Un Leshon Ku A Kambia Mi Bida

SEGUN E RELATO DI STANLEY OMBEVA

Na 1982, un outo ku tabata koriendo muchu duru a dal mi. Djis despues di tratamentu médiko mi a reanudá mi rutina di aktividat diario, apesar di ku kada tantu tempu mi tabata sufri doló pa motibu ku un pida di mi wesu di lomba entre mi garganta i pechu a sali for di lugá. Sin embargo, 15 aña despues, mi a pasa den e prueba di mas grandi di mi bida.

PROMÉ ku e aksidente i, te na sierto grado, despues di e aksidente, mi tabata yen di energia. Mi tabatin un bon kustumber di hasi ehersisio; entre otro, djòg 10 pa 13 kilometer den wikènt, hunga squash i hasi hopi trabou manual pisá. Mi a yuda konstruí Salòn di Reino i tambe un Salòn di Asamblea grandi na Nairobi, Kenia, kaminda nos ta biba.

Anto na 1997, e dolónan den mi pechu a kuminsá bira mas regular i mas intenso. Un eksámen médiko a revelá ku un pida di mi wesu di lomba a sali for di lugá i tabata primi mi nervionan prinsipal. Nan a saka afó ku kousa di esaki tabata e aksidente menshoná den introdukshon.

Promé ku mi salú a bai atras, mi a haña un trabou di salesman. E trabou a inkluí un plan di seguro médiko pa famia. Mi posibilidatnan den e mundu komersial a mustra hopi prometedor. Pero meimei di aña 1998, mi a kuminsá pèrdè heful den mi pechu bai abou. Pokopoko pero sigur mi salú a bai atras.

No hopi tempu despues di esei, mi a pèrdè mi trabou ku tur su benefisionan sekundario. E tempu ei, mi dos yu muhénan, Sylvia i Wilhelmina, tabatin 13 i 10 aña di edat. Siendo sin trabou awor, nos tabatin ku dependé di loke mi kasá, Joyce, tabata trese kas fin di luna. Den e sirkunstansianan nobo aki, nos a hasi kambionan den nos bida i gasta ménos posibel. Dor di esei nos a logra tene kabes riba awa.

Sintimentunan Negativo

Mi tin ku atmití ku segun ku mi a realisá kon serio mi kondishon tabata, mi a bira negativo,  egoista i krepchi. Tin biaha, mi tabata rabia, kunsumí i pulushá riba kualke ko’i kèns. Semper mi tabata na rant di kai den depreshon. Tur hende den famia tabatin strès. Mi kasá i mi yu muhénan a haña nan ku un situashon straño ku nan no tabata sa mashá kiko pa hasi.

E tempu ei mi a pensa ku mi sintimentunan tabata hustifiká. Mi peso a subi masha lihé. Mi tabatin problema serio ku bai af i pa kontrolá mi urinamentu. Hopi bes, mi por a muri di bèrgwensa. Vários biaha mi tabata bai den un huki mi so, awa na wowo. Tin biaha mi tabata rabia asina tantu te ku mi a kasi para bira spektakel. Mi tabata sa ku mi no tabata trata ku mi situashon den e mihó manera.

Komo ansiano den e kongregashon kristian di Testigunan di Yehova, hopi bes mi a konsehá mi rumannan kristian pa nunka kulpa Yehova pa nada ku nan ta sufri di dje. Tòg, mi tabata puntra mi mes—i no un biaha so—‘Pakiko Yehova a laga un kos asina pasa ku mi?’ Ounke mi a usa tekstonan manera 1 Korintionan 10:13 pa fortalesé i animá otro rumannan, mi a sinti ku loke mi tabata eksperensiando sí tabata di mas!

