E Punto di Bista Bíbliko

 Loke Bo Mester Sa Tokante Pasku

MIÓNES di hende rònt mundu ta preparando pa disfrutá di e temporada di Pasku 2002. Kisas bo tambe ta un di nan. Di otro banda, podisé no ta bo kustumber pa partisipá den e aspektonan religioso di e selebrashon popular aki. Sea kual sea e kaso, probablemente lo bo no por skapa e influensia di Pasku. El a penetrá den mundu di komersio i entretenimentu, asta den paisnan ku no ta kristian.

Kiko bo sa di Pasku? Beibel ta apoyá selebrashon di e nasementu di Kristu? Kiko tin tras di e selebrashon popular aki ku ta ser tené tur 25 di desèmber?

Pasku Prohibí

Si bo tuma un ratu pa investigá e tópiko aki, lo bo deskubrí ku Pasku no a originá di kristianismo berdadero. Hopi eksperto di Beibel di vários religion ta rekonosé esaki. Ku esei na mente, no mester straña bo ku na aña 1647 na Inglatera, e Parlamentu di Cromwell a dekretá ku Pasku mester ta un dia di penitensia i despues a prohibié kompletamente na 1652. For di aña 1644 te ku 1656 Parlamentu tabata reuní a propósito tur aña dia 25 di desèmber. Segun historiadó Penne L. Restad, “pastornan ku a prediká tokante e nasementu di Kristu a kore e riesgo di ser enkarselá. I laikonan ku a dòrna misa pa Pasku por a haña but. Lei a obligá negoshinan keda habrí dia di Pasku komo si fuera tabata un dia normal di trabou.” Dikon nan a tuma medidanan drástiko asina? Pasobra e reformadónan protestant di e grupo puritano tabata di opinion ku iglesia no mag krea tradishon ku no a eksistí den e Skritura. Aktivamente nan tabata prediká i distribuí literatura ku a denunsiá selebrashon di Pasku.

Na Norteamérika tambe tabata reina e mesun pensamentu. Pasku tabata prohibí den e kolonia di Massachusetts Bay entre aña 1659 i 1681. * Segun un lei ku nan a dekretá e tempu ei, no tabatin mag di selebrá Pasku den ningun forma. Hende ku a kibra e lei aki a haña but. No ta e puritanonan di New England, e estadonan nortost di Merka, so no kier a selebrá Pasku, sino tambe algun grupo di e kolonianan den e parti sentral. E quakernan (un otro grupo protestant di Pennsylvania) tabata mesun infleksibel ku e puritanonan pa loke ta e selebrashon di Pasku. Segun un fuente, “djis despues ku merikanonan a logra haña nan independensia, Elizabeth Drinker, kende tambe tabata un quaker, a parti habitantenan di Filadelfia den tres kategoria. Tabatin quaker, ku ‘no tabata konsider’é [Pasku’] mas ku otro dia,’ tabatin esnan ku a selebr’é pa motibunan religioso i e sobrá ku ‘pasa e dia den paranda i libertinahe.’ ”

Henry Ward Beecher, un famoso predikadó merikano ku a lanta den un famia òrtodòks kalvinista, no tabata sa kasi nada di Pasku sino te ora ku e tabatin 30 aña. Na 1874 Beecher a skirbi: “Ami no tabata sa mes kiko ta Pasku.”

E promé iglesianan boutista i kongregashonalista tampoko no a haña un base bíbliko pa selebrá e nasementu di Kristu. Un fuente a komentá ku ta dia 25 di  desèmber 1772 numa e Iglesia Boutista di Newport [Rhode Island, Merka] a selebrá Pasku pa promé bes. Esaki tabata mas o ménos 130 aña despues ku nan a funda e promé iglesia boutista na New England, Merka.

Orígen di Pasku

New Catholic Encyclopedia ta atmití: “E fecha di e nasementu di Kristu no ta konosí. E evangelionan no ta indiká ni e dia ni e luna . . . Segun e teoria di H. Usener . . . i aseptá pa mayoria eksperto awe, nan a laga e nasementu di Kristu kai riba e fecha di e solstisio di wenter (25 di desèmber riba kalènder juliano, 6 di yanüari riba e kalènder egipsio), pasobra riba e dia aki, segun ku solo ta kuminsá bolbe bèk na e hemisferio norte, e debotonan pagano di Mitra a selebrá e dies natalis Solis Invicti (dia di nasementu di e solo invensibel). Dia 25 di des. di aña 274, Aureliano a proklamá e dios solo komo patrono prinsipal di e imperio i a dediká un tèmpel na dje riba e Tereno di Marte. Pasku a originá den un tempu ku e adorashon di solo tabata sumamente fuerte na Roma.”

E Cyclopœdia di M’Clintock i Strong ta bisa: “E selebrashon di Pasku no a ser instituí pa Dios, ni e no a originá di e T[èstamènt] N[obo]. Hende no por saka afó ki dia Kristu a nase for di e T[èstamènt] N[obo], ni for di ningun otro fuente.”

Un “Engaño Bano”

En bista di lo anterior, ta korekto pa kristiannan berdadero partisipá den tradishonnan di Pasku? Dios ta keda kontentu ora ku nos meskla su adorashon ku kreensianan i práktikanan religioso di esnan ku no ta ador’é? Apòstel Pablo a spièrta na Kolosensenan 2:8: “Mira pa ni un hende no kohe boso prezu dor di filosofia i engaño bano, segun tradishon di hende, segun e prinsipionan elemental di mundu, i no segun Kristu.”

Tambe e apòstel a skirbi: “No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat? Òf ki harmonia Kristu tin ku Belial [Satanas], òf kiko un kreyente tin komun ku un inkrédulo?”​—⁠2 Korintionan 6:​14, 15.

En bista di e evidensia inegabel ku tin disponibel, Testigunan di Yehova no ta partisipá den selebrashonnan di Pasku. Na armonia ku e Skritura, nan ta hasi esfuerso pa praktiká “e religion puru i sin mancha den bista di nos Dios,” dor di mantené nan mes “liber di mancha di mundu.”​—⁠Santiago 1:⁠27.

[Nota]

[Komentario na página 24]

Na aña 1652 Parlamentu di Inglatera a prohibí Pasku

[Komentario na página 25]

“Ami no tabata sa mes kiko ta Pasku”​—HENRY WARD BEECHER, PASTOR MERIKANO

[Plachi na página 25]

Debotonan pagano di Mitra i di e dios solo (mustrá den relieve riba muraya) a selebrá 25 di desèmber

[Rekonosementu pa Potrèt na página 25]

Musée du Louvre, Paris