E Punto di Bista Bíbliko

Kristiannan Mester Ta Pober?

HESUS a yega di bisa un hóben gobernante riku ku e mester bai i bende tur loke e tin i duna hende pober. E relato ta bisa ku e hòmber a bira masha afligí ora el a tende loke Hesus a bis’é i el a bai tur tristu, “pasobra e tabata doño di hopi propiedat.” Anto Hesus a bisa su disipelnan: “Ki difísil lo ta pa esnan ku ta riku drenta e reino di Dios!” Hesus a agregá: “Ta mas fásil pa un kamel pasa dor di wowo di un angua, ku pa un hende riku drenta e reino di Dios.”—Marko 10:21-23; Mateo 19:24.

Kiko Hesus tabata kier men? Rikesa ku adorashon berdadero no ta bai ku otro? Kristiannan mester sinti nan mes kulpabel si nan tin plaka? Dios ta rekerí di nan pa nan hiba un bida sin ningun komodidat i luho?

Dios Ta Aseptá “Tur Klase di Hende”

Den tempu antiguo Dios no a eksigí di e israelitanan pa nan biba den pobresa. Pensa riba esaki: Despues ku nan a okupá e tera ku a ser apuntá na nan, e pueblo a kuminsá praktiká agrikultura i komersio pa perkurá pa nan mes i pa nan sernan kerí. Faktornan manera e situashon ekonómiko, wer, salú òf abilidat di hasi negoshi lo a influensiá e éksito di nan esfuersonan. E Lei di Moises a manda e israelitanan tene kompashon ku esnan ku a haña nan ku problemanan ekonómiko i a bira pober. (Levítiko 25:35-40) Di otro banda, algun israelita a bira riku. Boaz, un hòmber di fe i integridat ku a bira un antepasado di Hesukristu, ta ser deskribí komo “un hòmber masha riku mes.”—Rut 2:1.

 Den tempu di Hesus e situashon a keda meskos. Ora Hesus a papia ku e hòmber riku menshoná den e introdukshon, no tabata su intenshon pa promové un bida di apstené di tur plaser, sin ningun komodidat i luho. Mas bien, e kier a siña su disipelnan un lès importante: Ku for di un punto di bista humano, lo por parse imposibel pa hende riku desplegá humildat i aseptá Dios su medio di salbashon. Sin embargo, Hesus a bisa: “Serka hende esaki ta imposibel, ma serka Dios tur kos ta posibel.”—Mateo 19:26.

E kongregashon kristian di promé siglo a aseptá “tur klase di hende.” (1 Timoteo 2:4, NW) Esaki a inkluí algun ku tabata riku, otronan ku tabatin un nivel di bida kómodo, i hopi ku tabata pober. Kisas algun persona a akumulá rikesa promé ku nan a bira kristian. Den otro kasonan, sirkunstansia faborabel i desishonnan sabí di negoshi kisas a hasi nan riku despues ku nan a bira kristian.

Awe tambe e hermandat kristian ta konsistí di hende di vários posishon ekonómiko. Nan tur ta hasi esfuerso pa sigui e guia ku Beibel ta duna enkuanto asuntunan di plaka, ya ku materialismo por afektá tur hende. E lès ku Hesus a siña su disipelnan relashoná ku e hóben gobernante riku ta spièrta tur kristian ku plaka i propiedat material por tin un influensia poderoso riba un persona.—Marko 4:19.

Un Spièrtamentu pa Hende Riku

Ounke Beibel no ta kondená rikesa riba su mes, loke sí e ta kondená ta amor pa plaka. E eskritor bíbliko Pablo a bisa: “Amor pa plaka ta rais di tur sorto di maldat.” El a remarká ku algun hende a bandoná interesnan spiritual debí na nan deseo pa bira riku i komo resultado nan “a desviá for di e fe, i a traspasá nan mes ku hopi doló.”—1 Timoteo 6:10.

Ta interesante ku Pablo a duna instrukshonnan spesífiko pa hende riku. El a bisa: “Instruí esnan ku ta riku den e mundu aktual pa nan no ta sobèrbè i pa nan no fiha nan speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.” (1 Timoteo 6:17) Evidentemente ta eksistí e peliger ku hende riku lo por bira arogante i sinti ku nan ta mihó ku otronan. Ademas, nan por ser tentá pa pensa ku rikesa por duna siguridat berdadero, lokual ta algu ku Dios so por duna.

Kristiannan ku ta bon pará por protehá nan mes kontra e peligernan aki dor di ta “riku den bon obra.” E bon obranan aki ta inkluí ser “generoso i dispuesto pa kompartí,” yudando esnan ku ta den nesesidat. (1 Timoteo 6:18) Kristiannan—sea riku òf pober—por usa tambe un parti di nan rekursonan pa yuda plama e bon nobo di e Reino di Dios, loke ta un di e kosnan ku mas ta interesá kristiannan berdadero djawe. E spiritu generoso aki ta revelá ku un persona tin e aktitut korekto pa ku propiedat material i esei lo pone Yehova Dios i Hesukristu stim’é, ya ku nan ta stima esun ku ta duna ku alegria.—Mateo 24:14; Lukas 16:9; 2 Korintionan 9:7.

E Kosnan Mas Importante

Pues, ta bisto ku un kristian no mester ta pober. Ni e no mester “kier bira riku.” (1 Timoteo 6:9) Simplemente kristiannan tin ku traha duru pa nan tin un entrada rasonabel ku nan por biba di dje. Dependiendo di vários faktor i di e sistema ekonómiko bou di kua nan ta biba, nan esfuerso lo logra diferente grado di éksito.—Eklesiástes 11:6.

Sea kual sea nan sirkunstansia finansiero, kristiannan mester hasi esfuerso pa “hasi sigur di e kosnan mas importante.” (Filipensenan 1:10, NW) Dor di pone balornan spiritual na promé lugá, nan ta “montoná pa nan mes e tesoro di un bon fundeshi pa futuro, pa nan gara loke ta bida berdadero.”—1 Timoteo 6:19.