

Klaru ku forma di spiral, e mancha ku parse un wowo, sírkulo i bola ta solamente algun ehèmpel di e hopi diseñonan ku tin den naturalesa. Ounke algun tin un propósito spesífiko, otronan kisas ta sirbi komo dekorashon òf kamuflahe. Sea kual sea e kaso, buska nan pa mira i disfrutá di nan.

 [Plachi di henter página na página 26]