Hóbennan i Droga

“Tabata na nodi pa nan muri?”

Esei ta e pregunta ku nan a hasi riba portada di e revista brazilero Veja. Huntu ku e palabranan ei tabatin potrèt di hóbennan, kendenan a parse normal i agradabel, pero ku a muri; víktimanan di uso di droga.

APESAR di e riesgonan bon konosí, hende ta sigui usa droga, i e uso di droga ta sigui kaba ku bida. [Den e seri aki “droga” ta inkluí tur supstansia ilegal i ku por ta adiktivo.] Uso di droga na Merka ta kosta segun kálkulo, 100 mil mion dòler pa aña na kuido médiko, ménos produktividat na trabou, pèrdida di entrada i kriminalidat. Pero podisé esnan ku ta paga e preis mas haltu ta esnan hóben, esta, mucha. Segun un estudio hasí na Brazil ku nan a publiká den e korant Jornal da Tarde, 24,7 porshento di hóbennan entre 10 pa 17 aña ya a yega di usa algun tipo di droga.

Ounke ta bèrdat ku uso di droga bou di teenagernan na Merka a baha un tiki den último añanan, tòg un kantidat alarmante di hóbennan einan ta adikto. Por ehèmpel, tuma hóbennan ku ta den nan último dos añanan di skol sekundario. Segun un estudio, 37 porshento a usa por lo ménos mariwana durante e aña anterior. Un di kada 5 a us’é e luna anterior. Kasi 1 di kada 10 a purba e droga XTC (ecstasy) den e aña ku a pasa. Mas ku 6 porshento a purba LSD.

Informenan di rònt mundu ta preokupante. E Ofisina Britániko di Estadístikanan Nashonal ta informá ku “12 porshento di alumno di 11-15 aña a usa droga durante e último aña . . . Cannabis [mariwana] tabata e droga mas usá ku tur.” Loke partikularmente ta alarmante ta e echo ku “nan a ofresé mas ku un tersera parti (35 porshento) di e muchanan un òf mas tipo di droga.”

Un rapòrt patrosiná pa Union Europeo tambe a revelá ku “a para bira normal pa hóbennan bebe te bira burachi.” Tambe e rapòrt ta bisa ku tal “bebementu di demasiado alkohòl ta ser ligá ku vários mal efekto riba término kòrtiku, manera aksidente, violensia i venenamentu, i tambe problemanan sosial i di desaroyo.” For di Hapon ta bini un informe ku “e supstansianan adiktivo mas usá pa teenagernan na Hapon ta disolventenan orgániko [nan ta inhalá holó òf dam di leim òf gasolin], ku por hiba na uso di droga mes.”

P’esei no ta straño ku e sekretario-general di Nashonnan Uní, Kofi Annan, a bisa: “Droga ta destrosando nos komunidatnan, generando kriminalidat, plamando malesanan manera AIDS, i matando nos hóbennan i nos futuro.” Hopi bes ta hendenan metí den droga ta responsabel pa krímennan manera trafikashon di droga i asesinato relashoná ku droga. Ademas, debí na uso di droga hopi hende ta bira víktima di violensia, ta ser leshoná òf ta hasi sèks parotin poniendo nan salú na peliger. I si bo ta pensa ku bo famia sí no ta den e kosnan ei, pensa un biaha mas! Un rapòrt di gobièrnu merikano a bisa: “Droga no ta solamente un problema di pobernan, minorianan ni di habitantenan di sentro di siudat. . . . Usadónan di droga ta bini di tur gremio i di tur parti di e pais. E problema di droga ta afektá tur hende.”

 Sin embargo, mayornan hopi bes no ta realisá ku esei por ta un problema den nan famia, sino te ora ta demasiado lat. Tuma e kaso di un hobensita di Brazil. Su ruman muhé Regina * ta splika: “E tabata bebe bebida alkohóliko. Nos famia tabata haña esei leuk. Pero e bebementu a pon’é bai eksperimentá ku droga huntu ku su amigunan. Komo ku mi mayornan semper a hasi manera kos ku e problemanan ku e tabata kousa no tabata importante, su kondishon a sali for di man. Vários biaha el a disparsé. I kada bes ku nan a haña un mucha muhé morto, polis tabata bèl mi tata pa wak si t’e! Esaki a kousa mi famia hopi angustia.”

Organisashon Mundial di Salú ta duna sinku motibu básiko pakiko hóbennan lo por ser atraí na droga:

(1) Nan kier sinti nan hende grandi i tuma nan propio desishonnan

(2) Nan kier ta meskos ku nan pareunan

(3) Nan kier rilèks i sinti nan bon

(4) Nan kier hasi kos peligroso i rebeldiá

(5) Nan kier satisfasé nan kuriosidat

Loke tambe ta oumentá e chèns ku un hóben lo bai den e kaminda di outodestrukshon aki ta si droga ta fásil pa haña i si nan pareunan ta pone preshon riba nan. Luiz Antonio, un hóben di Brazil, a splika: “Nunka mi mayornan no a bisa nada tokante droga. Na skol e maestronan tabata menshoná e problema pero sin bai den detaye.” Stimulá dor di su kompañeronan di skol, Luiz a kuminsá usa droga ku 14 aña. Despues, ora el a purba stòp, su “amigunan” ku tabata dun’é e droga literalmente a pone kuchú na su garganta pa e sigui usa droga!

Abo ta realisá i aseptá e echo ku bo propio yunan por ta kore peliger? Kiko abo ta hasi pa protehá nan kontra uso di droga? E siguiente artíkulo lo trata algun manera ku mayornan por protehá nan yunan.

[Nota]

[Komentario na página 4]

“Droga ta destrosando nos komunidatnan, generando kriminalidat, plamando malesanan manera AIDS, i matando nos hóbennan i nos futuro.”—KOFI ANNAN, SEKRETARIO GENERAL DI NASHONNAN UNÍ

[Rekonosementu pa Potrèt na página 3]

© Veja, Editora Abril, 27 di mei 1998