Optené Informashon Kompletu i Eksakto

Tin vários asuntu ku ta difísil pa haña informashon kompletu i eksakto riba nan. Gobièrnunan i kompanianan ta papia mitar bèrdat. Medionan di komunikashon hopi bes ta primintí di duna informashon imparsial, sin embargo nan no ta kumpli ku nan palabra. Dòkternan no ta splika tur biaha a fondo kiko ta e efektonan sekundario di e remedinan ku nan ta duna nos. Tin un manera pa optené informashon konfiabel?

Hopi hende a elogiá e yegada di Internet komo e medio pa optené informashon di fuentenan konfiabel for di tur parti di mundu. Klaru ku esei ta posibel, pero basta bo sa presis unda pa buska riba Internet. Un editorial den The New York Times a bisa: “E bentaha mas grandi di Internet ta ku e por eduká hende mas lihé ku kualkier otro medio di komunikashon. Su desbentaha mas grandi ta ku e por hasi hende mas bobo, mas lihé ku kualkier otro medio di komunikashon.”

E editorial a sigui bisa: “Komo ku Internet ta impreshoná hende ku su ‘teknologia,’ esnan ku no ta bon informá ta bai mas lihé tras di loke e ta kontené. Nan no ta realisá ku e mayor desbentaha di Internet ta ku e ta manera un berpùt: un kanal elektróniko ku ta kontené informashon ku no a ser kontrolá ni filtrá.” Pero manera e eskritor a mustra, desafortunadamente no tin un programa di kòmpiuter ku ta delete loke ta porkeria.

Ken ku ta por pone kiko ku ta riba Internet, den un revista òf den un buki. Pues, nos tin ku usa nos kapasidat di distinguí i eduká nos mes di manera ku nos no ta kere sin mas tur loke nos lesa. Nos ku kier informashon eksakto tin ku hasi sigur promé ku nos fuente ta konfiabel. Esaki por tuma tempu. Pero unabes nos hasi esei i haña informashonnan kompletu i eksakto, nos por tin un manera di pensa sano, nos por husga kosnan korektamente i tuma desishonnan importante ku konfiansa.