Pasa Bon Wikènt!

KASI tur hende ta anhelá p’e yega, i ora e yega, hopi bes e ta e parti mas dushi dje siman. Algun hende ta us’é pa biaha, otronan ta us’é pa dibertí, algun ta us’é pa adorá Dios i otronan ta us’é pa keda kas i drumi.

Nos ta papiando aki di e lapso di tempu entre e fin di un siman di trabou (òf di skol) i e komienso di e siguiente siman: wikènt! Den e mundu oksidental, wikènt ta kuminsá djabièrnè i ta dura te ku djadumingu. Pero di unda e idea di wikènt a bini? I si bo ta biba kaminda un siman di sinku dia di trabou ta komun, kon lo bo por usa bo wikènt den un manera produktivo?

For di un Dia di Sosiegu pa Wikènt

E leinan di sabat ku Dios a duna e nashon di Israel rònt di 3.500 aña pasá a stipulá: “Seis dia trabou mag wòrdu hasí, ma e di shete dia tin un sabat di sosiegu kompleto, santu na SEÑOR; ken ku hasi kualke trabou riba dia di sabat mester wòrdu matá sigur.” (Eksodo 31:15) Sabat tabata tambe un oportunidat pa mayornan israelita atendé e nesesidatnan spiritual di nan famia.

E sabat hudiu a kore for di bahada di solo djabièrnè te bahada di solo djasabra. Sin embargo, segun The World Book Encyclopedia, e supuesto kristiannan “a hasi djadumingu un dia pa adorashon spesial, pasobra, pa nan, Hesus a resusitá riba e dia ei. Den siglo 3 A.D., tantu iglesia komo estado a rekonosé djadumingu ofisialmente komo e dia di sosiegu na Europa.”

Ta interesante pa nota ku ta te poko tempu pasá numa a hasi e periodo di sosiegu mas largu ku un dia. Kuminsando na Bretaña den e dékada di 1870, e siman di trabou tabata kaba djasabra 12 or di mèrdia. E traimèrdia liber, kombiná ku djadumingu a forma e wikènt. Segun e revista Atlantic Monthly, djasabra traimèrdia a kuminsá ku un almuerso den famia, “siguí pa e baño di kada siman den un lugá públiko pa baña den besindario.”

Na Merka, nan a rèk e wikènt asta mas ainda, i hasié dos dia kompleto. Di akuerdo ku un fuente, un fábrika na New England tabata e promé ku na 1908 a adoptá un siman di trabou di sinku dia. E areglo a kumbiní tantu e trahadó hudiu komo esun “kristian” pasobra kada grupo tabatin su mes dia di sosiegu—djasabra pa hudiu i djadumingu pa “kristian.” E siman di trabou di sinku dia a haña akohida hopi lihé. E fabrikante di outo Henry Ford a promové e idea, pasobra den su astusia el a konkluí ku si famianan kuminsá sali mas den wikènt, e demanda pa outo ta oumentá.

Bo Tin Algu Planiá pa Wikènt?

Awendia e wikènt di dos dia a bira algu komun i koriente p’e mundu oksidental. Si bo ta biba den e parti ei di mundu, na fin di un siman di trabou bo koleganan di trabou tin chèns di puntra bo, “Ki plan bo tin p’e wikènt aki?” E pregunta ei ta habri kaminda pa kosnan eksitante.

Despues ku henter un siman bo doño di trabou a kontrolá bo tempu, wikènt ta duna bo chèns di bolbe haña kontròl riba bo bida. E por  permití bo disfrutá di un pousa den bo rutina di tur siman. E por ta un oportunidat pa bo haña un poko sosiegu nesesario òf pa pasa un ratu huntu ku bo sernan kerí. Òf e por ta simplemente un chèns pa partisipá den un dje distraishonnan mas popular di wikènt—hasi kompra pa plaser. “Ta dushi pa kana hasi kompra,” segun Brigitte, kende ta biba na Alemania.

Estudionan ta revelá ku hopi hende ta preferá di usa nan tempu liber simplemente pa relahá. Pa hendenan ku ta ègt gusta keda kas wikènt, tin hopi posibel dibertishon: kuida mata i kurá, kolekshoná stampia, toka òf skucha muzik, wak vidio, kushiná, skirbi karta, lesa, kose, brei, hasi deporte i pinta, djis pa menshoná algun. Algun ta preferá aktividatnan ku ta permití nan pasa tempu ku nan yunan òf kasá, manera traha pùzel òf hasi spèl. *

Beibel ta kondená tal uso aparentemente sin sentido di bo tempu? No nesesariamente. Salomon a skirbi: “Un man yen di sosiegu ta mihó ku dos moketa yen di trabou i korementu tras di bientu.” (Eklesiastés 4:6) Wega, sosiegu i relahamentu den un forma moderá definitivamente tin nan lugá den bida di un kristian.

Algun Ta Hasi di Mas

Di otro banda, demasiado di un kos, asta un bon kos, por ta kontraproduktivo i dañino. Por ehèmpel, entrenamentu físiko tin su benefisionan. (1 Timoteo 4:8) Pero algun atleta di wikènt ta praktiká deporte ku masha fervor. Disididu pa sali triunfadó dor di desaroyá e téknika korekto, algun ta dediká demasiado tempu i plaka na lès serka instruktor privá i ekiponan kostoso di deporte.

