Un Trabou Straño—Pero Mi Stim’é

E ZONIDU stèdi di e motor di mi boto spesialisá ta kibra e silensio di mainta, segun ku mi ta bandoná e haf di Gibson. Ta mainta tempran i ora pa mi sali en buska di mi “proi.”

Na kosta wèst di Kánada, hopi empleo—inkluso esun di mi—ta konektá ku kultivo i kapmentu di palu. Pero masha tiki di nan ta straño manera esun di mi. Mi ta rekuperá òf rekohé tronkon di palu. E no ta un trabou nobo. De echo, tin algun di nos ku ta di e di kuater generashon ku ta hasi e trabou di rekuperá tronkon di palu. Bo por bisa ku nos tabata hasi resiklahe promé ku el a bin na moda! Mi ta traha den e área di Howe Sound i e Estrecho di Georgia, entre Isla Vancouver i e kosta di e provinsia British Columbia. E region aki ta djis un parti di Vancouver su Distrito di Rekuperá Palu.

Un di e maneranan prinsipal ku kompanianan ku ta kap palu ta transportá e tronkonnan di palu, ta dor di tene nan huntu usando kabel flotante òf boto ku bòm plat. Ta mas ekonómiko pa transportá palu via awa i danki na Oséano Pasífiko, tin awa na abundansia aki banda. Sin embargo, tin hopi faktor ku ta pone ku e proseso no ta bai asina fásil. Bientu i marea ta kambia lihé, i tormentanan sa lanta diripiente. Pues, hopi tronkon ta lòs for di e kabelnan i ei ta kaminda e papel di e rekuperadó di tronkon ta kuminsá.

Kon Ta Rekohé Tronkon Pèrdí

Solamente personanan ku pèrmit tin mag di rekohé tronkonnan bendibel ku a lòs for di e kabelnan òf barkunan. Nos ta paga tur aña pa e pèrmit, i e promé biaha ku bo sak’é bo ta haña un stèmpel estilo di martin ku tin bo number di pèrmit. Kualkier tronkon ku bo haña ta drif òf kantu di un playa bou di e marka di marea haltu, bo por rekohé pa ser usá atrobe. Promé kos ku nos ta hasi ta stèmpel nos number di identifikashon riba dje.

Nos tin mester tambe di un boto bon ekipá. Esaki no ta manera un boto normal pa plaser. Nos ta usa botonan chikí pero fuerte, ku ta varia di boto ku motor pafó te na toubot, pero ku frame òf bòdi masha diki. Na kabes di e boto tin “djente” di heru ku ta ser usá pa pusha e tronkonnan, i semper nos tin un bon stòk di kabel. Nan ta kabel fuerte di aproksimadamente 4,5 meter largu ku un klabu grandi di metal pegá na su punta. Ora nos haña un tronkon ku nos por rekuperá, nos ta klaba e klabu bon den e tronkon  i ta pega e kabel na un palu na e boto. Tambe nos tin tur ekipo di siguridat nesesario na bordo.

Un persona ku kaba di kuminsá rekohé tronkon pèrdí ta deskubrí umbes ku e trabou aki ta mas kompliká ku e ta parse. Nos ta traha henter aña i ta kuminsá mainta trempan, sin importá kon wer ta. Den wenter tin biaha nos tin ku kibra eis pa nos por sali for di haf.

Unda nos ta haña tronkon di palu? Esei ta dependé hopi di dos faktor prinsipal: marea di laman i bientu. E rekuperadó ku eksperensia ta konsultá un mapa di marea promé ku e sali mainta. Kambionan ekstremo den nivel di laman ta mihó pa nos, pasobra esei ta trese mas tronkon. Ademas ta mas fásil pa hala tronkon for di playa ora laman ta haltu.

Semper ta importante pa tene kuenta konstante ku e wer. Konstantemente nos ta midi bientu, wak shelu i moveshon di e nubianan i kontrolá e koló di laman. Bientu di sùitost ta trese áwaseru, miéntras ku bientu di wèst hopi bes ta nifiká shelu kla pero ola grandi. Bientu di nortost, konosí lokalmente komo bientu squamish, den wenter ta nifiká  temperatura masha friu mes, awa brutu, sneu i—nos ta spera—tronkonnan pèrdí.

Klaba e klabu di un kabel na un tronkon ku ta drif semper ta emoshonante, pero loke ta realmente eksitante ta ora di hala e tronkonnan for di playa. Baranka skondí nèt bou di superfisie di awa por bora e bòm di nos boto i kousa hopi daño. Nos mester keda alerta.

