Hóbennan Sa Puntra . . .

Kon Mi Por Trata ku e Preshon di Mi Pareunan?

“Preshon di mi pareunan ta tur kaminda.”—Jesse di 16 aña.

“Preshon di mi kompañeronan di skol tabata un di e kosnan mas difísil ku mi mester a konfrontá den mi hubentut.”—Johnathan di 21 aña.

PRESHON DI BO PAREUNAN sigur ta un influensia ku bo tin ku tene kuenta kuné. Pero e ta algu ku bo por resistí. Es mas, bo por kontrol’é i asta saka algu bon for di dje. Pero kon?

Den un artíkulo anterior di e seri aki, nos a trata un promé paso importante: Rekonosé kuantu poder e preshon di nos pareunan tin i kua ta nos puntonan débil kaminda nan por influensiá nos. * Ki otro pasonan positivo bo por dal? Bo ta haña e guia útil ku bo mester den e Palabra di Dios. Proverbionan 24:5 ta bisa: “Un hòmber di konosementu ta oumentá poder.” Kua ta e konosementu ku por oumentá bo poder pa resistí e preshon di bo pareunan? Promé ku nos kontestá esei, laga nos trata promé un problema ku por duna bo pareunan poder riba bo.

Falta di Konfiansa Ta un Peliger

E estilo di bida di hóbennan Testigu di Yehova ta enserá papia ku otro hende tokante nan religion. P’esei pa nan, tin biaha e preshon di nan pareunan ta forma un desafio spesial. (Mateo 28:19, 20) Abo ta haña ku tin biaha ta difísil pa papia tokante bo religion ku otro hóbennan ku bo ta topa? Wèl, bo no ta bo so. Melanie di 18 aña ta bisa: “Ora mi mester a bisa e muchanan ku mi ta un Testigu, esei tabata mas duru ku mi a ferwagt.” El a sigui bisa: “Mi tabata tuma un kurashi pa bisa e muchanan ku mi ta un Testigu, pero ora e momentu presentá mi tabata kobardiá.” Aparentemente, preshon negativo di su pareunan tabata strob’é di papia di su religion.

Beibel ta trankilisá nos pasobra e ta mustra ku asta hòmber- i muhénan ku tabatin fe ekstraordinario a vasilá pa papia ku hende tokante Dios. Por ehèmpel, e hóben Yeremías tabata sa ku nan  lo tent’é i persiguié si e obedesé e òrdu ku Dios a dun’é di papia ku kurashi. Ademas, Yeremías tabata falta konfiansa. Dikon? El a bisa Dios: “Mira, mi no sa kon pa papia, pasobra mi ta un mucha.” Dios tambe a pensa ku Yeremías no por a papia pasobra e tabata yòn? Nò. Yehova a trankilisá e profeta ku e palabranan: “No bisa: ‘Mi ta un mucha.’” Anto Yehova a duna e hóben vasilante un asignashon importante.—Yeremías 1:6, 7.

Ora nos falta konfiansa, i no ta sigur di nos mes, por ta masha duru pa resistí e preshon di nos pareunan. Investigashonnan tambe ta indiká esaki. Por ehèmpel, na aña 1937 un sientífiko ku yama Muzafer Sherif a dirigí un eksperimentu famoso. El a pone hende den un kamber skur, mustra nan un solo punto di lus, anto a puntra nan kon leu e lus a move.

En realidat e lus no a move mes; esaki tabata simplemente un ilushon óptiko. Ora a tèst e hendenan individualmente, nan a duna nan opinion en partikular relashoná ku e supuesto movementu di e lus. Sin embargo, ora nan tabata den grupo nan mester a duna nan opinion na bos haltu. Kiko tabata sosodé? Komo ku nan no tabatin konfiansa den loke nan a mira, nan a influensiá otro. Despues di a ripití e tèst vários bes, nan tur a kuminsá kontestá kasi meskos te ora ku nan a yega na un “norma di e grupo.” Asta despues ora nan a bolbe tèst e personanan individualmente, tabatin algun ku ainda tabata bou di influensia di e opinion kolektivo di e grupo.

E eksperimentu aki ta demostrá un punto importante: Falta di siguridat òf konfiansa ta krea mas chèns pa hende ser influensiá dor di nan pareunan. Esei ta algu pa pensa ariba, no ta bèrdat? Pasobra e preshon di nos pareunan por influensiá nos relashoná ku asuntunan importante, manera entre otro, nos punto di bista di relashon seksual promé ku matrimonio, uso di droga, i asta e metanan ku nos lo buska pa alkansá den bida. Si den e asuntunan aki nos bai adoptá e “norma di e grupo,” nos lo por afektá nos propio futuro drástikamente. (Éksodo 23:2) Kiko nos por hasi anto?

Wèl, kon lo a bai ku bo ku e tèst menshoná ariba si bo tabata sa sigur ku e punto di lus no tabata move? Probablemente lo bo no a laga e grupo influensiá bo. Sí, nos tin mester di konfiansa. Pero ta di ki klase di konfiansa nos ta papia i kon nos por hañ’é?

Hasi Yehova Bo Konfiansa

Podisé bo ta tende hende papia hopi tokante desaroyá konfiansa propio. Pero pa loke ta trata kon pa desaroyá konfiansa i kuantu bo mester tin, kada hende ta bisa un kos. Beibel tin e konseho balansá aki: “Mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio.” (Romanonan  12:3) Un otro tradukshon di e versíkulo aki ta bisa: “Mi por bisa kada un di boso: no pensa ku boso ta mas di loke boso ta, pero sea realístiko. Kada ken mester tin un konsepto humilde di su mes.”—Beibel na papiamentu koriente.