Tambe tin riesgonan di salú pa hende ku ta fòrsa nan kurpa ku ta for di kondishon pa bai mas aleu ku su kapasidat. Un revista notisiero a papia di ‘hende ku ta dediká nan mes enérgikamente na deporte den wikènt,’ kendenan, determiná pa rekuperá e kurpa ku nan tabatin na yòn, ta haña nan ku ‘spierverrekking,’ kòrtá i leshon. Otronan ta riska nan bida òf eksponé nan kurpa na leshon serio den deportenan peligroso. * Pues, e konseho di Beibel pa ta “moderá” ta hopi apropiá. (Tito 2:2) Ehersisio mester refreská, no agotá bo òf pone bo bida na peliger.

Pues, algun ta preferá di disfrutá di ehersisio físiko ménos severo. Por ehèmpel na Alemania, hopi hende ta gusta kana. De echo, un pasatempu masha popular na Europa ta pa kana, no pa kompetí kontra otro hende, sino kontra oloshi. E idea ta pa kubri un ruta ku ta pasa den un zona di kunuku den un sierto tempu limitá. Esei sigur ta un manera plasentero pa hasi ehersisio i na mesun tempu disfrutá di panorama bunita. I e ta algu ku henter e famia por disfrutá di dje.

Wikènt Demasiado Drùk

Tin biaha hende ta pone asina tantu kos di hasi den un wikènt ku al final nan no a disfrutá di kasi niun di nan. Ora e siman nobo kuminsá, nan ta sinti nan, no refreská, sino hopi kansá. E revista aleman Focus a informá di un estudio den kua 27 porshento di esnan enkuestá a haña ku nan tabatin demasiado kos di hasi den nan tempu liber i ku esei a kousa strès.

“Sosiegu ta protehá efisiensia,” segun revista Time. Hesukristu tambe a komprondé e nesesidat  ku nos tin pa deskansá i relahá. Marko 6:31 ta informá ku Hesus a bisa su disipelnan: “‘Ban ku mi, boso so, na un lugá solitario i sosegá un ratu.’ Pasobra tabatin hopi hende ta bai bin, i nan no tabatin ni tempu pa kome.” Pues, ounke ta bon pa hasi ehersisio, hasi kompra i kosnan por estilo den wikènt, saka tempu tambe pa lesa pa plaser, sosegá òf drumi. Kosnan asina por refreská bo bastante. Sin embargo, tin algu mas ku por yuda bo gosa di kualkier wikènt.

Nesesidat Spiritual

Hesus a bisa den su Sermon Riba Seru: “Felis ta esnan ku ta konsiente di nan nesesidat spiritual.” (Mateo 5:3, NW) Un di e propósitonan di e dia di deskanso di sabat den su forma original tabata pa permití hende atendé nan nesesidat spiritual. Nos por usa wikènt pa e mesun propósito awe? Tuma por ehèmpel Testigunan di Yehova. Mayoria di nan kongregashonnan tin nan reunionnan kristian prinsipal riba sea djasabra òf djadumingu. Nan reunionnan mas grandi, manera asamblea òf kongresonan tambe nan ta tene den wikènt. Hopi Testigu di Yehova ta dediká tempu den wikènt na bai di kas pa kas i papia ofer di Beibel ku nan próhimo.

Klaru ku meskos ku tur otro hende, Testigunan di Yehova tin nan trabou, kas i famia pa kuida. Pues ora ta posibel, nan tambe ta plania aktividat di tempu liber pa nan mes i nan famia. Pero nan ta duna prioridat na kosnan spiritual. Esei ta kansa nan? Konsiderá e eksperensianan di e siguiente personanan.

Promé ku Jürgen i Doris, un pareha aleman, a bira Testigu di Yehova, nan tabata pasa nan wikènt trahando den un klup di deporte. Melle i Helena tabata pasa nan tempu bishitando galerianan di arte. Pa un hòmber ku yama Helmut, wikènt tabata tempu pa sali bai disfrutá di naturalesa. I un muhé ku yama Silvia tabata pasa su wikèntnan den diskotèk. Sin embargo, for di tempu ku e personanan aki a bira Testigu di Yehova, nan kustumbernan di tempu liber a kambia drástikamente.

Jürgen i Doris ta splika: “Dor di nos aktividatnan di tempu liber, nos no tabatin un bida laf, pero bo no por a bisa tampoko ku e kosnan aki a enrikesé nos bida. Awendia, yuda otro hende komprondé Beibel ta duna tantu nos bida komo bida di otro hende nifikashon i propósito.” Kiko di Melle ku Helena? “Beibel ta duna guia pa e mihó kaminda di bida, i dor di papia ku otro hende tokante dje nos ta haña hopi goso.” Pakiko Helmut ta haña hopi mas satisfakshon den bida awor? “Mi sa ku loke mi ta hasiendo den e ministerio públiko ta importante pa Yehova,” e ta bisa. I Silvia ta komentá: “Prediká ta nifiká topa hende i hiba kòmbersashon interesante, i mi ta gusta tur dos.”

Pakiko no papia ku Testigunan di Yehova e siguiente biaha ku nan yama na bo kas? Un kòmbersashon kòrtiku ku un di nan lo por ta e promé paso pa bo logra mas propósito den bida, no djis wikènt sino tur dia di siman!

Sea kual sea e aktividatnan di tempu liber ku bo ta preferá, hasi bo wikènt edifikante i agradabel. Si bo ta biba den un pais ku ta papia aleman, nos ta deseá bo “schönes Wochenende.” Si ta spañó bo ta papia, e ora ei, “¡Buen fin de semana!” Si ta ukranio, nos lo por bisa, “Бажаю вам приємно провести вихідні.” Unda ku bo ta biba, i sin importá kiko ku bo ta hasiendo, pasa bon wikènt!

[Nota]

[Komentario na página 21]

Un wikènt agradabel ta un meskla saludabel di sosiegu, rekreo i aktividat spiritual