Bo Mester di Bo Soño!

Ken lo no ta di akuerdo ku un bon sosiegu anochi ta un faktor esensial pa mantené bon salú? Pero tòg hopi hende no ta wòri masha ku drumimentu. “Ma e siguiente dia bo ta sufri e konsekuensianan,” segun Shawn Currie, sikólogo i profesor asistente na Universidat di Calgary na Canada. Ora bo no drumi sufisiente bo tin hopi chèns di lanta ku mas mal beis i tin biaha asta deprimí.

E korant Calgary Herald a bisa: “Sientífikonan ta kere ku drumimentu tin e funshon di refreská e selebro, i ku durante bo soño bo ta sigui siña.” Profesor Currie a remarká: “Anochi bo ta fortalesé bo rekuerdonan, i tur loke bo a siña den dia ta ser poné na nan lugá anochi. Eigenlijk, un hende ku no tin e periodo ei di sosiegu no por siña na drechi.” Ademas, el a bisa ku “ora bo drumi sufisiente, esei probablemente ta yuda bo stabilisá bo emoshonnan.”

Pues anto, kuantu bo tin ku drumi pa ta sufisiente? Ounke hopi eksperto ta duna ocho ora komo un regla general, Currie a bisa: “Kada hende su nesesidat di soño ta diferente.” P’esei e ta sugerí pa purba logra un soño di kalidat, es desir, un soño profundo i trankil. Pero kon hende por logra esaki, spesialmente esnan ku no por drumi anochi? At’akí algun sugerensia:

▪ Dal un baño ku awa lou promé ku bo bai drumi.

▪ Hasi ehersisionan moderá vários biaha pa siman; pero no hasi ehersisio pisá promé ku ora di drumi.

▪ Tene bo kamber ketu, skur i un tiki fresku.

▪ Purba lanta tur mainta na e mesun ora pa asina bo establesé un ritmo regular di drumi.

Ya ku ta probá ku un bon soño ta benefisiá bo salu, sea prudente i dun’é e debido importansia.