Bo Sapatunan Ta Realmente Kómodo?

“Kada ken sa unda su sapatu ta pèrt’é.”—SUPUESTAMENTE DI UN SABIO ROMANO.

KI DIA tabata e último biaha ku bo a kumpra sapatu? Nan a sinta bo bon? Nan tabata kómodo? Kuantu bo a dura pa skohe nan? Kon bon e bendedó a yuda bo? Bo a kumpra nan djis pasobra nan tabata nèchi òf pasobra nan tabata kómodo? Kon nan ta fit awor ku bo tin un par di dia ta bisti nan? Nan ta primi bo?

Kumpra sapatu no ta fásil. I pa haña e sais korekto ta mas kibramentu di kabes. Dikon ta asina?

Kon pa Haña e Sais Korekto

Promé ku tur kos, kua pia ta mas grandi, bo pia rèks òf esun lenks? Si bo ta pensa ku tur dos ta meskos, bo ta gran kiboká! Un otro faktor pa tene kuenta kuné ta ku kada pia tin kuater tipo di fit: fit státiko, fit pará, fit dinámiko i fit termal. Kiko ta e diferensia?

E buki Professional Shoe Fitting (Midi Sapatu Profeshonalmente) ta bisa tokante e fit státiko: “Esaki ta e manera ku e sapatu ta fit ora ku e pia ta den posishon di sosiegu (e kliente ta sintá).” Manera e ekspreshon “fit pará” ta indiká, nan ta midi e pia ora ku e persona ta pará. E posishon aki ta kambia e tamaño i forma di bo pia. E buki menshoná ariba ta bisa: “Ora e pia ta den posishon di sosiegu, e ta manera un saku hanchu ku wesu i kraakbeen aden ku diripiente ta ‘span’ ora e persona lanta para, i p’esei e pia ta rekerí un otro fit e ora ei.” Pero tin dos fit mas.

E fit dinámiko ta e fit di bo pia ora bo ta move: kana, kore, bula òf hasi kualkier otro ehersisio. Esaki “ta krea un pia ku ta kambia konstantemente di sais, forma i proporshon.” E di kuater fit ta esun termal, ku ta referí na e kambionan ku ta tuma lugá a konsekuensia di kayente i humedat. E kosnan aki por oumentá  e volúmen di pia ku 5 porshentu. Nada straño anto ku bo ta sinti un alivio ora bo kita bo sapatunan na final di dia, foral si bo no ta bisti e sais korekto! I hopi bes esei ta e kaso.

Kon Nan Ta Midi Bo Pianan?

Pa añanan largu Eric tabata kumpra sapatu sais 10 i mei òf 11 (45-45¹⁄2), hanchura mediano. Durante e mesun periodo ei, e tabatin konstantemente un lekdor ta molesti’é riba su dede kròm i tambe un uña ku a krese den karni na su dede grandi lenks. Su pedikurista a sugerié pa laga un mididó profeshonal di pia midi su sais di sapatu. Pa Eric su sorpresa, e sais kómodo p’e mester tabata 12 i mei (47¹⁄2), hanchura E! “E” ta indiká un pia smal. * Pero djis midi e largura i hanchura di bo pia so ta basta pa garantisá ku un sapatu ta keda kómodo? Kon bo mester midi bo pia?

E aparato di Brannock ta un instrumènt popular den algun pais pa midi sais di pia. (Wak e potrèt.) Por us’é pa haña tres midí básiko: e largura general di bo pia, e distansia di hilchi te na komienso di bo tonchi (e parti ku ta kuminsá despues di bo tenchinan), i e hanchura di bo tonchi. Klaru ku kada un di bo pianan tin su propio forma i volúmen. Ta pa e motibu ei nos ta pas sapatu promé ku nos kumpra nan. Pero tin biaha nan por kue nos kabes abou. Bo ta pas un sapatu ku realmente bo a gusta, pero e ta un tiki pèrtá. E bendedó ta bisa bo: “E sapatunan ta hancha.” Bo ta kumpra nan, i despues di un par di dia òf siman ta duel bo ku bo a hasi esei. I ta asina bo siguiente lekdor, wanete na tenchi grandi òf uña ku ta krese den karni ta kuminsá!

Bo Por Haña un Sapatu Ku Ta Pas Perfektamente?

Ta posibel haña un sapatu ku ta pas perfektamente? E buki Professional Shoe Fitting ta bisa  simplemente ku nò. Dikon nò? “Debí na vários opstákulo insuperabel. . . . Niun hende no tin dos pia di eksaktamente mesun sais, forma, proporshon ni ku ta funshoná meskos.” P’esei si un sapatu ta perfekto pa bo pia mas grandi, lo e no ta fit mes bon na e otro pia. “Esaki no kier men ku no ta posibel pa haña un sapatu ku ta fit bon, pero solamente nos mester tene kuidou ku e palabra òf idea di sapatu ku ta pas ‘perfektamente.’”

