E Punto di Bista Bíbliko

Tin un Piká Imperdonabel?

TIN un kastigu mas pió ku morto? Sí, morto sin e speransa di haña un resurekshon pa motibu di un piká imperdonabel. Hesus a bisa ku tin un tipo di piká ku “lo no wòrdu pordoná.”—Mateo 12:31.

Sin embargo, Beibel ta mustra ku Dios ta dispuesto pa pordoná. Ounke hende kisas ta inkliná na karga renkor i keda sin pordoná, Dios sí ‘ta pordoná abundantemente.’ (Isaías 55:7-9) De echo, Dios a hasi un gran sakrifisio mandando su Yu stimá na mundu pa e sirbi komo un sakrifisio asina balioso ku esei por kita nos pikánan.—Huan 3:16, 17; Echonan 3:19; 1 Huan 2:1, 2.

Na Dios su debido tempu lo e resusitá hopi hende ku tabata kulpabel di pikánan grave pero ku lo no ta responsabel mas pa loke nan a hasi den pasado. (Echonan 24:15; Romanonan 6:23) De echo, Hesus a bisa ku “tur piká i blasfemia lo wòrdu pordoná,” ku eksepshon di e piká imperdonabel. (Mateo 12:31) P’esei kisas bo ta puntra bo mes: ‘Kiko lo por ta asina teribel ku Dios lo no por pordoná?’

Ora No Ta Posibel Mas pa Repentí

Hesus su spièrtamentu a referí na “blasfemia [deliberá i boluntario] kontra e spiritu.” Un hende no ta wòrdu pordoná pa e tipo di piká aki. “Ni den e siglo aki, ni den e siglo ku ta bin,” Hesus a agregá. (Mateo 12:31, 32) Esnan kulpabel di e piká ei lo no ser resusitá.

Kiko ta blasfemia kontra e spiritu? Esei ta sali di kurason, i ta revelá un aktitut i intenshon malisioso. E intenshon deliberá pa bai kontra e spiritu santu di Dios ta hasi e piká aki mas grave. Pa ilustrá esaki: Den algun parti di mundu, lei ta hasi un distinshon entre asesinato den promé grado i asesinato den segundo grado a base di e intenshon i e manera ku e asesinato a ser kometé. Pena kapital (kastigu di morto) ta solamente pa asesinato intenshonal òf premeditá.

Apòstel Pablo tabata ántes un blasfemadó, pero el a bisa: “Mi a haña miserikòrdia, pasobra mi a aktua ignorantemente.” (1 Timoteo 1:13) Peka kontra spiritu santu ta nifiká bai kontra dje deliberadamente. E ta enserá un kurason malbado ku ta yega na un punto  kaminda no ta posibel pa bira bèk.

Evidentemente Pablo tabata referí na e tipo di piká aki ora el a skirbi: “Den kaso di esnan ku un tempu a wòrdu iluminá i ku a purba e don selestial, i ku a bira partisipantenan di spiritu santu, i ku a purba e bon palabra di Dios i e podernan di e siglo ku ta bin, i despues a kai, ta imposibel pa trese nan bèk na repentimentu.” (Hebreonan 6:4-6) Tambe e apòstel a bisa: “Si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas.”—Hebreonan 10:26.

Tabata e kondukta di algun lider religioso den Hesus su tempu ku a pon’é duna e spièrtamentu kontra e piká imperdonabel. Pero nan no a hasi kaso di su spièrtamentu. De echo, nan a laga mat’é. Despues nan a tende evidensia inegabel ku spiritu santu a hasi algu milagroso. Nan a haña e notisia ku Hesus a ser lantá for di morto! No tabatin niun duda ku Hesus tabata e Kristu! Pero tòg nan a aktua ku malisia kontra spiritu santu dor di paga e sòldánan romano pa nan gaña tokante e resurekshon di Hesus.—Mateo 28:11-15.

Spièrtamentu pa Kristiannan Berdadero

Pakiko kristiannan berdadero ta tuma e spièrtamentu tokante e piká imperdonabel masha na serio? Pasobra ounke nos tin konosementu eksakto di Dios i di e aktividat di su spiritu, nos lo por desaroyá un kurason malbado. (Hebreonan 3:12) Nos mester tene kuidou pa nos no pensa ku nunka esaki lo por pasa ku nos. Tuma por ehèmpel Hudas Iskariot. Un tempu e tabata un fiel siguidó di Hesus. El a ser skohé komo un di e 12 apòstelnan, kier men e mester tabatin bon kualidat. Pero na dado momentu el a kuminsá laga pensamentu- i deseonan malbado desaroyá den dje, i ku tempu eseinan a domin’é. Durante e tempu ku e tabata testigu di e milagernan inkreibel di Hesus, e tabata hòrta plaka. Anto pa plaka, el a traishoná e Yu di Dios konsientemente.

Algun hende ku un tempu tabata kristian fiel, deliberadamente a bira lomba pa Dios, podisé debí na renkor, orguyo òf golosidat, i awor nan ta apóstata ku ta lucha kontra e spiritu di Dios. Deliberadamente nan ta bai kontra loke ta bisto ku e spiritu ta logrando. E personanan aki a kometé e piká imperdonabel? Ta Yehova ta e Hues final.—Romanonan 14:12.

En bes di husga otro hende, ta bon pa nos vigilá nos mes pa nos no kometé piká den sekretu ku pokopoko por hasi nos kurason duru. (Efesionan 4:30) Un kos ku ta konsolá nos ta e echo ku Yehova lo pordoná nos abundantemente—asta si nos a kometé pikánan serio—basta nos repentí.—Isaías 1:18, 19.

[Plachi na página 14, 15]

Algun fariseo a kometé e piká imperdonabel