Hóbennan Sa Puntra . . .

Pakiko Mi Ta un Yu Adoptá?

“Ta manera bo ta biba ku un hèndikèp permanente. E ta un doló di kurason ku bo no por kura.”—Robert.

ASINA un hòmber ku a ser adoptá for di dia ku el a nase ta deskribí su bida. E ta kontinuá: “Práktikamente tur dia di bo bida, bo kurason ta anhelá pa haña kontesta riba preguntanan manera: Ken ta mi berdadero famia? Unda nan ta biba? Pakiko nan a laga mi den man di otro hende?”

Chantial, kende ta yu di un tata adoptá, ta lamentá ku e no sa mes ta ken ta su welanan biológiko. E ta bisa: “Mi ta sinti ku mi ta pèrdè algu, pasobra mi no tin niun kontakto ku mi tionan, tantanan i primu- i primanan.” No ta tur yu adoptá ta pensa meskos. Pero algun sí. Pakiko?

E Kousa di Rabia

Un mucha ku haña sa ku el a ser separá for di su famia biológiko por hañ’é ku un trouma formal. Catrina, kende a ser adoptá tempu ku e tabata chikitu, ta bisa: “Mi tabatin un problema ku rabiamentu pasobra mi no tabata komprondé pakiko mi mama biológiko a laga adoptá mi. Mi tabatin e sintimentu ku mi mama a bandoná mi pasobra mi tabata mahos i imposibel pa stima. Si el a duna mi maske ta un chèns, mi sa ku lo mi por a hasié orguyoso di mi. Mas mi a pensa riba mi mama biológiko, mas rabia mi tabata haña den mi kurpa.”

Catrina su relashon ku su mayornan adoptivo tambe tabata bou di basta tenshon. “Mi tabata sinti ku ta mi mayornan adoptivo a kita mi for di mi berdadero mama,” e ta bisa. “P’esei mi a baha mi rabia riba nan.” Sí, un dje sintimentunan di un persona adoptá por ta rabia.

E rabia ei por ta peligroso. Tin biaha, manera e kaso di Catrina ta ilustrá, bo por tin e  tendensia di baha bo rabia den un manera robes òf pa ekspres’é kontra e hendenan robes. Beibel ta konsehá: “Stòp di rabia i laga furia para.” (Salmo 37:8) Kon esei ta posibel? Wèl, e Palabra di Dios ta bisa tambe: “Prudensia [òf, “perspikasia,” NW] di un hende ta hasi ku e no ta rabia lihé.” (Proverbionan 19:11) Perspikasia ta e kapasidat di distinguí e berdadero naturalesa di bo situashon, i esei lo por yuda kalma bo rabia. Kon asina?

No Djis Suponé Algu

Perspikasia por yuda bo analisá e kosnan ku bo ta suponé i ku kisas ta hinka rabia den bo kurpa. Por ehèmpel, si bo ta un yu adoptá, bo ta djis asumí ku bo mayornan biológiko a laga adoptá bo pa motibu ku tabatin algu robes ku bo? Esei tabata e pensamentu di Catrina. Pero semper esei ta e kaso? Kisas ta imposibel pa determiná kiko a motivá bo mayornan, pero tin bon motibu pa no suponé ku tabatin algu robes ku bo. Al fin i al kabo, pakiko mayornan sa duna nan yunan pa adopshon? Hopi bes nan ta sinti ku nan no tin otro opshon.

Tuma por ehèmpel e kaso di Moisés. E relato di Beibel den Eksodo kapítulo 2 ta bisa nos ku ora e Fárao di Egipto a dekretá pa mata tur beibi maskulino israelita, Jokabed a tene su yu chikitu Moisés skondí tres luna largu. Un dado momentu e no por a skond’é mas, pero lo e no por a soportá mira nan mata su yu tampoko. P’esei “ora ku e no por a skond’é mas, el a kohe un makutu di rit i a klafati’é [fur’é] ku asfalt i breu. E ora ei el a pone e yu aden i a pon’é meimei di e richinan kantu di Neil.”—Eksodo 2:3.

Sin duda tabata algu masha difísil p’e bandoná su yu den e manera aki. Pero ki otro opshon e tabatin? E amor ku e tabatin pa su yu a motiv’é p’e hasi loke el a pensa tabata mihó p’e. Ta interesante pa nota ku Jokabed su yu muhé a para vigilá eibanda i a keda te ora el a mira kon nan a kohe su ruman hòmber sano i salvo bai kuné. Probablemente el a hasi esei riba petishon di su mama angustiá.

Klaru ku no ta tur kaso di adopshon ta motivá pa un situashon di emergensia asina bisto, pero hopi bes e motibunan ta similar. Robert ta bisa: “Mi ta un yu djafó. Lo mester tabata hopi duru pa mi mama kria mi, ya ku tabatin mas yu den e famia. Mi mama lo a pensa ku tabata mihó pa mi p’e laga otro hende adoptá mi.”

