Sea Konsiente di Siguridat

BULA na un haltura di 11.000 meter por ta un eksperensia spantoso pa algun hende. E ta parse algu ku ta bai kontra leinan di naturalesa. Pero ku mas i mas medida di seguridat i avionnan mas konfiabel, e posibel peligernan di move rápidamente dor di espasio den un aparato di metal a bira mínimo. Sin embargo, de bes en kuando e realidat kruel ta rekordá nos ku aksidentenan por tuma lugá.

Kon pa Trata i Vense Miedu di Bula

Apesar di e realidat ei, hopi tempu pasá hende a ekspresá e deseo di bula. Un mil aña promé ku Kristu, Rei David a skirbi: “Mara mi tabatin hala manera palomba! Lo mi a bula bai.” (Salmo 55:⁠6) Manera a keda probá kaba, teknologia moderno a hasi bulamentu ku avion un di e medionan di transporte mas safe ku tin. Nò, e no ta perfekto. Nada den e mundu aki no ta perfektamente safe. Tampoko ta posibel pa antisipá tur posibel fayo.

Ta importante pa kòrda esei si nos tin problema pa keda trankil ora un  otro hende ta na kontròl. Tin hende kisas ta pensa: ‘Mas mi por kontrolá e situashon, ménos spantoso lo e ta.’ Hendenan asina lo tin problema ora nan ta den situashonnan kaminda nan no tin masha kontròl, esta, si nan tin mes. Biaha ku avion ta un di e situashonnan ei.

Apesar di esfuersonan pa mehorá siguridat di bula ku avion, nos no mag pasa por haltu di e peligernan. Tur hende ku tin di haber ku biahamentu ku avion por koperá pa minimisá e posibel peligernan di siguridat. Pero tòg, outoridatnan ta spièrta ku konstantemente tin riesgo. Un proverbio bíbliko sabí ta bisa: “Un persona prudente ta premirá e peliger su dilanti i ta tuma prekoushon.” (Proverbionan 22:⁠3, New Living Translation) Ta bon pa rekonosé ku den  kasi tur aktividat tin e faktor riesgo. Pa pone kosnan den e perspektiva korekto, kòrda ku pa bula den avion bo tin ku demostrá e mesun sentido komun ku lo bo a usa pa protehá bo siguridat den otro situashonnan.

Hende ku ta bula ku regularidat kisas ta mihó prepará pa kuida nan kurpa den e tempu difísil aki. Ta asina pasobra biaheronan frekuente ta mas familiarisá ku aeropuerto i avion ku e otro pasaheronan. Dor di sigui e pasonan simpel ku tin deskribí den e kuadronan ku ta kompañá e artíkulo aki, bo tambe por logra e trankilidat ku otro pasaheronan tin i sinti bo kómodo na aeropuerto i den avion.

Pasa sin Problema

Ounke puntonan di kontròl di siguridat ta útil i nesesario, tin pasahero⁠—⁠foral esnan ku ta purá⁠—⁠ta konsiderá nan un molèster. Teniendo na mente e oumento den medidanan di siguridat na mayoria aeropuerto, lo ta bon pa bo apliká e siguiente sugerensianan pa bo por pasa mas fásil dor di puntonan di kontròl:

▪ Yega trempan. Plania pa bo tin algun tempu èkstra promé ku e ora di salida, ya asina bo por kana trankil i relahá i evitá e strès ku kosnan inesperá òf inoportuno ta trese kuné.

▪ Ora bo ta skohe un aerolínea, wak unu ku prinsipalmente hende ku ta biaha pa negoshi ta usa. Nan sa e rutina kaba, tin tiki ekipahe i kier move lihé.

▪ Promé ku bo pasa dor di e detektor di metal, kita for di bo kurpa e artíkulonan ku bo ta pensa lo pone e alarma zona. Esakinan ta entre otro yabi, sèn largá, hoya i telefòn selular. Entregá nan na e bewaker segun ku bo ta prepará pa pasa dor di e detektor.

▪ Pone tas i otro ekipahe na man mas plat posibel riba e mashin di skèn; si e persona ku ta wak riba e pantaya mira un imágen tur bruá, kisas e ta pon’é bo saka tur kos for di bo tas òf ta bolbe pas’é dor di e mashin.

▪ Bisa e bewaker di antemano si bo tin un artíkulo straño ku bo ta ferwagt lo hala nan atenshon. Si e bewaker ta satisfecho ku un splikashon rasonabel pa e forma straño ku e ta mira riba pantaya, tin ménos chèns ku lo e insistí pa listr’é. Si realmente bo tin purá, saka e artíkulo di antemano i pidi nan inspekshon’é na man.

▪ Si e alarma zona, sea kla pa koperá i duna un splikashon mesora. Si e bewaker sa ku ta un kos spesífiko a pone e alarma zona, i tin un otro bewaker ku e palu di detektá metal, lo e manda bo serka esun ei.

▪ No hasi wega tokante sekuestro òf un bòm. Lo bo pèrdè bo vuelo sigur. Fuera di ku funshonarionan di siguridat di aeropuerto lo  listra bo kabalmente, bo por ser akusá tambe di un krímen.

