E Promé Opstákulo—Debate Oral Dilanti di Korte Supremo

E FECHA FIHÁ pa presentá debate oral dilanti di Presidente di Korte Supremo Hues William Rehnquist i e ocho otro miembronan tabata 26 di febrüari 2002. Tabatin un tim di kuater abogado pa defendé e interesnan di Testigunan di Yehova.

E abogado prinsipal pa e Testigunan a kuminsá su debate ku un introdukshon ku a akapará atenshon: “Ta djasabra 11 or di mainta den e Pueblito di Stratton. [Anto el a bati tres biaha riba su stènt.] ‘Bon dia. Mirando e susesonan ku a tuma lugá resientemente, mi a hasi un esfuerso spesial pa bini serka bo pa papia ku bo tokante e loke Profeta Isaías a menshoná komo algu mihó. Esei ta e bon notisia ku Kristu Hesus a papia di dje, e bon notisia di e Reino di Dios.’”

El a sigui bisa: “Si bo bai di kas pa kas i presentá e mensahe ei den e Pueblito di Stratton sin buska promé un pèrmit serka e outoridatnan, bo ta kometiendo un krímen.”

‘Boso No Ta Pidi Plaka?’

Hues Stephen G. Breyer a hasi e abogado di e Testigunan algun pregunta hopi al kaso. El a puntra: “Ta bèrdat ku bo klientenan no ta pidi plaka, ni un sèn pretu, i [ku] nan no ta bende Beibel, ni nada otro, i ku tur loke nan ta hasi ta bisa: ‘Mi kier papia ku bo tokante religion’?”

E abogado pa e Testigunan a kontestá: “Honorabel Señor Hues, e echonan ta papia pa nan mes, Testigunan di Yehova no a pidi plaka den e Pueblito di Stratton. E mesun echonan aki ta mustra ku tin biaha den otro áreanan tambe nan sa menshoná un donashon boluntario. . . . Nos no ta kana pidi fondo. Simplemente nos ta purba papia ku hende tokante Beibel.”

Mester di Pèrmit di Gobièrnu?

Demostrando perspikasia, Hues Antonin Scalia a puntra: “Kier men, bo posishon ta ku un hende no tin nodi bai serka e alkalde i pidi pèrmit pa papia ku un bisiña tokante algu interesante?” E abogado di e Testigunan a kontestá: “Nos no ta kere ku e Korte aki mester aprobá un lei di Gobièrnu ku ta rekerí di un siudadano ku e tin ku buska un pèrmit pa e por pasa na kas di un otro siudadano pa papia kuné.”

Kambio di Argumentu, Kambio di Ambiente

Awor tabata turno pa Stratton presentá nan kaso. Nan abogado prinsipal a splika e ordenansa di Stratton, bisando: “Stratton ta ehersiendo su poder hudisial ora e ta purba protehá e privasidat di su habitantenan, ora e ta purba prevení kriminalidat. E ordenansa ku ta prohibí hende pa bai riba propiedat privá i pidi sea voto òf apoyo òf buska hende pa kumpra kos, únikamente ta  rekerí pa un hende registrá di antemano i kana ku un pèrmit ora e ta bai di kas pa kas.”

Hues Scalia a bai mesora na e punto fundamental di e asuntu ora el a puntra e otro huesnan: “Boso sa di kualkier otro kaso den kua nos [Korte Supremo] tabatin ku trata un dekreto di e alkanse aki, ku ta enbolbé pidimentu, no di plaka, ni bendementu di merkansia, sino di algu manera: ‘Mi kier papia tokante Hesukristu,’ òf ‘Mi kier papia tokante protekshon di medio ambiente?’ Nos a yega di tin un kaso asina?”

Hues Scalia a sigui bisa: “Te asina leu ku mi sa, den e último dos siglonan nos no tabatin un kaso paresido.” Presidente di Korte Rehnquist a kontestá den chansa: “Ta pasobra bo no ta dje bieu ei.” Ata tur hende den sala di korte bou di harimentu. Hues Scalia a sigui ku su argumentu: “E alkanse di e kos aki ta algu nobo pa mi.”