 Sí, tin hopi motibu pakiko mayornan ta laga otro famia adoptá nan yunan i kria nan. Pero manera e ehèmpelnan aki ta ilustrá, esei no nesesariamente ta pa motibu ku e mama ta odia su beibi òf ta mira un ke otro defekto den dje. Den hopi kaso, e mama ta kere sinseramente ku lo bai e yu mihó si un otro famia kri’é.

E Balor di Stimashon

Perspikasia lo por yuda bo mas aleu ora bo pensa riba e motibu pakiko bo a ser adoptá. Tuma atrobe e ehèmpel di Moisés. Ku tempu, “Fárao su yu muhé a koh’é bai kuné, i a kri’é komo su mes yu.” (Echonan 7:21) Kiko a motivá Fárao su yu muhé pa protehá un kriatura siendo ku e tabata sa ku e ta yu di e hebreonan kondená? Segun Beibel: “E mucha tabata yora. I el a haña duele di dje.” (Eksodo 2:6) Sí, Moisés a ser adoptá no pasobra el a ser odiá òf rechasá sino pasobra el a ser stimá.

Hopi yu adoptá ta bin realisá ku nan mayornan biológiko no a simplemente bandoná nan—ounke ta esei ta sosodé masha hopi biaha e tempunan aki—sino a presentá nan na un instituto pa hasi sigur ku nan lo wòrdu bon kuidá. I otro hende a adoptá nan despues pa motibu ku nan a stima nan sufisiente pa tuma nan bou di nan kuido. Ta algu asina a sosodé ku bo? Dor di konsentrá riba e amor ku bo ta risibí i balor’é, e doló ku bo por ta sinti ta bira ménos.

Ademas, kisas otro hende fuera di bo famia adoptivo tambe ta stima bo. Si bo ta parti di e kongregashon kristian, bo a ser bendishoná ku hopi mama, tata, ruman hòmber i ruman muhé spiritual ku ta stima bo. (Marko 10:29, 30) Ansianonan kristian por ta “manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isaias 32:2) No vasilá pa buska kontakto ku rumannan kristian maduro i konfia den nan. Laga nan sa kiko bo ta pensa i sinti.

Robert ta haña ku ta importante pa desaroyá lasonan fuerte den e kongregashon kristian. E ta bisa: “E bashí ku mi ta sinti t’ei ainda, pero e amor di mi famia spiritual ta push’é te den un huki chikitu di mi kurason.”

Bo Por Logra den Bida

Evitá di saka konklushon inkorekto i negativo, inkluso e idea di ku pasobra bo ta un yu adoptá, bo no por logra nada den bida. E pensamentunan negativo ei por resultá den un gran desanimashon pa bo! (Proverbionan 24:10) Ademas, en realidat nan no tin base.

Kòrda, Moisés a probechá di tur e oportunidatnan ku el a haña. Beibel ta bisa: “Moisés a wòrdu eduká den tur e siñansa di e egipsionan, i e tabata un hòmber di poder den palabra i echo.” (Echonan 7:22) Mas importante ainda, Moisés a haña asina tantu instrukshon spiritual ku su Tata selestial, Yehova, a bira ègt un Persona real p’e. (Hebreonan 11:27) El a logra algu den bida?

Wèl, despues Moisés a bira lider di un nashon poderoso di tal bes tres mion hende òf mas. El a bira profeta, hues, komandante, historiadó, mediadó di e pakto di Lei i eskritor di e promé sinku bukinan di Beibel. Ademas, mayoria eksperto ta bisa ku ta é a skirbi e buki di Jòb i Salmo 90. Sí, Moisés a logra hopi den bida. Hopi yu adoptá tambe tabatin éksito den bida, i bo tambe por.

Robert a logra lanta dos yu ku éksito i aktualmente e ta sirbiendo komo ansiano den e kongregashon kristian. Mirando bèk riba su añanan komo yu adoptá, e ta bisa: “Mi a siña pa no laga loke mi no por korigí molestiá mi, sino mas bien pa ta gradisidu pa e bendishonnan ku mi a risibí.”

Si bo ta bibando aktualmente den un famia di kriansa òf bo a ser adoptá den un famia, de bes en kuando pensamentunan negativo por molestiá bo. Pero purba remplasá nan ku pensamentunan konstruktivo. Filipensenan 4:8 i 9 ta primintí ku ‘e Dios di pas lo ta ku bo’ si bo sigui ‘okupá bo mente’ ku loke ta agradá Dios. Pero kua ta algun paso práktiko ku bo por dal pa bo logra éksito den bida miéntras ku bo ta biba den un famia adoptivo? Un futuro artíkulo den e seri aki lo kontestá e pregunta ei.

[Plachinan na página 26]

E echo ku un hende a adoptá bo ta un evidensia ku el a stima bo sufisiente pa tuma bo den su famia i perkurá pa bo