Un Bishita na un Plantashon di Bakoba

DI E KORESPONSAL DI SPIÈRTA! NA SURÁFRIKA

SEMPER mi a gusta kome bakoba. Mi ta suponé ku mayoria hende tambe gust’é. Bakoba no ta solamente delisioso sino tambe riku na vitamina, mineral i fibra. Lo bo kier sa mas di e fruta nutritivo aki? Resientemente un kunukero ku su kasá a mustra mi e manera asombroso ku mata di bakoba ta reprodusí.

Tony ku Marie (potrèt ariba) tin nan kunuku den e Provinsia Limpopo di Suráfrika, den un área ku yama Levubu. Nan ta planta un variedat di fruta i berdura riba nan tereno di 55 hèktar. Pero nan kultivo prinsipal ta bakoba. Tony tin gana di konta nos mas di e fruta popular aki.

Kresementu i Kondishon di Klima

Tony ta splika: “E mihó tera ta esun ku tin basta klei aden i ku no tin ni muchu santu ni muchu piedra. Tambe e tera mester ta profundo, i awa mester por pasa fásilmente den dje. Bakoba no ta bai bon den klima friu. De echo, e ta gusta temperatura haltu. Durante aña, e temperaturanan promedio di Levubu ta varia di 12 pa 35 grado Celsius.” Ora mi puntra Tony tokante yobida, e ta respondé: “Aki bakoba ta eksigí pa sea awa yobe regularmente òf pa bo muh’é tur siman.”

Kisas un mata di bakoba ta parse un palu. Pero e tronkon no ta konsistí di palu, sino di diferente kapa di blachi pegá riba otro. Bon mirá, mata di bakoba ta un yerba ku ta krese bira grandi i no un palu. E tronkon  mes ta bou di tera i ta ser yamá rhizome. E raisnan, e blachinan i un flor püs grandi ku ta presentá despues, tur ta sali for di e rhizome. For di e mesun rhizome aki ta sali vipé (yu) ku ta krese bira mata nobo.

Mata di bakoba ta desaroyá den tres fase básiko. Kunukeronan na Suráfrika ta yama esakinan “wela, yu muhé i nieta.” (Mira potrèt.) E “wela” ta saka fruta den e promé aña, e “yu muhé” e siguiente aña i e “nieta” e di tres aña. E “nietanan” ta sali na gran kantidat banda di nan “mama.” Ora e “babynan” aki yega na haltura di rudia, ta kòrta nan tur afó, ku eksepshon di esun ku tin mas chèns di pari despues.

E flor grandi püs, ku despues di tempu ta bira un kachu di bakoba, ta krese for di e rhizome skondí bou di tera, pasa dor di e “stam” bai haltu. Finalmente e ta aparesé for di meimei di e dos blachinan mas haltu i ta kologá abou. Segun ku e pétalonan di flor ta kita kai, bo ta kuminsá mira e 10 pa 15 mannan ku ta forma e kachu di bakoba pero ku no a desaroyá ainda.  Pa esun ku no sa, por parse ku e bakobanan ta krese kabes abou! Un man por ta konsistí di 20 òf mas bakoba. Nan ta yama esakinan dede.

Tempu di Kosecha

Entre e momentu ku e flor püs sali te na e kosecha di bakoba por pasa tres pa seis luna, dependiendo di e tempu di aña. Ta kita e bakobanan ora nan ta bèrdè ainda, pero no promé ku nan yena i haña un forma rondó. E peso promedio di un kachu ku bo por haña bende p’e ta rònt di 35 kilo. Ora kita e kachu, ta hink’é den un saku di plèstik pa evitá ku e bakobanan ta bira hel segun ku ta transportá nan den un wagòn p’e lugá di empake. Den e lugá aki ta kòrta e mannan den grupo chikitu di entre tres pa seis bakoba i despues ta pasa nan den un meskla ku ta protehá nan kontra un beskein ku yama collar rot.

Na Suráfrika ta paketá e fruta den kaha di karton ku buraku i tratá ku was i despues ta pone nan den un kamber spesial pa nan hecha. Aki, un gas ku yama ethylene, ta stimulá e proseso di hechamentu. * Ta wanta e kartonnan aki na un temperatura fiho pa mas o ménos dos dia, i despues nan ta kla pa bai serka e konsumidó.

Tony ta bisa ku un tono humorístiko: “Podisé ta mi idea, pero mi ta kere ku probablemente pa motibu di nos tera, bakoba di Levubu tin un sabor eksepshonal. Lamentablemente, dor ku nos ta asina leu for di otro paisnan, ta aki so bo por disfrutá di e bakobanan aki.”

Bon pa Salú

Bakoba ta riku na potasio. “Vários estudio ta indiká ku e ingrediente nutritivo aki por yuda fortifiká bo wesunan i baha e rísiko di preshon haltu i atake selebral,” segun e revista Health den un artíkulo tokante bakoba. E revista ta agregá: “Bakoba ta kontené folate, un vitamina B ku ta yuda prevení defekto den nasementu; masha krusial pa hende muhé na estado òf ku tin edat pa haña yu.” Bakoba ta kontené otro mineralnan vital, manera magnesia, ku ta yuda wesunan apsorbé kalsio i dor di esei keda fuerte.

E proteina den un bakoba ta konsistí di 18 amino ásido, inkluso tur esnan esensial ku bo kurpa mes sea no por traha, òf no ta traha sufisiente. Un 22 porshento di e fruta ta konsistí di karbohidrato, lokual ta duna energia masha lihé pasobra ta fásil pa digerí bakoba. Kontentu di dje, Marie ta agregá: “Bakoba ta un bon fuente di vitamina A, B i C. Tambe, aparentemente e ta kita bo apetit pasobra bo no ta sinti masha gana di kome hopi di dje den un tiru.” Pues, pakiko no saboriá un bakoba? E ta bon pa bo i masha delisioso!

[Nota]

[Diagram/Plachi na página 16]

(Pa e teksto den su formato kompleto, wak e publikashon)

Blachi

Flor/bakoba

Parti abou di blachi

Nivel di tera

Rhizome

Rais

[Rekonosementu]

Dibuho: Basá riba e pintura di The Complete Encyclopedia of Illustration/J. G. Heck

[Diagram/Plachi na página 17]

(Pa e teksto den su formato kompleto, wak e publikashon)

Wela

Yu muhé

Nieta

[Plachinan na página 17]

Ku tempu e flor püs grandi ta bira un kachu di bakoba

[Rekonosementu]

Potrèt dor di Kazuo Yamasaki

[Plachinan na página 18]

Tempu di kosecha (banda robes); futuro kosecha (ariba)