Un Bon Idea?

Hues Anthony M. Kennedy a hasi un pregunta al kaso: “Bo ta kere ku ta un bon idea ku mi tin ku pidi Gobièrnu pèrmit promé ku mi por bai un par di kas mas leu den mi kaya, kaminda mi no konosé tur hende, [i] bisa nan, mi kier papia ku boso pasobra mi ta preokupá ku e asuntu di rekohementu di sushi, òf pasobra mi ta preokupá ku nos representante den Kongreso, òf algu por estilo? Mi tin ku pidi Gobièrnu promé ku mi por hasi esei?” El a agregá: “Esaki sí ta algu nobo pa mi.”

E ora ei Hues Sandra Day O’Connor a drenta den e debate, puntrando: “Wèl, kiko di muchanan ku ta kana kas pa kas pidi mangel durante Halloween? Nan tambe tin ku buska un pèrmit?” Tantu Hues O’Connor komo Scalia a sigui ku e liña di argumentu aki. Hues O’Connor a introdusí un otro argumentu: “Kon ta pará ku fiamentu di un kòpi di suku serka bo bisiña? Mi tin ku buska un pèrmit pa mi bai buska un kòpi di suku serka mi bisiña?”

Testigunan di Yehova Ta Kana Pidi Voto òf Bende Kos?

Hues David H. Souter a puntra: “Dikon Testigunan di Yehova ta kai bou di e ordenansa? Nan ta kana pidi voto, nan ta kana bende kos, nan ta komersiante ambulante òf bendedó pasahero di merkansia òf servisio? Nan no ta hasi niun di e kosnan aki tòg?” E abogado pa Stratton a sita e ordenansa detayadamente i a bisa ku e korte di distrito ta haña ku Testigunan di Yehova tambe ta kai den e kategorianan aki. Riba esaki, Hues Souter a kontestá: “ Si boso ta inkluí Testigunan di Yehova, esei kier men ku pa boso e kategorianan aki ta hopi amplio.”

Hues Breyer e ora ei a sita un dikshonario pa mustra ku niun dje definishonnan aki ta pas pa Testigunan di Yehova. El a agregá: “Mi no a lesa nada den e resúmen di boso kaso ku ta splika dikon boso ta rekerí di e hendenan aki [Testigunan di Yehova] ku no ta interesá den plaka, no ta interesá den bende nada, no ta ni sikiera interesá den voto, pa nan bai stathùis i registrá. Kiko Stratton kier logra?”

E “Privilegio” di Komunikashon

Abogado di Stratton e ora ei a argumentá ku “loke Stratton kier logra ta di evitá ku hende ta molestiá e doñonan di kas.” El a klarifiká mas aleu ku esei tabata pa protehá e habitantenan kontra froude i hende kriminal. Hues Scalia a sita e ordenansa pa mustra ku e alkalde por eksigí mas informashon relashoná ku e persona ku ta registrá su mes i su propósito afin di por “deskribí ku eksaktitut ki tipo di privilegio e ta deseá.” Anto e hues a agregá: “Pues segun e alkalde, pa bo por bai serka bo kosiudadanonan pa konvensé nan tokante un òf otro kos ta un privilegio ku e alkalde tin ku otorgá bo. Ami gewon no por komprondé ku esei ta un privilegio.”

Hues Scalia a bolbe insistí: “Kier men, tur hende ku ta primi bèl di un porta mester bai stathùis pa nan kohe su fingerprint promé ku [e] por primi bèl di un porta? E  posibilidat chikí ku lo por sosodé un krímen ta sufisiente pa eksigí di tur hende ku kier primi bèl di un porta pa nan bai registrá na stathùis? Klaru ku nò.”

E Ordenansa Ta Protehá Habitantenan?

