‘Nos Ta Obedesé Dios Mas ku Hende’

Tempu ku Adam tabatin 17 aña di edat, e tabata un di e tres ganadónan di un kompetensia patrosiná dor di e Museo pa Konmemorá Holokousto na Merka. Na tur, kasi 500 persona a entregá sea un obra di arte òf un obra skirbí pa ilustrá kurashi bou di opreshon nazi. Adam ta un Testigu di Yehova, i el a disidí di krea un collage, un komposishon artístiko kolorido trahá di vários material, ku a mustra kon miembronan di su religion a sufri bou di e régimen nazi. Adam a bisa ku e obra di arte no a reflehá derota ni amargura, sino goso pa e echo ku Testigunan di Yehova a sali viktorioso for di e atake di e opresor kruel ei. Den e obra bo ta mira un mucha. Dikon? Segun Adam: “Pa mustra ku asta mucha a para firme kontra e persekushon nazi.”

Ta bon konosí ku durante e era nazi, Testigunan di Yehova a nenga di bisa “Heil Hitler” òf di apoyá Hitler su partido polítiko. Nan posishon firme a keda ilustrá den e skina na man drechi ariba den Adam su collage. Einan tin palabranan sitá for di un karta ku tur kongregashon di Testigunan di Yehova a manda pa gobièrnu aleman dia 7 di òktober 1934. En parti e karta a bisa: “Tin un konflikto direkto entre boso lei i Dios su lei, i siguiendo e ehèmpel di e fiel apòstelnan, ‘nos mester obedesé Dios mas ku hende,’ i esaki ta loke nos lo hasi tambe. (Echonan 5:29) . . . Komo ku boso gobièrnu i su funshonarionan ta sigui purba fòrsa nos pa desobedesé e lei di mas haltu di universo, nos ta haña nos obligá di notifiká boso ku, Dios mediante, nos lo obedesé Yehova Dios i konfia plenamente den dje ku E lo libra nos for di tur opreshon i opresor.”

Adam ta orguyoso di su herensia spiritual. El a bisa: “Testigunan di Yehova a kere firmemente ku nan no mester kousa daño na nan próhimo i ku nan mester adorá Dios so, asta si esaki a nifiká nan morto.” E posishon desididu di Testigunan di Yehova ta ser reflehá den e título di Adam su collage: “Nos Lo Obedesé Dios Mas ku Hende!”