E Punto di Bista Bíbliko

Kon Nos Mester Usa Nos Libertat di Skohe?

DIOS a krea e promé pareha humano, Adam ku Eva, ku e kapasidat di por skohe loke nan kier. El a laga e hòfi di Eden na Adam su enkargo. Un di Adam su debernan tabata di skohe nòmber pa e bestianan. (Génesis 2:15, 19) Mas importante ainda, Adam ku Eva por a disidí si nan ta obedesé Dios òf nò.—Génesis 2:17, 18.

For di e tempu ei en adelante, hende a tuma míles di miónes di desishon. Hopi di nan tabata bon desishon, algun tabata inapropiá, i tambe tabatin desishonnan totalmente malbado. Algun mal desishon ku hende a tuma a produsí resultadonan desastroso. Tòg, Dios no a interferí nunka ku nos derecho di skohe. Komo un Tata amoroso, Dios a perkurá e páginanan di Beibel pa yuda nos tuma bon desishon. Tambe e ta spièrta nos pa e konsekuensianan di mal desishonnan ku nos tuma. Beibel ta bisa ku nos lo kosechá loke nos sembra.—Galationan 6:7.

Desishon den Asuntunan Personal

Tin algun asuntu di kua Dios a bisa bon kla kiko ta su boluntat relashoná ku nan, i riba esakinan el a duna nos instrukshon spesífiko. Sin embargo, den mayoria kaso Beibel no ta pone regla pa dirigí tur nos asuntunan personal. Mas bien, e ta duna guia general ku ta permití preferensia- i deseonan personal. Por ehèmpel, tuma nota di loke Beibel ta bisa di rekreo.

E Skritura ta yama Yehova “e Dios felis.” (1 Timoteo 1:11, NW) Dios su Palabra ta papia di “un tempu pa hari” i “un tempu pa balia.” (Eklesiástes 3:1, 4) Beibel ta konta  nos ku Rei David a toka muzik pa otro hende. (1 Samuel 16:16-18, 23) Hesus a asistí na un fiesta di kasamentu, i el a hasi algu spesial pa e okashon ei dor di kombertí awa den biña.—Huan 2:1-10.

Sin embargo, Beibel aptamente ta spièrta: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) “Chansanan vulgar” i aktividatnan inmoral ta ofendé Dios i por kibra nos relashon kuné. (Efesionan 5:3-5) Ora ku alkohòl ta kore libremente na evenementunan sosial, esei por resultá den problemanan serio. (Proverbionan 23:29-35; Isaías 5:11, 12) Yehova Dios ta odia violensia tambe.—Salmo 11:5; Proverbionan 3:31.

E versíkulonan di Beibel aki ta yuda nos mira rekreo manera Dios ta mir’é. Ora di skohe, kristiannan ta tene kuenta ku loke Beibel ta bisa. Klaru ku na final di kuenta nos tur lo risibí e bon òf mal konsekuensianan di nos propio desishonnan.—Galationan 6:7-10.

Di mesun manera kristiannan ta ser animá pa tuma desishonnan sabí di akuerdo ku prinsipionan bíbliko den asuntunan manera bistimentu, kasamentu, responsabilidat komo mayor i tratonan di negoshi. Tin aspektonan di esakinan ku no ta ser menshoná spesífikamente den e Skritura, sin embargo e prinsipionan ku tin den Beibel ta yuda kristiannan tuma desishonnan basá riba nan konsenshi. (Romanonan 2:14, 15) E siguiente norma mester konta pa tur desishon personal ku kristiannan ta tuma: “Sea ku boso ta kome òf bebe òf kiko ku boso ta hasi, hasi tur pa e gloria di Dios.”—1 Korintionan 10:31.

Relashoná ku e asuntu di skohe i tuma desishon, ta bon tambe pa nos kòrda e prinsipio di ‘atendé ku nos mes asuntu.’ (1 Tesalonisensenan 4:11) Hopi bes kristiannan por skohe entre vários opshon ku no ta na konflikto ku e boluntat di Dios. P’esei loke un kristian ta preferá por ta distinto for di e gustu di un otro kristian. Dios lo no keda kontentu si e mira su sirbidónan ta husga otro. (Santiago 4:11, 12) Beibel ta duna e konseho sabí aki: “No laga ningun di boso sufri komo . . . un ku ta mete den asuntu di otro.”—1 Pedro 4:15.

E Desishon di Sirbi Dios

Beibel ta enfatisá e benefisionan di obedesé Dios. Pero tòg Dios no ta fòrsa hende ador’é. Mas bien, e ta invitá su kriaturanan humano pa bira su adoradó. Por ehèmpel, Beibel ta bisa: “Laga nos ban adorá i bùig te na suela; laga nos hinka rudia dilanti di SEÑOR, Esun ku a traha nos.”—Salmo 95:6.

Ta un invitashon asina antiguo Israel a haña. Mas ku 3.500 aña pasá, e nashon di Israel a para dilanti di Seru Sinaí, i Dios a sera e miónes di hendenan ei konosí ku e sistema di religion berdadero inkorporá den e Lei di Moises. Awor nan mester a skohe: Nan lo a sirbi Dios òf nò? Kon nan a kontestá? Unidamente nan a bisa: “Tur loke Yehova a papia, nos ta dispuesto pa hasi, i nos lo ta obedesidu.” (Éksodo 24:7, NW) Ta nan mes a disidí di adorá Yehova.

Den promé siglo, Hesus a kuminsá ku e predikashon di e evangelio, e bon nobo di e Reino di Dios. (Mateo 4:17; 24:14) Nunka e no a fòrsa niun hende hasi e trabou aki. Mas bien el a invitá nan bondadosamente, bisando: “Sigui mi.” (Marko 2:14; 10:21) Hopi hende a aseptá su invitashon i a kuminsá prediká huntu kuné. (Lukas 10:1-9) Despues di un tempu, algun a skohe pa bandoná Hesus. Hudas a skohe pa traishon’é. (Huan 6:66; Echonan 1:25) Mas despues, bou di guia di e apòstelnan, hopi hende mas a bira disipel, no ku kuchú na nan garganta, sino dor di hasi uso di nan boluntat liber. Nan tabata “korektamente dispuesto” i “a bira kreyente.” (Echonan 13:48, NW; 17:34, NW) Awe tambe kristiannan berdadero boluntariamente ta obedesé e Palabra di Dios i ta sigui e siñansanan di Hesus.

Pues anto, ta bisto ku Dios kier pa nos usa nos kapasidat di skohe i disidí. Tambe el a perkurá guia den Beibel ku ta yuda nos tuma desishonnan sabí. (Salmo 25:12) Ora di tuma desishonnan personal, kada kristian mester analisá kuidadosamente e prinsipionan ku Dios a duna. Ta asina so nos por rindi na Dios ‘sirbishi sagrado ku nos fakultat di rasoná.’—Romanonan 12:1, NW.