“Un Krímen Hopi Baho”

MARIA * a bira prostituta ora e tabatin 14 aña. El a kuminsá ku e estilo di bida horibel aki riba insistensia di su propio mama. Su mama a bis’é ku e tabata bunita i ku hende hòmber lo gust’é masha hopi i ku lo e por gana hopi plaka. Anochi Maria su mama tabata hib’é na un hotèl kaminda nan tabata topa hende hòmber. E mama tabata keda den serkania pa kobra. Tur anochi Maria tabata hasi sèks ku tres òf kuater hòmber.

Carina di 13 aña, no ta biba muchu leu for di Maria su kas, i e tambe a ser obligá pa praktiká prostitushon. Meskos ku hopi otro famia ku tabata biba den su komunidat di obreronan di plantashon di suku, Carina su famia a fòrs’é bende su kurpa i asina oumentá e tiki entrada ku nan tabatin. Estela, kende ta biba den un otro bario, a stòp di bai skol na un edat hóben, sin sa skirbi ni lesa, i a kuminsá traha komo prostituta riba kaya. Anto Daisy tabatin mas o ménos seis aña ora ku un di su ruman hòmbernan a abusá di dje seksualmente; despues hopi mas di e aktonan ei di insesto a tuma lugá kuné. El a bira prostituta ku 14 aña.

 Den hopi parti di mundu e problema di prostitushon di mucha ta un realidat alarmante. E resultadonan ta trágiko. Hopi bes mucha ku ta praktiká prostitushon, sea de bes en kuando òf dia den dia afó, ta metí tambe den kriminalidat i uso di droga. Hopi di nan ta sinti nan mes frustrá i indigno, i kasi no ta mira niun posibilidat di skapa di e bida deplorabel ku nan ta hiba.

Personahenan di gran influensia ta rekonosé e efektonan desastroso di prostitushon di mucha. Fernando Henrique Cardoso, eks-presidente di Brazil, a deklará aptamente: “Prostitushon di mucha ta un krímen hopi baho.” Un korant brazilero a publiká e komentario serio aki tokante prostitushon di mucha: “Paisnan kaminda e práktika ei ta komun i e ta ser tolerá, aseptá i asta promové debí na e [plaka] ku e ta produsí, ta eksperensiá tur dia e daño ku e ta kousa. Te na ora mes e produsí kualkier ganashi finansiero, inevitablemente tur kos ta bai pèrdí dor di e desasternan personal, di famia i sosial ku e praktiká ei ta kousa.”

Sin embargo, apesar di e intenshonnan noble di esnan ku kier pone un paro na prostitushon di mucha, e problema ta sigui krese. Ta kiko ta hiba na e situashon horibel aki? Dikon asina tantu hende ta tolerá òf asta promové un aktividat kriminal asina?

[Nota]

[Komentario na página 3]

“Prostitushon di mucha ta un krímen hopi baho.”—FERNANDO HENRIQUE CARDOSO, EKS-PRESIDENTE DI BRAZIL

[Komentario na página 4]

“Tur forma di eksplotashon seksual ta bai kontra dignidat humano, i p’esei ta violá derechonan humano fundamental, sin importá e edat, sekso, rasa, grupo étniko òf nivel di bida di e víktima.”—UNESCO SOURCES