Ora ku e 20 minüt asigná na e abogado di Stratton a vense, el a pasa palabra na e abogado general di estado di Ohio. Esaki a argumentá ku e ordenansa pa no kana di kas pa kas ta protehá e habitantenan kontra bishita di un hende deskonosí, kende “sigur [ta] un persona ku no a ser invitá, [i ku] ta aki riba mi propiedat . . . i mi ta kere ku e pueblito tin derecho di bisa: ‘E tipo di aktividat ei tin nos preokupá.’”

E ora ei Hues Scalia a deklará: “Kier men, boso ta bisando ku asta pa e hendenan ku sí ta risibí Testigunan di Yehova, ku kisas ta sintando nan so tur solitario i ku tin gana di papia ku un hende tokante kiko ku ta, e hendenan aki [Testigunan di Yehova] tòg tin ku bai registrá serka e alkalde pa haña e privilegio di primi nan bèl di porta.”

“Un Restrikshon Masha Rasonabel”

Durante e interogashon Hues Scalia a presentá un punto fuerte ora el a bisa: “Nos tur por atmití ku e sosiedatnan di mas safe na mundu ta diktaduranan totalitario. Echo ta ku nan tin masha tiki kriminalidat. Libertat tin su preis i te na sierto grado bo ta kore un riesgo mas grandi di aktividat ilegal. Pero e pregunta ta si e lei aki ta bai yuda prevení asina tantu aktividat ilegal ku ta hustifiká pa pèrdè bo derecho di libertat di por primi bèl di un hende su porta.” E ora ei e abogado general a kontestá ku “esaki ta un restrikshon masha rasonabel.” Hues Scalia na su turno a kontest’é ku e ta asina rasonabel ku “nos no por haña ni un solo kaso di ni un solo munisipio ku a yega di dekretá e tipo di ordenansa ei. Ami no ta kere ku esei ta rasonabel.”

Al final, bou di preshon di un di e huesnan, e abogado general mester a atmití: “Lo mi no kier bisa ku mester pone un prohibishon kompletu riba primimentu di bèl i batimentu na porta.” Ku e komentario ei, su argumentashon a terminá.

Ora tabata turno pa e abogado di e Testigunan bini ku kontra-argumentu, el a indiká ku den e ordenansa no tabatin un manera pa verifiká e deklarashonnan di un persona. E di: “Mi por bai stathùis i bisa: ‘Mi ta [tal i tal],’ i haña un pèrmit i bai di kas pa kas.” Tambe el a mustra ku e alkalde tin e outoridat pa nenga di duna pèrmit na un persona ku bisa ku e no ta afiliá na un organisashon. “Nos ta kere ku esaki klaramente ta bai duna outoridatnan chèns di husga na un manera arbitrario,” el a bisa. Despues el a agregá: “Respetuosamente mi kier menshoná ku loke nos [Testigunan di Yehova] ta hasi, en realidat tin di haber ku e esensia di e Promé Enmienda.”

Djis despues di esaki Presidente di Korte Hues Rehnquist a sera e debate oral, bisando: “[Korte Supremo] ta aseptá pa revisá e kaso.” Henter e proseso a dura un poko mas ku un ora. E veredikto por eskrito ku a keda anunsiá na yüni, a mustra kon importante esun ora ei tabata.

[Plachinan na página 6]

Presidente di Korte, Hues Rehnquist

Hues Breyer

Hues Scalia

[Rekonosementu]

Rehnquist: Collection, The Supreme Court Historical Society/Dane Penland; Breyer: Collection, The Supreme Court Historical Society/Richard Strauss; Scalia: Collection, The Supreme Court Historical Society/Joseph Lavenburg

[Plachinan na página 7]

Hues Souter

Hues Kennedy

Hues O’Connor

[Rekonosementu]

Kennedy: Collection, The Supreme Court Historical Society/Robin Reid; O’Connor: Collection, The Supreme Court Historical Society/Richard Strauss; Souter: Collection, The Supreme Court Historical Society/Joseph Bailey

[Plachi na página 8]

Interior di sala di korte

[Rekonosementu]

Potrèt di Franz Jantzen, Collection of the Supreme Court of the United States