E Dia Ku un Planta Kímiko A Eksplotá

DI E KORESPONSAL DI SPIÈRTA! NA FRANSIA

DIA 21 DI SÈPTÈMBER 2001, dies dia so despues di e atake kontra World Trade Center na New York, un enorme eksploshon den un planta kímiko kousá aksidentalmente, a destrosá e barionan pafó di e stat di Toulouse, den parti sùitwèst di Fransia. Esaki tabata loke e revista notisiero franses Le Point a deskribí komo “e pió desaster industrial na Fransia desde fin di Segundo Guera Mundial.”

Un 300 tòn di mèst a eksplotá, lagando un buraku di 50 meter hanchu i 15 meter hundu. E eksploshon i e ola di kayente i preshon di aire ku el a generá, a mata 30 persona i heridá mas ku 2.200 hende. Un 2.000 kas a ser destruí i 27.000 kas den un rayo di ocho kilometer a sufri daño. A surgi pániko komo ku e hendenan a kere ku tabata trata di un atake terorista, i ku un nubia di gas venenoso a sali for di e planta.

Vários Testigu di Yehova a ser leshoná dor di e eksploshon, i hopi di nan a ser afektá den otro maneranan. Amor kristian a motivá e otro Testigunan pa bin duna nan un man mesora. (Juan 13:34, 35) Lo siguiente ta un relato di e aktividatnan di ousilio.

“No A Keda Nada di e Edifisio”

Khoudir ta un di e sobrebibientenan ku tabata traha na e planta kímiko. E eksploshon i fragmentonan ku tabata bula rònt a dal e pon’é pèrdè konosementu, frakturá su kakumbein i saka su wea di funchi for di lugá. Benjamin, kende ta traha den un edifisio banda di e planta kímiko, a ser bentá kontra muraya, tres meter leu for di kaminda e tabata pará. Glas ku a spat for di otro a kòrt’é vários kaminda i a bora su wowo drechi, dañando su bista. El a bisa: “Mi ta di bon ku mi no tabata sintá na mi lugá. Alrededor di 600 kilo di blòki a kai riba mi stul.”

Alain, dosente na un skol ku ta keda 200 meter for di e planta, tabata sakando fotokopia ora ku e eksploshon a tuma lugá. El a bisa: “No a keda nada di e edifisio; solamente pidanan di stal. Niun muraya, niun dak, nada. Pidanan di glas a dal mi. Mi kara a keda tur kòrtá. Tabata komo si fuera un hende a dal mi ku bate den mi kara.” Un wowo di Alain a bira siegu i el a keda parsialmente surdu dor di e eksploshon.

Ousilio Rápido

Rápidamente, ansianonan di e 11 kongregashonnan di Testigunan di Yehova afektá dor di e desaster a tuma kontakto ku kada miembro di e kongregashon pa wak si nan a sufri leshon òf daño. Mesora a manda boluntario serka esnan ku tabatin mas mester di yudansa. E boluntarionan a haña sa ku mas o ménos 60 kas di Testigu a sufri daño, i nan a yuda rònt di dies famia haña un otro kaminda pa biba. Tambe e boluntarionan a yuda drecha dos Salòn di Reino ku a sufri daño. Fuera di esei, nan a duna yudansa práktiko na esnan ku mester a yena claim di seguro, mustrando nan kon pa hasié.

Catherine ku Michel ta biba djis dilanti di e planta. Catherine tabata den outo na momentu di e eksploshon. El a splika: “Na promé instante nos a sinti algu manera un temblor. Un par di sekònde despues, nos a tende e eksploshon. Anto nos a mira huma bai laira. Mi a kore bai na mi bario; el a keda manera un zona di guera. Tur e kasnan tabata destrosá, i e bentananan di negoshi kibrá. Hende tabata kore riba kaya. Otronan tabata sintá abou òf drumí riba kaminda ta grita òf yora. Na kas, e eksploshon a bula tur nos bentananan i asta nos kozeinnan, i no a sobra  niun porta. Nos rumannan kristian a bin yuda nos rápidamente. Ya pa traimèrdia un tim di e kongregashon a bini ku hèmber i basora i tambe ku tapol pa tapa e bentananan.”

Alain ku Liliane tambe ta biba banda di e planta. E eksploshon a destruí nan apartamentu. Alain a bisa: “Tur kos a keda na wèrki. E muraya- i mosaikonan a sker, i tur bentana, porta i muebel a ser destruí. No a keda nada-nada. Mesora nos rumannan kristian a bin yuda nos. Nan a limpia tur e ruina i tambe a yuda limpia e otro apartamentunan den e edifisio. Nos bisiñanan a keda hopi sorprendí ora nan a mira kuantu hende a bin yuda nos.” E mainta ei promé ku e eksploshon, un studiante di Beibel a bèl Alain pidié bin studi’é. Liliane tambe a sali bai hasi un rospondi. Pues, niun di dos no tabata na kas ora e eksploshon a tuma lugá.

E yudansa ku e Testigunan a duna no tabata limitá na miembronan di e kongregashon. Despues ku nan a yuda otro, nan a yuda nan bisiñanan, sakando tur kos destruí for di e apartamentunan i tapando e bentananan kibrá. Bisiñanan a keda masha gradisidu i asombrá ku nan no a kobra pa esei.

Tambe e Testigunan a ofresé pa duna un man na outoridatnan lokal, kendenan a keda tolondrá ora nan a mira kon grandi e daño tabata. Testigunan a limpia skolnan i otro edifisionan públiko. Den un bario, e outoridatnan lokal a manda boluntarionan Testigu bai di kas pa kas pa evaluá ki nesesidat e hendenan tabatin.

Perkurando Yudansa Spiritual

Fuera di yudansa material, hopi Testigu den e área di e eksploshon tabatin mester di yudansa spiritual. P’esei, superintendentenan biahero huntu ku e ansianonan lokal a bishitá tur esnan afektá dor di e desaster. E rumannan a apresiá e sosten aki masha hopi. Catherine a bisa: “E ansianonan a sera kabes pa sostené nos. Nan a bin enkurashá nos. Bon mirá, esei ta loke nos tabatin mester, mas ku yudansa material.”

E amor kristian ku a keda demostrá ku echo dirèkt despues di e desaster aki, a kousa algun komentario interesante. Un Testigu ku tabata seriamente leshoná, a bisa: “Nos no sa kiko lo pasa mañan. Nos tin ku sirbi Yehova konstantemente komo si fuera awe ta nos último dia.” (Santiago 4:13-15) Un otro Testigu a konkluí: “Tur esaki a yuda nos realisá ku nos no mester ta muchu pegá na kosnan material. Loke ta di berdadero balor ta pa nos ta den e pueblo di Yehova.”

[Plachi na página 22]

Benjamin i Khoudir

[Plachi na página 22]

Alain

[Plachi na página 23]

Toulouse, e dia despues di e eksploshon

[Rekonosementu]

© LE SEGRETAIN PASCAL/CORBIS SYGMA

[Plachi na página 23]

Alain i Liliane