Pronto—Un Mundu sin Droga

Bo por imaginá un mundu sin uso di droga?

SEKRETARIO-GENERAL di Nashonnan Uní, Kofi Annan, a hasi un yamada riba tur nashon pa nan traha pa logra un mundu asina. El a deklará: “Nos tin ku dal pasonan nobo i balente pa kombatí e maldat aki; e plaga aki ku a gara demasiado yu di nos.”

Ounke lidernan kisas ta di akuerdo pa redusí e produkshon i distribushon mundial di droga ilegal, esaki ta un tarea hopi difísil. Hennadiy Udovenko di Ukrania, sirbiendo komo presidente di un seshon spesial di e Asamblea General di Nashonnan Uní, a deklará ku “e negoshi di narkotráfiko ta un di e negoshinan klandestino di mas rendabel, ku un balor kalkulá di mas ku 400 mil mion dòler pa aña, . . . i por korumpí òf destabilisá merkadonan finansiero mundial.” El a agregá ku e problema di droga “a bira un fenómeno mundial i niun nashon no por sinti ku e menasa aki no ta konta p’e.”

Ta difísil pa imaginá un mundu sin droga peligroso. Gobièrnunan humano sigur a demostrá di no por eliminá nan. Sin embargo, niun hende no por stòp Dios Todopoderoso di kumpli ku su propósito di trese un paradeis riba tera, den kua tur nesesidat emoshonal, físiko i spiritual lo ser satisfasé. (Salmo 145:16; Lukas 23:43; 2 Pedro 3:13) Segun profeta Isaias, e palabra di Dios ‘lo no bolbe bashí serka dje, sin kumpli ku loke e ta deseá, i sin alkansá e propósito ku kual el a mand’é.’—Isaias 55:11.

Speransa den e promesanan ei por produsí benefisionan dramátiko for di awor. Por ehèmpel, Edmundo tabata usa droga. Pero dor di aseptá e promesa bíbliko di un hustu mundu nobo, el a sintié konmoví pa reevaluá su bida. Awor Edmundo ta bisa: “Esta bobo mi tabata di malgastá mi tempu.” Teniendo awor e deseo di keda ku Dios su aprobashon, e ta motivá pa keda liber di droga. Sí, konosementu di Dios i di su promesanan por motivá nos awor pa “bisti e hende nobo [“e personalidat nobo,” NW], ku a wòrdu kreá segun Dios den hustisia i santidat berdadero.”—Efesionan 4:24.

Masha hopi hende mes ku ántes tabata den droga, tambe ta disfrutá awor di un relashon íntimo ku nan Kreadó. Pa nan, e palabranan di e salmista tin un nifikashon spesial: “No kòrda e pikánan di mi hubentut, ni mi transgreshonnan; konforme bo miserikòrdia, kòrda riba mi, pa motibu di bo bondat, o SEÑOR. SEÑOR ta bon i rekto; p’esei e ta instruí pekadónan den e kaminda.” (Salmo 25:7, 8) Ta ki un gran konsuelo pa mayornan di yunan ku a dualu, sa ku nan yunan por kambia! Ku esfuerso diligente, mayornan por yuda nan yunan hóben resistí e plaga di droga i haña un ‘gara di e bida berdadero,’ ku lo ser realisá den Dios su mundu nobo.—1 Timoteo 6:19.

[Plachinan na página 10]

E speransa di biba den Dios su mundu nobo a motivá hopi usadó di droga pa kambia nan bida