Bon Biahe!

Ta posibel skohe un vuelo safe? Klaru ku sí. No ta importá kua vuelo bo skohe, bo tin hopi bon chèns di yega sano i salvo. Si bo ta duda, wak e historial di e aerolínea ku bo tin pensá di usa. Kòrda ku apesar di aksidentenan ku avion, bulamentu te ainda ta ser konsiderá komo e manera mas safe pa biaha.

Miéntras tantu, nos ta spera ku anhelo e tempu ora ku Dios ta goberná mundu i lo reina siguridat i konfiansa. Den un famia humano pasífiko i temeroso di Dios lo no tin lugá pa niun persona ku ta pone bida di hende na peliger. Hende “lo ta safe i sigur sin miedu di desaster.”​—⁠Proverbionan 1:⁠33, Holy Bible​—⁠Contemporary English Version. *

[Nota]

[Kuadro/Plachi na página 10, 11]

ALGUN TEP DI SIGURIDAT

Usa vuelonan direkto. Mayoria aksidente ta sosodé ora e avion ta lanta i subi, òf baha i aterisá. Vuelonan nònstòp tin ménos di e fasenan aki kaminda mayoria biaha aksidente sa tuma lugá.

Skohe avion mas grandi. Avionnan ku tin mas di 30 asiento di pasahero por lo general ta diseñá i sertifiká bou di reglanan mas estrikto ku avionnan mas chikí. Tambe den e kaso improbabel di un aksidente serio, den avion mas grandi pasaheronan tin mas chèns di sobrebibí.

Paga tinu na e instrukshonnan di siguridat duná promé ku lanta vuelo. Ounke e informashon ta parse djis un ripitishon, e salidanan di emergensia mas serka kisas ta distinto, dependiendo di e avion i den kua stul bo ta.

No pone kos pisá den e kompartimentu riba bo kabes. E kompartimentunan ei kisas lo no por karga e peso di kos pisá durante turbulensia, p’esei si bo tin algu pisá ku lo bo tin problema pa hisa na laira i hinka den e kompartimentu, mihó bo mand’é bagage na momentu di chèk-in.

Tene bo faha di siguridat mará ora bo ta sintá. Keda ku e faha mará ora bo ta sintá ta duna bo e èkstra protekshon ku lo bo mester den kaso ku e avion topa inesperadamente ku turbulensia.

Skucha e stewardessnan. E motibu prinsipal ku tin stewardess na bordo ta pa garantisá siguridat, p’esei si un di nan pidi bo hasi algu, hasié promé i puntra despues.

No biaha ku ningun material peligroso. Tin un lista basta largu di materialnan peligroso ku no ta ser permití den avion. Pero bo sano huisio mes ta bisa bo ku bo no por bai ku gasolin, ásido, gas venenoso i otro kosnan similar na bordo di avion a ménos ku e aerolínea ta permití esei i bo ta transportá nan den e empake korekto.

No bebe di mas. Kualkier tipo di alkohòl ku bo bebe lo afektá bo mas pisá den laira ku na nivel di laman. Bebe moderá ta e proseder prudente na kualkier haltura.

Keda alerta. Den e kaso improbabel ku surgi un situashon di emergensia, por ehèmpel un evakuashon di emergensia komo un prekoushon, bo mester sigui e instrukshonnan di e stewardessnan i di e piloto i su asistentenan i sali for di e avion mas rápido posibel.

[Rekonosementu pa Potrèt na página 11]

Fuente: AirSafe.com

[Kuadro/Plachi na página 12]

KON PA TRANKILISÁ BO FAMIA

Si bo ta biaha, at’akí kon bo por yuda bo famia trata ku loke ta preokupá nan. Saká for di e website di United Behavioral Health

Papia ku bo famia. Promé ku bo sali di biahe, dediká poko tempu na bo sernan kerí pa papia tokante bo siguridat i tambe di nan. Splika nan e medidanan nobo di siguridat ku ta na vigor i kiko nan ta nifiká pa bo siguridat durante biahe.

Permití nan ekspresá loke ta preokupá nan. Laga bo famia ekspresá nan ansiedat. Nan stima bo i kier pa bo ta sano i salvo. Skucha nan ku atenshon. No kritiká nan, i mustra ku bo ta tuma tur nan temor i preokupashon na serio.

Trankilisá nan onestamente. Splika nan kon vários agensia ta purba prevení mas atake terorista. E esfuersonan aki ta inkluí mas medida di siguridat na aeropuerto i tambe na bordo di avion. E chèns pa algu malu pasa ora bo ta den un avion ta masha chikí.

Keda den kontakto ku bo famia. Primintí nan ku lo bo bèl nan ora bo yega bo destinashon, i sigui bèl kas regularmente ora bo ta afó. Tambe ta importante pa bo famia sa kon nan por haña kontakto ku bo si surgi un emergensia.

[Rekonosementu]

Taken from the United Behavioral Health Web site

[Plachinan na página 10]

Sea kla pa koperá na e puntonan di kontròl