For di Nos Lektornan

Pas Mundial E seri “Pas Mundial Ta Djis un Soño?” (8 di mei 2002) ta hopi bon skirbí. Mare tur polítiko por les’é. Boso publikashonnan ta duna di komprondé bon kla kiko un persona mester sa i kon e mester biba.

J. S., Repúblika Cheko

Oido Masha danki pa e artíkulo “Protehá Bo Oido!” (8 di yüni 2002) Mi ta den mi promé aña di training pa bira un spesialista di aparato di oido. Esei kier men ku tur dia mi ta mira e efektonan di bochincha. Ta importante pa hasi foral hóbennan konsiente di e bochincha ku tur dia nan ta eksponé nan mes na dje.

C. K., Alemania

Opservando Mundu Danki pa e artíkulo titulá “Komprondé Malesa Mental” den e sekshon di “Opservando Mundu.” (8 di yüni 2002) Mi a sufri di depreshon mániko pa 18 aña. Apesar di e malesa aki, mi tabatin un bida produktivo. Mi a lanta tres yu hòmber i tabata un bon kasá pa mi esposo. Tambe mi a yuda algun hende haña konosementu di Beibel. Mi tin un famia amoroso i amigunan amoroso den kongregashon. Danki pa e revista Spièrta! E ta elevá nos tur na e mesun nivel di edukashon.

H. B., Suráfrika

Hóbennan Sa Puntra Danki pa publiká e artíkulo “Hóbennan Sa Puntra . . . Kon Mi Ta Hasi si Mi Topa un Mucha di Mi Skol?” (8 di mart 2002) Hopi aña pasá mi tabata un teenager masha tímido mes i gagu. Sirbishi di vèlt tabata difísil pa mi, foral ora mi topa muchanan di mi skol. Mi tin sigur ku e artíkulo aki lo ta un gran yudansa pa otro hóbennan.

W. T., Merka

Mi a haña e artíkulo “Hóbennan Sa Puntra . . . Kon Mi Por Haña un Bon Kompañero di Kuarto?” (8 di yüni 2002) masha instruktivo. Mi no ta yòn, pero poko tempu pasá mi a divorsiá for di mi kasá. Mi a keda di shòk ora mi a ripará kon karu kosto di bida ta, i ku mi no por a biba riba mi mes. E úniko rekurso ku a keda mi tabata di buska un kompañera di kuarto. M’a pensa ku debí na mi edat, esei lo bai ta un problema. Pero un ruman muhé yòn, ku tabata nobo den nos kongregashon, tambe tabata buska un kompañera di kuarto. Nos a bai biba huntu. E areglo tabata realmente un bendishon. Despues di poko tempu, nos a haña nos den un pèrtá finansiero, i un otro ruman muhé a bin biba huntu ku nos. Mi tin ku bisa ku ta solamente den Yehova su organisashon un wela di 60 aña i dos mucha muhé yòn di diferente background por biba huntu den asina tantu pas i amor! Nos a bira un famia chikí, i den hopi manera esei a yena un bashí ku tabatin den nos bida.

L. G., Merka

Konseho Konfiabel Danki ku boso ta perkurá asina un abundansia di material instruktivo pa lesa. Boso artíkulonan ta kubri un inmenso variedat di tópiko, i distinto for di hopi otro publikashon, boso ta mantené un aktitut imparsial i respetuoso pa ku kreensianan di otro hende. Pa mi, Spièrta! a bira un amigu íntimo i inseparabel, un fuente di konseho konfiabel ku ta yuda mi konfrontá e problemanan di bida ku un speransa.

N. P., Brazil