Bailarinnan ku Pluma Briante

DI E KORESPONSAL DI SPIÈRTA! NA KENIA

HOPI lawai. Gritamentu nònstòp i eksitá ta resoná riba superfisie di e lago aislá. Míles di para ros ta kana den e awanan briante, bèrdè bibu. Den laira, shelu tur dòrná ku hopi di nan ta un delisia pa bista. Segun ku nan ta bira i drei rònt riba e lago i ta bati nan alanan largu i fini, partinan kòrá bibu bou di nan ala ta bira visibel. E kantidat inmenso di para, ku nan koló briante, ta masha impreshonante! Pa loke ta trata para, esaki probablemente ta e maravia mas grandi na mundu: e flamingonan ros di e Gran Rift Valley di Áfrika.

Pianan Largu i Elegante

For di antigwedat hende a atmirá flamingo pa su estatura bunita i fini. Nan a graba imágennan di e para garganta largu riba piedra i tambe den e hiroglifnan egipsio. E para su aparensia tabata masha pekuliar i a ser atmirá asina tantu ku e egipsionan a vener’é komo personifikashon di e dios Ra. Pinturanan primitivo den kueba tambe ta presentá flamingo ku su garganta kurvá i delegá i pal’i pianan fini i elegante.

Awe nos por haña kuater sorto di flamingo den áreanan di Áfrika, Karibe, e kontinente  di Europa i Asia, i Suramérika. Flamingo chikí ta esun di ménos estatura. Su kolónan ta bunita, su plumanan ta ros pipa i su pianan ta kòrá bibu. Flamingo grandi òf chogogo ta dos biaha e tamaño di e flamingo chikí i ta bira 1,40 meter haltu. Tur flamingo tin un karakterístika en komun: e pik ku na mitar ta kurva bai abou, kreando un bunita bista.

P’e flamingo kuminsá bula, e ta bati su alanan elegantemente i ta kore dor di awa riba su pianan ágil, pa e haña e empuhe ku e mester p’e subi bai laira. Ku su garganta largu i kabes stret dilanti i su pianan mandá steif patras, e ta bula elegantemente den laira. Segun kálkulo tin kuater mion flamingo ta biba den e Gran Rift Valley di Áfrika.

Para Delikado, Ambiente Inhospitalario

E kantidat inmenso di flamingo ku ta habitá Rift Valley ta bai bon den e kadena di lago di soda realmente úniko den nan sorto. E awa tin asina tantu karbonato sódiko (natriumcarbonaat) ku ora bo mishi kuné e ta manera zeta i ta kima bo kueru levemente. Temperatura rònt di e lagonan di soda di Rift Valley por subi te na 65 grado Celsius. E awa ta skuma i manda un holó fuerte di suafel i salpeter ku ta keda kologá den e aire kayente. E awa tin un konsentrashon asina haltu di komponentenan alkalino i salu, ku nan ta kristalisá forma un kaska blanku a lo largu di e kosta.

Masha poko kriatura por biba den awa ásido asina. Sin embargo, tin algun kriatura chikiritiku ku ta sobrebibí den dje: lima  mikroskópiko koló blou bèrdè. E kalor di solo tropikal ta keinta e awa alkalino, kreando kondishonnan ideal pa e lima krese na gran kantidat. E konsentrashon di lima ta asina haltu ku nan ta pone e awa di e lago bira bèrdè. Meskos ku piedranan di esmeralda den un koyar fini, asina e kadena di lagonan di soda ta dòrna e vaye- i serunan ku ta kore a lo largu di e Gran Rift Valley.

Ta remarkabel kon un kriatura delikado manera flamingo por eksistí den un ambiente asina inhospitalario i desfaborabel. Sin embargo t’aki e ta rende. Su pianan fini ta resistí e awanan ásido, i e zwemvlies na su pia ta evitá ku e ta senk den e lodo suave i pegapega. Flamingo chikí ta hopi bon ekipá pa biba den e ambiente desfaborabel aki. Den su pik e tin un tehido fini ku por chupa i sefta e mikro-organismonan ku ta konsentrá den e promé 5 pa 7 centimeter di e kapa di awa. Ora e flamingo ta kome e ta tene su pik kabes abou, ku e punta mandá patras djis bou di superfisie di awa. Ku su lenga e ta chupa awa aden i ta push’é afó dor di e tehido ku ta filtra e awa i keda ku e organismonan mikroskópiko.

