Siria—Rastronan Visibel di un Historia Interesante

ETABATA situá na un di e krusadanan importante di e mundu antiguo: e lugá kaminda un tempu rutanan di karavana ku a kore di Mediteráneo pa China i di Egipto pa Anatolia a krusa otro. Ehérsitonan di Akkad, Babilonia, Egipto, Pèrsia, Gresia i Roma a yega di kana riba su suela. Anto siglonan despues, turkonan i e sòldánan di e Krusadanan tambe a pasa dor di dje. Den tempu moderno, ehérsitonan di Fransia i Inglatera a bringa pa nan por tin dominio riba dje.

Awe un parti di e region ei ainda ta karga e nòmber pa kua e tabata konosí míles di aña pasá: Siria. Ounke e área a pasa dor di hopi kambio, ainda nos por haña rastronan visibel di susesonan históriko ku a tuma lugá einan. Dor ku Siria a hunga un papel den historia di Beibel, ta foral hende ku ta studia Beibel ta interesá den dje.

Damasko, un Stat Hopi Bieu

Tuma por ehèmpel Damasko, kapital di Siria. Hende ta bisa ku e ta un di e statnan mas bieu na mundu ku a keda habitá for di tempu ku el a ser fundá. E ta situá na pia di e kareda di serunan yamá Antilíbano, i e Riu Barada ta pasa dor di dje. Damasko ta keda na rant di e gran Desierto di Siria i a sirbi pa siglonan komo un oásis ku biaheronan tabata ansioso pa yega na dje. Patriarka Abraham probablemente a bishitá e stat aki ora e tabata bayendo sùit rumbo pa Kanan. I el a tuma Eliezer, ‘ku ta di Damasko,’ den su famia komo kriá.—Génesis 15:2.

Kasi un mil aña despues, e reinan sirio di Soba a lucha kontra Saul, e promé rei di Israel. (1 Samuel 14:47) David, e di dos rei di Israel, tambe a bringa kontra e reinan di Aram (e nòmber hebreo pa Siria), i a derotá nan i “pone guarnishonnan na Siria di Damasko.” (2 Samuel 8:3-8) Asina Israel ku Siria a bira enemigu di otro pa hopi tempu.—1 Reinan 11:23-25.

Yegando den e promé siglo di nos era, e enemistat entre e sirionan i e hudiunan aparentemente a plakia. Tabatin asta vários snoa hudiu na Damasko e tempu ei. Kisas bo ta kòrda ku Saulo (despues yamá Pablo) di Tarso tabata riba

 kaminda di Yerúsalèm pa Damasko ora ku el a kombertí na kristianismo.—Echonan 9:1-8.

Damasko di aktualidat no tin ningun evidensia di e bishita di Abraham ni di e konkista di David. Pero sí a keda restunan di e stat bieu romano i tambe un kaya prinsipal ku ta pasa duars dor di e stat bieu i ku ta sigui e rumbo di e antiguo Via Recta romano (Kaya Stret). Tabata den un kas riba e kaya aki ku Ananias a haña Saulo despues ku Saulo a kombertí milagrosamente na kristianismo djis pafó di Damasko. (Echonan 9:10-19) Ounke awe e kaya ta masha distinto for di loke e tabata den tempu romano, ta einan apòstel Pablo a kuminsá ku su karera ekstraordinario. Kaya Stret ta terminá na e porta Bab-Sharqi di e stat romano. E murayanan di e stat, ku tin kas riba nan, ta yuda nos komprondé kon Pablo por a skapa ora nan a bah’é den un makutu dor di un habrí den e muraya.—Echonan 9:23-25; 2 Korintionan 11:32, 33.

Palmira—Un Oásis Históriko

Si bo kore mas o ménos tres ora ku outo den direkshon nortost for di Damasko bo ta haña un sitio arkeológiko remarkabel: Palmira, ku den Beibel ta ser yamá Tadmor. (2 Krónikanan 8:4) Situá na mitar di kaminda entre Laman Mediteráneo i e Riu Eufrátes, e oásis aki ta haña su awa di fuentenan supteráneo ku ta kore for di e serunan den nort. E antiguo ruta komersial entre Mesopotamia i paisnan  den wèst a pasa dor di e área ku yama Media Luna Fèrtil i p’esei a kore hopi pa nort di Palmira. Sin embargo, den siglo 1 promé ku nos era, instabilidat polítiko den nort a pone ku hende tabata kier un ruta mas kòrtiku i mas pa sùit. Asina Palmira a drenta den su era di mayor prosperidat.

Komo ku Palmira tabata útil pa Roma komo un zona di defensa na e rant oriental di e imperio, nan e integr’é komo parti di e provinsia romano Siria, pero ku tempu nan a deklar’é un stat liber. Palmira tabatin un kaya magnífiko ku kolumnanan na ámbos banda, i a lo largu di e kaya ei tabatin tèmpelnan grandi, bognan monumental, bañonan i un teater. E galerianan na kada banda di e kaya tabata drechá ku piedra pa hende na pia, pero e kaya prinsipal sentral nan a laga di tera pa mas fásil pa e karavananan di kamel ku tabata pasa dor di dje. Karavananan ku tabata biaha e ruta komersial entre China i India den Ost i e parti di Gresia i Roma den Wèst tabata hasi un parada na Palmira. Einan nan a ser obligá na paga impuesto riba e seda-, speserei- i otro merkansia ku nan tabata transportá.