Ser “realístiko” i tin “un konsepto humilde di bo mes” ta evitá ku bo ta kria idea òf demasiado konfiansa. Di otro banda, un punto di bista balansá ta nifiká ku bo tin un grado di konfiansa den bo berdadero kapasidat di pensa, di rasoná i di tuma desishonnan sabí. Bo Kreadó a duna bo e “fakultat di rasoná,” i esei ta un don presioso. (Romanonan 12:1, NW) Si bo tene esei na mente e por yuda bo resistí e deseo pa laga hende rònt di bo disidí pa bo. Sin embargo, tin un tipo di konfiansa ku lo protehá bo mas mihó.

Rei David a skirbi bou di inspirashon: “Bo ta mi speransa; o Señor DIOS, bo ta mi konfiansa for di mi hubentut.” (Salmo 71:5) Sí, David a pone konfiansa apsoluto den su Tata selestial, i el a kuminsá hasi esei for di tempu ku e tabata yòn. David tabata “un hóben ainda”—kisas un teenager—ora ku Goliat, e gigante filisteo, a reta kualkier sòldá di Israel pa bin bringa kontra dje. E sòldánan a kobardiá. (1 Samuel 17:11, 33) Podisé un a kuminsá desanimá otro, kreando un preshon negativo. Kasi sigur nan a papia den un manera pesimista tokante Goliat su tamaño i forsa ekstraordinario i a deklará ku e hòmber ku aseptá e reto ei mester ta loko. Pero e tipo di preshon ei no a afektá David niun tiki. Kon bini?

Tuma nota di loke David a bisa Goliat: “Bo ta bin riba mi ku spada, ku lansa i ku yabalina, ma ami ta bin riba bo den e nòmber di e SEÑOR di ehérsitonan, e Dios di e ehérsitonan di Israel, kende bo a reta.” (1 Samuel 17:45) No ta asina ku David no a mira Goliat su tamaño, su forsa òf e armanan ku e tabatin. Pero David tabata masha sigur di algu, mes sigur ku e tabata sa ku shelu ta riba su kabes. E tabata sa ku Goliat no tabata nada kompará ku Yehova Dios. Si Yehova tabata na David su banda, pakiko lo e mester tin miedu di Goliat? E konfiansa ei den Dios a laga David sinti su mes safe. Ni maske kuantu preshon el a haña di su pareunan, esei no a pon’é kambia di opinion.

Abo tin mesun konfiansa den Yehova? For di tempu di David te awe, Yehova no a kambia. (Malakías 3:6; Santiago 1:17) Mas bo siña tokante Yehova, mas sigur lo bo ta di tur loke e ta bisa bo den su Palabra. (Huan 17:17) Den su Palabra lo bo haña normanan fiho i konfiabel pa guia bo den bida i pa yuda bo resistí preshon di bo pareunan. Fuera di hasi Yehova bo konfiansa, tin un kos mas ku bo por hasi.

Skohe Bon Konsehero

E Palabra di Dios ta enfatisá e nesesidat di skohe bon guia. Proverbionan 1:5 ta bisa: “Un hende di komprondementu lo atkerí bon konseho.” Bo mayornan, kendenan ta profundamente interesá den bo bienestar, por ta un fuente di guia. Indira ta bon konsiente di esaki. El a bisa: “Ta pasobra mi mayornan konstantemente a usa e Skritura pa rasoná ku mi i nan a hasi Yehova un persona real den mi bida, mi ta kanando den e kaminda di bèrdat te awe.” Hopi hóben ta sinti meskos.

Si bo ta miembro di e kongregashon kristian, bo tin un fuente di apoyo maravioso einan: e superintendentenan nombrá (e ansianonan) i tambe otro kristiannan maduro. E hóben Nadia ta kòrda: “Mi tabata ègt respetá i atmirá e ansianonan den mi kongregashon. Ainda mi ta kòrda un diskurso ku e superintendente presidente a duna spesial pa hóbennan. Despues di reunion ami ku mi amiga tabata masha emoshoná pasobra loke el a menshoná tabata presis loke nos tabata eksperensiá.”

Un otro arma poderoso kontra preshon negativo di bo pareunan ta preshon positivo di bo pareunan. Si bo skohe bo amigunan na un manera sabí, nan por yuda bo tene na metanan bon i normanan hustu. Kon nos por skohe bon? Tene e konseho aki na mente: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Nadia a sòru skohe amiga i amigu sabí na skol: rumannan den fe ku tabata sigui e mesun normanan moral kuné. Nadia ta kòrda: “Ora ku e mucha hòmbernan na skol tabata pasa pa ‘papia’ ku nos, nos un tabata apoyá otro.” Bon amigu por yuda revelá nos mihó kualidatnan. Ta bale la pena hasi e esfuerso nesesario pa haña nan.

Pues, bo por ta sigur ku si bo desaroyá bo konfiansa den Yehova, buska guia di kristiannan maduro i skohe bo amigunan na un manera sabí, bo por tin éksito den trata ku e preshon di bo pareunan. De echo, bo por tin un influensia positivo riba bo amigunan i yuda nan keda huntu ku bo riba e kaminda ku ta hiba na bida.

[Nota]

[Komentario na página 16]

Buska bon amigu, ku tin mesun amor ku abo tin pa Dios i pa su normanan

[Plachinan na página 16]

“Mal kompania ta daña bon kustumber.”—1 Korintionan 15:33

“Esun ku anda ku hende sabí lo ta sabí.”—Proverbionan 13:20