 Seremonianan Kolorido pa Buska Pareha

Ora solo di mainta sali riba e awanan bèrdè i briante di e lago, ta komo si fuera a hala un kortina grandi. E lus koló di oro ta revelá un trupa inmenso di flamingo ku ta bria meskos ku flam di kandela riba superfisie di e lago. E paranan ta di pak riba otro. Esnan ku ta duna show pa buska pareha ta marcha na grupo ku nan garganta stret, i nan ta zuai nan pik di un banda pa otro.

Segun ku gruponan di para ta marcha pasa banda di otro den direkshon kontrario, solo ta reflehá riba e plumanan delikado di e paranan, formando un kuadro di vários kontraste di koló kòrá i ros. E paranan ta bula-bula rònt i baila, habriendo nan alanan tur-tur pa mustra e plumanan kòrá bibu di nan ala. Komo si fuera bromando ku nan kolónan vibrante, nan ta kore dor di e awa i kuminsá bula mes, pa djis despues nan bolbe aterisá i ripití e ritual. E flamingonan ta asina di pak riba otro ku esnan meimei no por kuminsá bula promé ku esnan na rant di e trupa bula bai. Nan ta grita i saka zonidu tur eksitá, produsiendo un bochincha di otro mundu.

Anto diripiente un dia, despues ku bira skur, e paranan ta lanta vuelo masalmente i bula bai. Nan ta bula den filanan largu òf forma di V pa sientos di kilometer te ora ku nan yega nan destinashon: un lago di soda ku ta ideal pa traha nèshi i kria nan yunan. Un kos straño ta ku e migrashon aki ta sosodé pareu ku esun di otro flamingonan na otro lagonan di soda di Rift Valley.

Di Mahos pa Bunita

Flamingo ta skohe pa traha nan nèshi den lagonan ku ta hopi aislá i difísil pa yega na dje. Ta importante pa nan ta aislá asina, ya ku e kolonia di nèshi ta sumamente delikado. Si molestiá e mayornan, nan por bandoná nan webunan sin bolbe nunka mas.

E kolonia di nèshi tin masha hopi aktividat. Ku gran eksitashon mayornan ta kuminsá traha nèshi. Nan ta dobla nan garganta largu, i ku nan boka nan ta kohe lodo, pupu di para i un par di pluma pa traha un seritu di 40 centimeter haltu ku forma di pòpurèshi. Riba e tòp nan ta forma un hòl chikí ku ta protehá e webu for di e awa plat i alkalino. Nan ta pone un solo webu. Poko despues sientos di míles di puitu ta kuminsá brui. Un kantidat inmenso di mayor ta bula bai i bini na e sitio, okupá ku e trabou agotador di alimentá i kuida nan puitunan hambrá.

Anto ora e yunan ta sufisiente grandi pa kana, e mayornan di un dia pa otro ta laga nan i bula bai na un otro parti di e lago, kaminda tin mas tantu lima blou bèrdè. Einan, leu for di nan yunan eksigente, nan lo por kome i restorá nan energia. Un par di para adulto ku a keda atras ta reuní e numeroso yunan huntu manera den un krèsh. Bou di e kuido atento di e paranan adulto aki, e hóbennan bochinchero ta ser dirigí atraves di e saliñanan di salu te ora nan bolbe topa ku nan mayornan. Sorprendentemente, den tur e konfushon aki, kada mayor ta logra rekonosé su yu i sigui kuid’é.

E puitunan ta mahos i no parse nan mayornan bunita na kasi nada. Nan garganta i pianan ta kòrtiku, nan pik ta règt i nan plumanan ta gewon koló blanku. Despues di poko tempu nan pianan kòrtiku ta kuminsá krese, nan garganta ta kuminsá rèk i haña kurva, i nan pik ta kuminsá dobla bai abou, hañando e forma delikado i típiko pa flamingo. Ta dura un dos pa tres aña promé ku e puitu mahos bira un bunita flamingo ku pluma briante. E ora ei lo e buska su pareha i djòin e trupanan grandi di flamingo ros ku ta duna e lagonan di soda di Rift Valley un bista asina maravioso.

E flamingo su elegansia i bunitesa ta un ehèmpel asombroso di diseño inteligente. Opservando e bunita kriatura aki den naturalesa ta un plaser pa nos bista i oido. Pero mas ku esei, e ta profundisá nos apresio i amor pa su maravioso Kreadó, Yehova Dios.

[Plachi na página 17]

Flamingo grandi

[Plachi na página 17]

Flamingo chikí

[Plachinan na página 18]

E puitunan no parse nan mayornan bunita na kasi nada