Durante su mihó tempu, den siglo 3 di nos era, Palmira tabatin rònt di 200.000 habitante. Tabata durante e tempu aki ku e Reina ambisioso Zenobia a lucha kontra Roma i a ser derotá finalmente na aña 272. Ku esei, Zenobia inkonsientemente a kumpli ku parti di un profesia ku profeta Daniel a skirbi un 800 aña mas promé. * (Daniel, kapítulo 11) Despues di e derota di Zenobia, Palmira a keda eksistí pa un tempu komo un base militar stratégiko di e Imperio Romano, pero nunka mas el a rekuperá e poder i splendor ku e tabatin.

Rumbo pa Eufrátes

Ora bo sali for di Palmira i kore tres ora ku outo dor di desierto den direkshon nortost bo ta haña e stat Dayr az Zawr, kaminda bo por mira e impreshonante Riu Eufrátes. E riu históriko aki ta originá for di e serunan den ost di Anatolia (e parti asiátiko di Turkia). E ta drenta Siria un poko pa nort di Karkemis, i ta sigui kore den direkshon sùitost dor di Siria te den Irak. No muchu leu for di e frontera irakí tin e restunan di dos stat antiguo di Siria.

Shen kilometer den direkshon sùitost, den un kurva di e Riu Eufrátes, tin e ruinanan di e antiguo stat fortifiká Dura-Europos. Un 25 kilometer mas leu den direkshon sùitost tin e sitio di Mari. Un tempu e tabata un stat komersial próspero, pero Rei Hammurabi di Babilonia a destruyé den siglo 18 promé ku nos era. Den e archivonan di su palasio real arkeólogonan a haña por lo ménos 15.000 tabla di klei ku kos skirbí ariba. E dokumentonan aki a revelá hopi informashon tokante e historia di e tempu ei.

Ora Hammurabi su tropanan a destruí e stat, nan a basha e parti ariba di e murayanan abou, yenando e kuartonan mas abou ku blòki i tera. Esaki a yuda protehá e palasio su kuadronan pintá riba muraya, su estatuanan, serámika i kantidat di otro artefakto te ora ku un tim di arkeólogo franses a deskubrí e sitio na 1933. Bo por mira e artíkulonan aki den e museonan di Damasko i Aleppo i tambe den esun di Louvre na Paris.

Statnan Antiguo den e Parti Nortwèst di Siria

Siguiendo Riu Eufrátes den direkshon nortwèst ta hiba bo Aleppo (Haleb). Hende ta bisa ku Aleppo, meskos ku Damasko, ta un di e statnan mas bieu na mundu ku semper a keda habitá. E suknan (merkado kubrí) di Aleppo ta entre esnan mas pintoresko di Medio Oriente.

Un poko pa sùit di Aleppo tin Tell Mardikh, e sitio di Ebla, un antiguo stat-estado. Ebla tabata un stat komersial poderoso ku a dominá e parti nort di Siria durante e periodo di aña 2600 pa 2240 promé ku nos era. Arkeólogonan ku a koba einan a deskubrí e restunan di un tèmpel dediká na e diosa babilonio Istar. Tambe nan a haña un palasio real ku tabatin mas ku 17.000 tabla di klei den su kuartonan di archivo. Bo por mira e artefaktonan di Ebla den e museo na Idlib, ku ta un pueblo chikí ku ta keda un 25 kilometer for di e sitio.

Sùit riba e kaminda di Damasko tin Hama, ku den Beibel ta ser yamá Hamat. (Numbernan 13:21) Riu Orontes ta pasa dor di Hama, i ta hasié un di e statnan mas agradabel di Siria. Despues ta bini Ras Shamra, e sitio di e antiguo stat Ugarit. Dos pa tres mil aña promé ku nos era, Ugarit tabata un haf komersial próspero ku tabata profundamente enbolbí den adorashon di Baal i Dagon. Desde 1929, arkeólogonan franses a koba saka hopi tabla di klei i artefaktonan di bròns ku kos skirbí riba nan ku a revelá un kantidat di kos en konekshon ku e karakter degradá di adorashon di Baal. Esaki ta yuda nos komprondé mihó dikon Dios a manda eksterminá e kananeonan ku tabata adorá Baal.—Deuteronomio 7:1-4.

Sí, den Siria moderno ainda bo por mira rastronan di un historia interesante.

[Nota]

 [Mapa na página 24, 25]

(Pa e teksto den su formato kompleto, wak e publikashon)

LAMAN MEDITERÁNEO

Fronteranan riba kua tin disputa

EGIPTO

ISRAEL

HORDANIA

LÍBANO

SIRIA

DAMASKO

Barada

Orontes

Hama (Hamath)

Ugarit (Ras Shamra)

Ebla (Tell Mardikh)

Aleppo (Haleb)

Karkemis (Jerablus)

Eufrátes

Zenobia

Dayr az Zawr

Dura-Europos

Mari

Palmira (Tadmor)

IRAK

TURKIA

[Plachinan na página 24]

Damasko (abou) i Kaya Stret (ariba)

[Plachi na página 25]

Kasnan den forma di kas di abeha

[Plachi na página 25]

Ugarit

[Plachi na página 25]

Hama

[Plachi na página 26]

Mari

[Plachi na página 26]

Aleppo

[Rekonosementu]

© Jean-Leo Dugast/Panos Pictures

[Plachi na página 26]

Palasio real, Ebla

[Plachi na página 26]

Wardadónan na Zenobia

[Plachinan na página 26]

Palmira

[Plachi na página 26]

Riu Eufrátes na Dura-Europos

[Rekonosementu pa Potrèt na página 25]

Muchanan: © Jean-Leo Dugast/Panos Pictures; kasnan den forma di kas di abeha: © Nik Wheeler