E Punto di Bista di Bíbliko

Kiko Ta Hasi Hende Materialista?

HENDE ta nase ku e kapasidat pa kultivá spiritualidat i ku e nesesidat di adorá Dios. Sin embargo, hende a ser kreá for di materia i nan tin nesesidat material i e kapasidat pa disfrutá di kos material. Algun kristian ta hopi riku. Esei riba su mes ta nifiká ku nan ta materialista i ku nan ta falta spiritualidat? Di otro banda, hende pober tin ménos chèns di ta materialista i mas chèns di tin inklinashon spiritual?

Sin duda bo ta di akuerdo ku ser materialista ta enserá muchu mas ku djis poseé hopi rikesa òf propiedat. Konsiderá e siguiente ehèmpelnan di Beibel ku ta mustra kiko realmente ta nifiká ser materialista i kon pa evitá e peligernan ku e ta kousa pa bo spiritualidat.

Nan Tabatin Rikesa i Gloria

Entre e fiel sirbidónan di Dios den tempu di Beibel tabatin algun ku a poseé rikesa i gloria. Por ehèmpel, Abraham “tabata masha riku na bestia di kria, na plata i na oro.” (Génesis 13:2) Jòb tabata konosí komo “esun di mas grandi di tur e hòmbernan di oriente” pa motibu di e gran kantidat di bestia ku e tabatin i su grupo grandi di kriá. (Jòb 1:3) Reinan di Israel, manera David i Salomon, tabatin rikesanan enorme.—1 Krónikanan 29:1-5; 2 Krónikanan 1:11, 12; Eklesiastés 2:4-9.

Den kongregashon di promé siglo tabatin algun kristian riku. (1 Timoteo 6:17) Beibel ta yama Lidia di e stat Tiatira “un bendedó di tela púrpura, un adoradó di Dios.” (Echonan 16:14) Tinzja púrpura i tela koló púrpura tabata karu i, por lo general, ta hende ku moda i ku tabatin bon nivel di bida so por a afòrt nan. Pues, podisé Lidia tabata un persona riku.

Na kontraste, algun adoradó fiel di Yehova den tempu di Beibel tabata masha pober. Desaster natural, aksidente i morto a pone algun famia kai di un dia pa otro den pobresa. (Eklesiastés 9:11, 12) Lo mester tabata masha difísil pa esnan den nesesidat tuma nota kon otro hende tabata disfrutá di nan rikesa òf poseshon material. Tòg, lo no tabata korekto pa nan pensa ku hende riku ta materialista òf pa konkluí ku esnan ku no tabatin rikesa, ta sirbi Dios mas kompletu. Pakiko? Ban wak kiko ta e kousa básiko di materialismo.

Amor pa Plaka

Dikshonarionan ta definí materialismo komo “preokupashon ku kos material òf énfasis riba kos material en bes di kosnan spiritual òf intelektual.” Ku otro palabra, ta nos deseonan, nos prioridatnan i loke nos ta buska den bida ta determiná si nos ta materialista. Esaki  ta masha bisto den e siguiente dos ehèmpelnan di Beibel.

Yehova a duna konseho firme na Baruk, kende a sirbi komo sekretario di profeta Jeremias. Probablemente Baruk tabata pober debí n’e kondishonnan den Yerusalèm i su asosiashon estrecho ku Jeremias, kende tabata un profeta impopular. Tòg, Yehova a bis’é: “Ma abo, bo ta buska kosnan grandi pa bo mes? No buska eseinan.” Kisas Baruk a kuminsá bira materialista i a laga e rikesa òf siguridat material di otro hende preokup’é. Yehova a rekordá Baruk ku lo E libr’é di e binidero destrukshon riba Yerusalèm, pero ku lo E no konserbá su poseshonnan.—Jeremias 45:4, 5.

Hesus a duna un ilustrashon di un hòmber ku tambe tabata preokupá ku kos material. E hòmber aki a konsentrá muchu riba su rikesanan en bes di usa loke e tabatin pa oumentá su sirbishi na Dios. E hòmber riku a bisa: “Lo mi basha mi mangasinanan abou i traha otro mangasinanan mas grandi ainda, . . . i lo mi bisa mi alma: ‘Alma, bo tin hopi biennan montoná pa hopi aña; tuma sosiegu, kome, bebe i fiesta.’” Anto Hesus a bisa: “Ma Dios a bis’é: ‘Abo, bobo! Awe nochi mes bo alma lo wòrdu eksigí for di bo; i awor ken lo bira doño di loke bo a prepará?’ Asina ta e hende ku ta montoná tesoro pa su mes, i no ta riku pa ku Dios.”—Lukas 12:16-21.

Ki lès nos por saka for di e dos relatonan aki? Nan ta yuda nos mira ku un persona ta materialista, no pa motibu ku e tin hopi, sino pa motibu ku e ta pone prioridat riba kosnan material. Apòstel Pablo a bisa: “Esnan ku kier bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.” (1 Timoteo 6:9, 10) Ta e determinashon pa ta riku i amor pa kos material ta kousa problema.

Kristiannan Tin Ku Analisá Nan Mes

Sea kual sea nan situashon ekonómiko, kristiannan mester tene kuidou ku e trampa di materialismo. E poder di rikesa ta engañoso i por hoga òf kaba ku nos spiritualidat. (Mateo 13:22) Kisas, sin ku nos sa, nos por kuminsá konsentrá riba kos material en bes di riba kos spiritual, i e konsekuensianan por ta lamentabel.—Proverbionan 28:20; Eklesiastés 5:10.

P’esei, kristiannan mester analisá nan prioridatnan i enfoke den bida. Sea nan tin tiki òf hopi den sentido material, hende ku inklinashon spiritual ta hasi esfuerso pa sigui e spièrtamentu di Pablo pa pone nan speransa no “riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.”—1 Timoteo 6:17-19.