For di Nos Lektornan

Hóbennan Sa Puntra Danki pa e artíkulo “Hóbennan Sa Puntra . . . Dikon Mi Mayor No Stima Mi?” (8 di òktober 2002) Mi tin 16 aña, i mi no a mira mi tata biológiko for di tempu ku mi tabatin 4 aña. E artíkulo aki a ekspresá presis kon mi ta sinti. Tambe ta bèrdat loke el a bisa ku no tin kasi nada otro ku ta kousa un herida emoshonal mas profundo ku rechaso di un mayor. Danki pa e alimento spiritual aki na ora.

J. J., Merka

Mi mayornan a disidí di divorsiá despues di tin 13 aña separá. Mi no por a komprondé dikon esei a pone mi sufri tantu asina, ya ku mi a kere ku mi a superá e trouma ei hopi tempu pasá. Awor ku mi ta komprondé pakiko mi ta asina tristu mi por ta mas spesífiko ora di hasi orashon i tira asta e karga aki riba Yehova.

M. D., Italia

Mi tata a bandoná mi famia tempu ku mi tabatin seis aña. Djei padilanti e tabatin masha tiki kontakto ku mi. Pa hopi aña mi a lucha ku sintimentu di kulpa. Esei a pone ku nunka mi no tabata bon den komuniká mi sintimentunan na otro hende. E eksperensianan den boso artíkulo a konmové mi i a yuda mi mira ku no ta mi so ta den e situashon aki. Por fabor no balotá e benefisionan ku nos komo lektor ta saka di e artíkulonan aki ni kon gradisidu nos ta pa nan!

A. H., Inglatera

Mi tin 16 aña, i mi tata a kaba di divorsiá di mi mama. Ami, mi ruman hòmber mas chikí i mi ruman muhé mas grandi a keda hopi kibrá. E artíkulo aki tabata berdaderamente inkreibel. Manera mi a kuminsá les’é, m’a kuminsá yora. El a deskribí tur loke mi tabata sinti di paden. E palabranan tabata asina tierno i amoroso. Mas mi a lesa, mas el a konmové mi. Hopi bia mi a yega di puntra mi mes si realmente mi tabata digno di e amor di mi tata. Ta p’esei mi a haña asina hopi konsuelo for di e artíkulo aki. E mihó sintimentu ku mi por tin ta di sa ku asta si mi tata humano no stima mi, Yehova sí semper lo stima mi. Mi no tin ku preokupá ku Yehova diripiente lo kambia di idea i bira lomba pa mi.

A. M., Merka

Nos famia a lanta ku un tata alkohóliko, i mi mama a sufri hopi. Nos komo mucha no a haña masha atenshon. Mi tabata sinti ku mi no bal nada i asta a pensa ku ta mihó mi muri. Mi a pidi yudansa den mi orashonnan. Ora e artíkulo aki a sali, mi a keda hopi gradesidu. Un pensamentu ku a konsolá mi ta ku asta hende den e situashon aki por skohe un resultado felis i eksitoso dor di apliká prinsipionan bíbliko. Mi a realisá ku mi tambe por ta felis!

A. I., Hapon

Orashon Un danki di kurason pa e artíkulo “E Punto di Bista Bíbliko: Orashonnan Ku Dios Ta Skucha.” (8 di sèptèmber 2002) E dia ku mi a les’é, mi tabata den un estado hopi deprimí. E palabranan di Isaias 41:10 realmente a fortalesé mi. Mi ta masha kontentu ku Yehova ta fortalesé no mi so sino tambe otro hende, i ku e ta skucha tur nos orashonnan i asta nos pensamentunan! Mi tin 20 aña ta biba den un famia dividí pa motibu di religion. Esei no ta fásil pasobra riba dje mi tin mas ku 30 aña ta sufri di un malesa króniko. Masha danki mes pa e revistanan maravioso aki ku semper ta duna mi e forsa pa sigui padilanti.

D. G., Alemania