E Poder di un Sonrisa

OUNKE e ta dura djis un momentu, kisas bo ta keda kòrd’é pa restu di bo bida. E ta bal masha hopi, pero niun hende no ta asina pober ku e no tin pa dun’é ni asina riku ku e no tin mester di dje. Di kiko nos ta papia? Di un smail òf sonrisa.

Un hende ta smail dor di un kontrakshon di múskulo ku ta pone su wowonan bria i ta laga e hukinan di su boka bai ariba levemente, ekspresando satisfakshon. Un beibi ta smail for di den e promé simannan despues di nasementu, i naturalmente e mayornan nobo ta keda enkantá ku esaki. E promé smailnan ei ta konosí komo sonrisa involuntario òf di reflèks. Ekspertonan ta splika ku e tipo di smail aki ta aparesé hopi bes ora ku e beibi ta soñando i parse ku e ta relashoná ku su sintimentunan i ku aktividat di su sistema di nervio. Asta ora nos bira adulto, e sonrisa involuntario aki por presentá despues di un kuminda òf ora ku nos ta skuchando muzik.

Sin embargo, di seis siman pariba, un beibi ta smail komo reakshon riba un kara òf un stèm. E ‘sonrisa sosial’ aki—un sonrisa konsiente i boluntario—ta hasi nos kontentu, sea ku nos ta beibi òf adulto. Nan ta bisa ku e sonrisa ei asta tin un influensia positivo riba nos salú físiko. Segun e terapistanan di abla Mirtha Manno i Rubén Delauro, kendenan ta dirigí un klínika ku yama Sonrisa i Salú, e solo gesto di smail ta produsí un estímulo eléktriko ku ta influensiá e klir ku yama hipofise. E klir aki na su turno ta produsí endorfina, un supstansia kímiko den e selebro ku ta laga nos sinti kontentu.

Un otro motibu importante pa smail ta e efekto positivo ku e tin riba otro hende. Un sonrisa sinsero ta komuniká nos sintimentunan sin ku nos tin ku papia, sea e ta un sonrisa di saludo, di komprenshon òf di animashon. Tin biaha, si nos djis wak un potrèt di un mucha ku un bunita smail, esei por pone nos smail.

Ora un persona smail ku nos na un manera amabel, esei por laga nos sinti nos mas relahá. Tambe esei por yuda nos trata mihó ku frustrashon òf ku situashonnan difísil. Beibel ta rekomendá: “No laga di hasi bon na esnan ku meresé esaki, si ta den bo poder pa hasié.” (Proverbionan 3:27) Sí, ku un simpel sonrisa, nos por benefisiá nos mes i otro hende. Pakiko no hasi un esfuerso pa kompartí e regalo sumamente balioso aki: un sonrisa amabel?