Tene Kuidou ku e Tenglanan Mortal!

DI E KORESPONSAL DI SPIÈRTA! NA OUSTRALIA

TABATA un bunita mainta di zomer den nort di Queensland, Oustralia. Un dia perfekto pa landa den e awanan fresku i skapa di e kalor. Pero e mainta ei e radio emisora lokal na Townsville a anunsiá vários bes ku hende a mira e kwal mortal box jellyfish na e playanan lokal i a atvertí ku tur hende ku ta bai laman mester tene kuidou.

Un pareha yòn no a tende e spièrtamentu na radio. Nan tabata sintá trankilamente pegá ku kantu den mei meter di awa blou di Oséano Pasífiko ora ku diripiente e señora—34 siman na estado—a dal un gritu. El a bula lanta i purba ranka vários tengla di kwal for di riba su bèl i stoma. Despues ku su kasá a yud’é yega kantu, e kasá a kore bai desesperadamente en buska di yudansa, maske e tambe a sufri di e pikánan di kwal. Pa ora el a bin bèk djis un par di minüt despues, su señora aparentemente a stòp di hala rosea i su kara, brasa- i pianan tabata pretu. Afortunadamente, e señora hóben a sobrebibí dor ku nan a hasi reanimashon mesora i ambulans a yega umbes. Su beibi tambe a skapa, i el a nase un par di siman despues.

E box jellyfish ta pika sentenáres di landadó tur aña. Algun di nan a muri den un minüt despues ku e tenglanan a mishi ku nan. Nada straño anto ku, manera landadónan den zomer tende ku nan a mira un box jellyfish, tur hende ta sali for di awa mesora! Su tròshi di tenglanan largu—ku serka algun di nan por ta 40 pa 60 tengla—por ta peligroso.

Por Tuma Prekoushon?

Tin hende ta evitá tur landamentu den laman ora tin box jellyfish den bisindario. Pero pa esnan ku ta riska drenta laman durante lunanan mas kayente, un wet suit (duikerpak) di henter kurpa ta e mihó manera pa evitá un enkuentro doloroso ku e kwal aki.

Hopi bich den parti nort di Oustralia ta ser patruyá regularmente i ki ora ku nan detektá box jellyfish, nan ta kohe mayoria di nan ku nèt. Ademas, nan ta pasa atvertensianan regular na radio emisoranan lokal. Apesar di e prekoushonnan aki, semper tin peliger unabes ku e box jellyfish kuminsá move. Parse ku nan ta brui den riu, pero ora nan madurá, aparentemente nan ta preferá kantu di laman.

Afortunadamente, e piká di un box jellyfish por lo general no ta fatal. Ta dependé hopi di kuantu kontakto e persona a haña ku e tenglanan, e kantidat di venenu ku e kwal a saka, e madures di e box jellyfish i e edat i salú di e víktima ku a ser piká.  No opstante, si no duna tratamentu mesora, e persona por muri di atake di kurason den ménos ku un minüt ku e tenglanan a mishi kuné. E motibu pa esaki ta ku e tenglanan tin rei di sèlnan ku ta pika i ku e kwal ta lòs manera flecha chikí asina nan mishi ku otro kriatura. Klaru ku esaki ta nan manera di haña kuminda, foral kabaron.

Kuadro jellyfish por tin te ku ocho wowo. I maske su wowonan sa ta birá paden, nan por lokalisá un opstákulo, manera hende òf un bestia yagdó. Esaki no ta nifiká ku e kwalnan aki ta ataká hende intenshonalmente. No, pasobra box jellyfish ta purba pasa rònt di e opstákulo si e tin sufisiente tempu. E por hasi esei dor di usa su kurpa forma di kaha (box). Su kurpa ta funshoná manera un blasbalk, kier men e ta hala awa aden i sak’é pa e por move.

E problema ku hende ta ku hopi bes nan ta kore drenta awa òf tira kabes, i esei no ta duna e kwal tempu pa evitá di dal den nan. I ora e tenglanan mishi ku kueru humano, nan ta reakshoná mesora: nan ta pega na e kueru i saka venenu. E víktima ta sinti doló masha intenso. E venenu ta ser inyektá dor di hopi sèl ku yama netelkapsel òf nematosist, i e kurpa ta apsorbé lihé. Si e víktima kore òf sapatiá, e venenu ta ser apsorbé mas lihé ainda. Un otro problema grandi ta ku maske e tenglanan kibra for di e kwal, nan ta keda pegá na e kueru di e víktima i nan ta saka mas venenu si e víktima purba ranka nan.

Tin un Antídoto?

Sí, tin un antídoto. I nan a skapa hopi hende su bida dor di apliká e antídoto korekto rápidamente. Pa años hende a kere eróneamente ku e mihó tratamentu di emergensia pa redusí e kantidat di venenu ku tenglanan tabata saka ta dor di basha alkohòl puru riba e tenglanan ku ta pegá riba kurpa di e víktima. Sin embargo, investigashon moderno a deskubrí ku e uso di alkohòl puru eigenlijk ta stimulá e tenglanan pa saka mas venenu.

Awor ekspertonan ta kere ku binager ta e mihó solushon. E ta un líkido barata i fásil pa haña. Binager ta neutralisá e nematosistnan kompletamente i ta stroba nan di saka nan venenu. P’esei awendia mayoria departamentu di gobièrnu den e áreanan di peliger ta pone bòter di binager na lugánan riparabel, huntu ku bòrchinan grandi di atvertensia kontra kwal.

P’esei ounke por ta refreskante, i asta stimulante, pa landa den e awanan tropikal di Oustralia, durante e temporada di box jellyfish, ta bon pa tur landadó tene kuidou!

[Kuadro/Plachi na página 28]

PREKOUSHONNAN SIMPEL KOMO PROTEKSHON KONTRA KWAL

• Landa solamente na playanan ku ta ser patruyá

• Bisti un wet suit di henter kurpa den temporada di box jellyfish

• Sòru di tin un kaha di promé ousilio, ku ta inkluí binager, na man

• Si e kwalnan piká bo, no purba ranka e tenglanan

• Si e víktima su kurason para òf e stòp di hala rosea, kuminsá reanim’é mesora

[Plachi na página 27]

Un close-up di e tenglanan di box jellyfish

[Rekonosementu]

Kortesia di Surf Life Saving Queensland