El A Logra Mas di Loke El A Spera
El A Logra Mas di Loke El A Spera
“MI TABATA sa ku mi maestro di historia no tabata gusta Testigu di Yehova, pero mi no tabatin un idea pakiko,” segun Rebekka di 17 aña ku ta biba na Alemania. P’esei, ora e maestro a puntra ken ta dispuesto pa duna un spreekbeurt dilanti klas, Rebekka a duda un poko. No opstante, Rebekka a tuma un kurashi i puntr’é si e por a papia tokante e persekushon ku Testigunan di Yehova a pasa aden bou di e régimen nazi durante Segundo Guera Mundial. E maestro a keda kontentu ku e idea.
E klas a gusta Rebekka su presentashon, i nan a aseptá un total di 44 revista i foyeto ku a trata e tópiko. Despues di esei, Rebekka a duna e maestro tur e material riba kua el a basa su investigashon, inkluso vários buki i vidio ku hende ku no ta Testigu a skirbi òf produsí. Un dje vidionan a trata e persekushon ku Testigunan di Yehova na Ost Alemania a pasa aden durante e Guera Friu. Esaki a interesá e maestro bastante, ya ku e no tabata sa muchu di e tópiko.
Rebekka a haña sa e ora ei pakiko su maestro no tabata gusta Testigu di Yehova. E maestro a kont’é ku e tabata bai skol ku un Testigu di Yehova. E yònkuman no tabata papia kasi nada tokante su kreensianan òf tokante su bida komo Testigu. P’esei e maestro a konkluí ku Testigunan di Yehova ta hende straño i el a disidí ku e no kier tin nada di haber ku nan. Pero e presentashon di Rebekka a kambia su punto di bista. Rebekka ta bisa: “Awor mi ta sali muchu mas mihó ku e maestro. Tambe mi a siña ku nos komo hóben tin ku papia mas habrí tokante nos kreensianan ku otro hende.”
Pero esei no tabata fin dje asuntu. E maestro a papia ku su koleganan tokante e bunita spreekbeurt di Rebekka. Algun dia despues e maestro di étika a pidi Rebekka duna un presentashon mas, e biaha aki no djis dilanti un klas sino na un okashon masha spesial, esta, e konmemorashon anual ku e skol ta selebrá di e liberashon dje kampo di konsentrashon na Auschwitz na fin di Segundo Guera Mundial. Tabatin den kareda di 360 alumno presente, huntu ku rònt di dies maestro. Na final dje presentashon, e presentenan a aseptá 50 foyeto i e skol a pidi 150 ehemplar mas pa repartí despues.
Rebekka a logra hopi mas di loke el a spera. El a duna un bon testimonio tokante su fe no solamente na su klas sino tambe na henter e skol. I awor su maestro no tin e dudanan anterior mas tokante e Testigunan.
[Plachi na página 14]
E nazinan a dekapitá Heinrich Fundis. Sentenáres di otro Testigu di Yehova tambe a ser ehekutá
[Plachi na página 14]
Hopi Testigu di Yehova por a rekobrá nan libertat si nan a nenga nan religion dor di firma e dokumentu aki
[Rekonosementu]
Pa kortesia di United States Holocaust Memorial Museum
[Plachi na página 15]
Muchanan manera Berthold Mewes a ser kitá for di nan mayornan
[Plachi na página 15]
E vidio aki ta duna un relato históriko di e Testigunan di Yehova balente bou di e régimen nazi na Alemania
[Plachi na página 15]
Nan tabata kose un triángulo püs riba unifòrm di prizon pa identifiká Testigunan di Yehova