Segun ku nos ta rekohé tronkon, nos ta tou nan hiba na vários área protehá kaminda por mara nan huntu. Nos ta laga nan einan te ora ta e dia semanal pa tou nan. Riba e dia ei nos ta rekohé i entregá tur e tronkonnan ku nos a rekuperá—entre 50 pa 100 tronkon—na sierto stashonnan pa risibí tronkon kaminda ta pisa nan i kalkulá nan balor riba merkado. E ora ei nan ta paga nos segun e balor di e tronkonnan ku nos a rekuperá.

Esaki por parse un dushi manera pa gana bo pan, pero tene kuidou! E trabou aki no ta pa hende sin kurashi. E tin hopi riesgo i peliger. Si bo no tene kuenta ku e wer, bo por haña bo den peliger. Afortunadamente Howe Sound tin hopi lugá kaminda bo por skonde i warda te ora un tormenta pasa. Un otro riesgo: Si un rekuperadó di tronkon deskuidá i kai na awa den wenter, djis un par di minüt den e awa friu ei por ta fatal. I bo ta kòrda e kabelnan ku klabu ku mi a deskribí kaba? Wèl, si bo no klaba e klabu bon den e tronkon, e por sali i bin dal duru den direkshon di e boto. Ménos mal ku ta un par di rekuperadó so a yega di haña sla di e klabu ei, i asina mes esei ta un eksperensia ku bo no ta lubidá.

Rekompensanan Personal i di Medio Ambiente

Dikon mi ta stima mi trabou? E kanal di Howe Sound ta un área popular pa pasa fakansi, kaminda hende ta pusta den diferente tipo di boto di bela. I komo ku tin asina hopi isla, tin sentenáres di kas di zomer i pues masha hopi boto di motor. Tin fèri ta kore konstantemente den dia pa transportá bishitante i habitante di isla pa tera firme i visevèrsa. Debí na e peligernan ku e tronkonnan ta forma, ta fásil pa mira e importansia di nos trabou.

Nos ta kontribuí na e siguridat di e tráfiko di boto ora nos ta piki e tronkonnan pèrdí. Tronkon ku tin hopi dia den awa ta kuminsá senk i kisas ta solamente un par di centimeter di e tronkon ta sali riba awa, i esei ta forma un peliger serio pa hende den boto. Sin embargo, pa nos e ta bon pasobra nos por rekuper’é i bend’é. Asina nos ta hasi e awanan mas safe i tambe ta yuda tene medio ambiente limpi.

Mi ta haña e trabou aki eksitante i fasinante. Kada dia ta diferente. Ora mi ta riba laman, e panorama rònt di mi ta kambia konstantemente. Mi a mira solo sali masha bunita mes den wenter, kambiando e sneu riba e serunan den un koló ros briante. Na momentunan asina mi gusta e airu friu i yen di salpeter.

Ta masha normal pa mira bestianan di mondi. Mi a yega di mira òter, marter, i vários tipo di kachó di awa i na gran kantidat. Mi a yega di wak águila ta piska i biná ta landa bai òf bini for di e islanan kantu di kosta. Ta masha impreshonante pa mira un dòlfein hunga den e olanan ku e chapaleta di mi boto ta krea, mira bayena shinishi pasa bai òf grupo di orka kòrta dor di e olanan!

Mi tawela a kuminsá rekuperá tronkon den dékada di 1930. El a pasa su amor pa laman i pa e trabou di rekuperá tronkonnan pèrdí pa su yu hòmbernan. Mi tata na su turno a pasa su amor i rèspèt pa e trabou aki pa su yunan. Ora mi tabatin sufisiente edat, mi tambe a skohe e trabou aki. Klaru ku e no ta e trabou mas importante den mi bida. Mi sirbishi na Dios ta bini na promé lugá, i esei ta duna mi hopi mas satisfakshon. Pero afortunadamente mi gusta mi trabou tambe, anto pa kasi 50 aña kaba. Ainda mi ta ansioso pa bai traha i buska tronkon.

Mi famia mes tambe ta traha huntu ku mi. Tin biaha den zomer ora anochi ta kalor, nos tur ta sali bai traha na un playa. Anto ora nos ta tou e tronkonnan hiba haf i nos tras tin un bahada di solo masha bunita, meuchi ta grita den laira, olanan ku ta bria tras di e boto i e lusnan ku ta kuminsá sende na kantu, wèl, tur esei ta duna bo un sintimentu di pas i intimidat ku e Kreadó. Mi ta kere ku esaki ta e motibu prinsipal dikon mi ta stima mi trabou.—Kontribuí.

[Plachi na página 21]

Momentu ku ta mara un tronkon pegá na playa

[Plachinan na página 21]

Ta normal durante e trabou di rekuperashon pa mira bestia di mondi

[Plachi na página 22]

Howe Sound su stashon pa risibí tronkon ta sigui funshoná asta den wenter