Si bo kier sa unda bo pianan ta primi mas tantu den un sapatu, saminá algun di bo sapatunan bieu i usá. Wak e furu den e sapatu. Unda bo ta mira ku ta mas gastá? Hopi biaha, e ta mas gastá na e hilchi, patras di e hilchi i na e tonchi. Kiko esaki ta nifiká? E ta nifiká ku “sierto sekshonnan di e sapatu no ta pas bon ku e sekshon korespondiente di bo pia. Algun sekshon ta gasta di mas miéntras ku kasi bo pianan no ta mishi ku otro sekshonnan.”

Asta e gargant’i sapatu ta importante pa bo komodidat. Bo a yega di ripará ku tin diferente estilo? Ku e estilo balmoral, bo ta hala e dos klèpnan huntu na e punto mas abou di e feternan. Sin embargo, si bo pia ta diki, anto e estilo blücher ta mas kómodo, pasobra e punto mas abou di e feternan ta keda habrí. (Wak e plachi.) Dikon e detaye aki ta importante? E mesun fuente ta bisa: “Mayoria biaha ku bo hilchi feila ta pasobra un sapatu ta muchu pèrtá na e kupi di pia (wreef), lokual ta pusha e hilchi patras kontra e sapatu.”

Kiko di Sapatu Hilchi Haltu di Hende Muhé?

E echo ku hende muhé ta gusta bisti sapatu hilchi haltu ta pone diferente forma di preshon riba e kurpa. Hilchi haltu tin e tendensia di kambia e postura di kurpa. Hopi bes e ta pone e kurpa lèn dilanti, lokual na su turno, ta obligá e rudia dobla mas tantu pa e kurpa por keda stret. Tambe hilchi haltu ta hasi e múskulonan di e batata di pia mas kòrtiku, i nan ta bira mas riparabel.

Pues, e hilchi di un hende muhé su sapatu ta hopi bes e parti krusial ku ta determiná si e sapatu ta sinta kómodo òf nò. Professional Shoe Fitting ta bisa ku tin tres motibu prinsipal pakiko tin sapatu hilchi haltu: ‘(1) “statùs,” por ehèmpel pa hasi un hende mas haltu, (2) motibunan estétiko, pa e sapatu tin un diseño òf estilo adishonal i (3) mihó aparensia, pasobra sapatu hilchi haltu di hende muhé ta duna nan pal’i pia mas forma.’

Hende muhé mester tene kuenta foral ku e posishon di e hilchi, pasobra esei ta determiná na unda e peso di kurpa ta primi riba e hilchi. Si tur e peso ta kai na e parti patras òf parti dilanti di e hilchi, esei lo por kousa problema. Dikon? Pasobra e por pone e hilchi bira, i asina kousa un mal kaida.

For di e análisis kòrtiku aki, ta bisto ku pa haña e sapatu ku ta pas bo pia bon ta tuma tempu i kisas asta mas plaka, ya ku ta kosta mas tempu pa produsí un bon sapatu. Pero bo sapatunan por tin gran influensia riba bo bienestar general i asta riba bo salú. P’esei tuma bo tempu. Sòru haña e midí korekto. Tene pasenshi. No laga moda òf e manera ku e sapatu a keda, nèk bo.

[Nota]

[Kuadro na página 20]

Puntonan pa Tene Kuenta Kuné ora di Skohe Sapatu

William A. Rossi i Ross Tennant ta ofresé e siguiente sugerensianan den nan buki Professional Shoe Fitting.

“E propósito di midi pia no ta, manera algun hende ta kere, pa determiná ki sais eksakto bo mester bisti.” Dikon nò? Pasobra e sais di sapatu ta ser influensiá dor di hopi faktor, manera haltura di e hilchi, estilo, patronchi, material usá i marka di e sapatu. Esaki ta spesialmente sierto awe ku sapatunan ta ser fabriká den asina hopi pais ku normanan distinto.

Ora un hende ta midi bo pia, hala e punta di e mea dilanti pa asina bo tenchinan no keda doblá, sino bo ta haña un midí ku no ta kuadra.

Kon bo mester midi bo pia? Sintá òf pará? “Midi pia di un kliente ku ta sintá, ta e manera floho di hasié.” I e resultado ta un midí robes. P’esei, lanta para pa laga nan midi bo pianan. Sí, ámbos pia. No asumí ku e pia robes ta mas grandi. Midi tur dos!

“Ta solamente un grupito di persona hopi bon entrená ta duna e servisio eksklusivo di midi pia na un manera profeshonal. Nan ta traha den koperashon estrecho ku un kantidat di negoshi igualmente selekto ku tambe ta komprondé i apresiá e importansia di midi pia dor di un profeshonal.”

[Diagramnan na página 19]

(Pa e teksto den su formato kompleto, wak e publikashon)

Komponentenan di un sapatu

zol

material parti pafó

gargant’i sapatu

hielpand

parti dilanti di e hilchi

tapita

wreefnaad

material parti pafó

kosé di leng’i sapatu

furu

boka

kosé

kusinchi di hilchi

hilchi

[Plachinan na página 20]

Aparato di Brannock

[Plachi na página 21]

Tur diseño di sapatu ta basá riba e shete estilonan básiko aki

[Plachinan na página 21]

Estilo di gargant’i sapatu

Blücher

Balmoral