Un Reto Médiko

Tabata difísil pa mi haña bon tratamentu médiko. Mi a bai un fisioterapista, un kiropráktiko i un akupunturista, tur riba un solo dia. Si mi a haña alivio mes, tabata pa un ratu so. Mi a konsultá un kantidat di dòkter, inkluso un siruhano ortopédiko i un neurosiruhano. Tur tabata di akuerdo riba ún punto: Mi mester operá pa aliviá e doló i saka e pida wesu ku tabata for di lugá. Pa motibu di mi kreensianan basá riba Beibel, mi a splika e ekspertonan médiko aki klaramente ku mi no kier sanger bou di niun sirkunstansia.—Echonan 15:28, 29.

E promé siruhano a bisa mi ku lo e operá mi via mi lomba. El a splika mi ku e operashon lo por ta unu di hopi riesgo. Pero e siruhano aki no por a garantisá mi ku lo e no duna sanger. Mi no a bai bèk serka dje.

E di dos a bisa mi ku lo e yega n’e wesu di lomba via di mi garganta. E intervenshon ei a zona mi horibel. Ounke e no tabatin problema ku mi nengamentu di sanger, e kier a hasi e operashon mesora i sin bai den muchu detaye. Mi no a bai mas serka dje tampoko.

Sin embargo, ku yudansa di e Testigunan di Yehova ku ta forma e Komité di Kontakto ku Hospital, mi a logra haña un dòkter dispuesto pa koperá. E operashon ku e di tres siruhano a rekomendá tabata meskos ku esun ku e di dos a proponé: kòrta via garganta. El a splika mi ku e riesgonan lo tabata mínimo.

E detayenan bibu di e manera ku e operashon lo a tuma lugá a spanta mi. Sabiendo ku un operashon asina lo a ser hasí rònt di órganonan delikado di kurpa manera kurason i pulmonnan a spanta mi mas ainda. Lo mi a sobrebibí e operashon? Klaru ku e pensamentunan negativo ei no a kalma mi temornan niun tiki.

Dia 25 di novèmber 1998, nan a operá mi kuater ora largu ku bon resultado na un hospital di Nairobi. Tambe e siruhano a kita pida di mi wesu di pelvis. Nan a sleip e pida wesu i despues peg’é ku skruf i un plachi di metal n’e área afektá. Esaki a yuda. Pero e operashon no a eliminá tur mi problemanan. Mi tabata kana ku basta difikultat. Ainda mi ta sufri kada bes di pèrdida di heful.

Aktitut Positivo

Manera mi a menshoná anteriormente, mi a pasa hopi tempu ta preokupá i pensa riba mi mal kondishon. Por zona poko kontradiktorio, pero hopi di e personal médiko tabata elogiá mi pa mi aktitut kalmu i  optimista. Pakiko nan a pensa asina? Nan por a mira ku ounke mi tabata sufri hopi doló, tòg mi a papia ku nan tokante mi fe den Dios.

Ounke de bes en kuando mi tabata rabia i bira amargá pa loke mi tabata pasa aden, ainda mi tabata konfia den Yehova. Semper el a sostené mi den tur loke mi a pasa aden, i el a hasié asina tantu ku tin biaha mi tabatin bèrgwensa di mi mes. Mi a proponé mi mes firmemente pa lesa i meditá riba tekstonan ku mi sa lo tabata un konsuelo pa mi den mi situashon. Algun di esakinan ta:

Revelashon 21:4: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.” Ora mi reflekshoná riba e promesa di Beibel di un mundu nobo kaminda nunka mas lo no tin lágrima ni doló, en bèrdat mi ta haña un konsuelo.

Hebreonan 6:10: “Dios no ta inhustu pa lubidá boso trabou i e amor ku boso a mustra pa su nòmber.” Ounke mi a bira físikamente limitá, mi tabata sa ku Yehova lo balorá mi esfuersonan den su sirbishi.

Santiago 1:13: “No laga ningun hende bisa ora ku e wòrdu tentá: ‘Mi ta wòrdu tentá dor di Dios’; pasobra Dios no por wòrdu tentá dor di maldat, i e mes no ta tenta ningun hende.” Esei ta masha  sierto! Ounke Yehova a permití mi sufri, no ta é a kous’é.

