Kon e Kuestion A Kuminsá

STRATTON, OHIO, MERKA, ta un komunidat chikí situá serka di e Riu Ohio ku ta separá e estado Ohio for di Wèst Virginia. Stratton ta ser konsiderá un pueblito i e tin un alkalde. E komunidat chikí aki di ménos ku 300 habitante, diripiente a bira un sentro di kontroversia na 1999 ora ku outoridatnan a purba obligá, entre otro, Testigunan di Yehova pa buska un pèrmit spesial promé ku nan bishitá kas di e hendenan lokal ku nan mensahe basá riba Beibel.

Dikon esaki ta un kuestion importante? Segun ku bo ta lesa nos informe di e desaroyonan, lo bo mira ku e tipo di ordenansa i kontròl gubernamental aki de echo ta limitá e derecho di libertat di ekspreshon. Anto no solamente di Testigunan di Yehova, sino di tur hende ku ta biba na Merka.

Kon e Konflikto A Desaroyá

Pa hopi aña e habitantenan di Stratton a risibí bishita di Testigunan di Yehova di e kongregashon bisiña di Wellsville. For di aña 1979 e Testigunan tabatin problema ku un par di funshonario lokal tokante e predikashon di kas pa kas. Na prinsipio di añanan ’90, un agente polisial di Stratton a kore ku un grupo di Testigu for di e pueblito, bisando: “Mi no tin kunes ku boso derechonan.”

E asuntu a yega na un kulminashon na 1998 ora ku e alkalde di Stratton personalmente a konfrontá kuater Testigu di Yehova. Nan tabata saliendo for di e pueblito despues ku nan a bishitá algun habitante ku anteriormente a mustra interes den kòmbersá tokante Beibel. Segun un di e señoranan, e alkalde a bisa nan ku si nan tabata hende hòmber, lo el a enkarselá nan.

E kousa di e konflikto mas resien tabata un ordenansa òf dekreto di e pueblito pa “Regulá Bendementu i Pidimentu di Kos Indeseá Riba Propiedat Privá.” Segun e ordenansa ei tur hende ku kier partisipá den un aktividat di kas pa kas mester buska un pèrmit spesial, grátis, serka e alkalde. Testigunan di Yehova a konsiderá e ordenansa aki komo un violashon di libertat di ekspreshon, di libertat di religion i di libertat di prensa. P’esei nan  a entamá un kaso den korte federal despues ku e pueblito a nenga di trese kambio den nan implementashon di e ordenansa aki.

Dia 27 di yüli 1999 tabatin un oudiensia dilanti un hues di korte di distrikto merikano ku ta sirbi e Distrikto Sur di Ohio. E hues ei a respaldá e pueblito su ordenansa tokante pèrmit i a haña ku e ta na armonia ku e konstitushon. Despues di esei, dia 20 di febrüari 2001, e Korte di Apelashon Merikano pa Sirkuito Seis tambe a afirmá ku e ordenansa tabata na armonia ku e konstitushon.

Pa disidí e kuestion definitivamente, Watchtower Bible and Tract Society of New York huntu ku e kongregashon lokal di Wellsville di Testigunan di Yehova a hasi un petishon pa Korte Supremo Merikano eksaminá e kaso.

[Mapa/Plachi na página 3]

(Pa e teksto den su formato kompleto, wak e publikashon)

Los Angeles

New York

OHIO

Stratton