“Adikto” na Telefòn Selular

DI E KORESPONSAL DI SPIÈRTA! NA HAPON

“HÓBENNAN Ta Kasi Adikto na Telefòn Selular,” segun un titular di e korant The Daily Yomiuri di Hapon. Adikto? E korant a splika: “Ta parse ku hóbennan ta konsiderá nan telefòn selular komo un parti di nan kurpa i asta nan por drenta un pániko si nan no tin nan telefòn huntu ku nan.” Komo ku nan tin miedu di keda for di kontakto ku otro hóbennan, hopi di nan ta laga nan telefòn sende tur ora i tur kaminda. Si nan “no risibí ningun mensahe riba nan telefòn selular, nan ta bira hanshá i di mal beis, i ta kuminsá sinti ku niun hende no tin mester di nan.” E hansha aki ta pone ku mesora nan ta kontestá tur mensahe ku nan haña, lokual hopi bes no ta nesesario.

Klaru ku telefòn selular por ta bentahoso. De echo, nan a demostrá di ta sumamente balioso den kasonan di emergensia. Asta si un hende ta usa telefòn selular pa kosnan informal esei no ta nesesariamente malu, tanten ku e ta ser hasí na un manera balansá. Pero algun outoridat ta bisa ku ser “adikto” na telefòn selular lo por perhudiká algun abilidat normal di komuniká. Un yùfrou di skol sekundario na Osaka ta preokupá ku debí na uso di telefòn selular “muchanan ta pèrdiendo e abilidat di interpretá ekspreshon di kara, komportashon i tono di bos di otro hende. Un konsekuensia di esaki ta ku muchanan ta mas agresivo ku otro i ta pasa por haltu di sintimentu di otro hende,” segun e korant.

E artíkulo a konkluí: “Aparentemente lo ta inevitabel ku den futuro muchanan lo bai dependé mas ainda riba telefòn selular. E úniko manera pa limitá e efektonan negativo di e tendensia aki ta dor di hasi sigur ku hende grandi ta pone un bon ehèmpel pa mucha den e manera ku nan ta usa telefòn selular.”