Filipensenan 4:6 i 7: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” Orashon a yuda mi haña e pas mental tan nesesario, loke a permití mi trata ku mi situashon na un manera sabí.

Mi tabata usa e tekstonan aki pa animá otro rumannan ku tabata den angustia—i en bèrdat esakinan a yuda nan! Pero mi a bin realisá ku e tempu ei mi no a komprondé nan balor kompletamente. Ta hopi malu mi mester a bira pa komprondé kiko ta nifiká ser humilde i siña pone mi pleno konfiansa den Yehova.

Mas Animashon pa Mi

Hopi ruman ta bisa ku e hermandat kristian ta un pilar i apoyo den tempu di difikultat. Tòg, ta masha fásil pa nos mira e relashon ku nos rumannan komo algu gewon! Ta bèrdat ku kisas no tin muchu kos ku nan por hasi, pero semper nan ta kla pa yuda. Esei tabata e kaso ku mi mes tambe. Tur ora nan tabata bishitá mi na hospital, tin biaha mainta trempan. Asta nan a ofresé pa yuda paga mi gastunan médiko. Mi ta profundamente gradisidu na tur e rumannan ku a keda konmoví ku mi sufrimentu i ku a bin yuda mi.

Den nos kongregashon lokal, e rumannan sa ku awor mi ta limitá den loke mi por hasi. Aktualmente mi ta sirbi komo superintendente presidente i ta traha ku un kuerpo di ansiano kristian den kua ta reina un bon spiritu di koperashon. Nunka mi a bira iregular den e trabou di prediká. Den e tempu ku mas mi a sufri, mi a yuda dos hende dediká nan bida na Yehova. Aktualmente un di nan ta sirbi komo sirbidó ministerial den un kongregashon di Testigunan di Yehova na Nairobi.

Ainda mi no tin boka pa gradisí mi kasá, kende a apoyá mi dor di henter e eksperensia teribel aki. El a soportá mi rabia, mi kambionan di beis, mi terkedat i mi frustrashonnan. Ki ora ku mi tabata yora di doló, e tabata trankilisá mi i konsolá mi. Su forsa i resistensia durante difikultat ta asombrá mi te awe. El a resultá di ta un berdadero ‘amigu tur ora bai.’—Proverbionan 17:17.

Nos yu muhénan a siña trata ku mi situashon. Nan ta hasi tur loke nan por pa yuda mi. Nan ta komprondé mi nesesidatnan i ta respondé mesora pa garantisá mi bienestar ora nan mama no t’ei. Sylvia ta mi “krùk.” E ta yuda mi move rònt den kas ki ora ku mi ta sinti mi débil.

Kiko di Mina, esun mas chikitu? Wèl, mi ta kòrda un biaha mi a kai na kas i mi no por a lanta bèk. E tabata e úniko hende na kas. El a usa tur su forsa p’e lanta mi i lei mi pokopoko hiba mi kamber. Ainda e no tin un idea kon el a logra esei. E solo akto di kurashi ei a keda grabá te awe den mi mente.

E kos di mas difísil ku mi mester a lucha kuné den bida tabata e leshon aki. I ainda mi ta hibando un lucha. No tin nada ku a pone mi bida i fe na prueba te n’e grado aki. Mi a siña kiko kier men ser humilde, razonabel i sinti pa otro hende. Pleno konfiansa den Yehova a yuda mi soportá e problema aki ku éksito.

Mi a siña e bèrdat di e palabranan di apòstel Pablo: “Nos tin e tesoro aki den pòchi di klei, pa e ekselensia di e poder por ta di Dios i no di nos mes.” (2 Korintionan 4:7) Mi ta haña masha hopi konsuelo den e promesa di Dios di “shelunan nobo i un tera nobo” ku lo bini pronto. (2 Pedro 3:13) Mi ta pidi Yehova p’e sigui sostené mi miéntras mi ta warda riba e mundu nobo, pasobra ainda mi ta suak i mi no por hasi mashá riba mi mes forsa.

[Plachinan na página 20]

Aktividat kristian ku mi famia a yuda mi perseverá